واشنگٹن: امریکا کے قومی سلامتی کے مشیر مائیک والٹز نے چیٹ لیک ہونے کی ذمہ داری قبول کر لی۔
فاکس نیوز پر انٹرویو میں مشیر مائیک والٹز نے اعتراف کر لیا ہے کہ یہ ان کی غلطی تھی، انھوں نے کہا ’’میں مکمل ذمہ داری لیتا ہوں، میں نے سگنل ایپ پر چیٹ گروپ بنایا، یہ شرمناک تھا۔‘‘
دوسری طرف صدر ڈونلڈ ٹرمپ نے چیٹ لیک کا ملبہ سگنل ایپ پر ڈال دیا، تاہم سینیٹ کی انٹیلیجنس کمیٹی کی دوسری سماعت ہوئی تو اس میں ڈیموکریٹس کانگریس مین ٹرمپ انتظامیہ پر برہم ہوئے۔
امریکی انٹیلی جنس سربراہ تلسی گبارڈ نے سماعت میں اعتراف کیا کہ چیٹ گروپ پر صحافی کو شامل کرنے کی غلطی ہوئی ہے، تاہم چیٹ میں کوئی خفیہ معلومات نہیں تھیں۔ ڈیموکریٹس اراکین کانگریس نے سماعت کے دوران چیٹ کی تصاویر شیئر کیں، جس میں حملے کی تفصیلات موجود تھیں، جو صحافی جیفری گولڈ برگ نے سوشل میڈیا پر شیئر کر دیں۔
ٹرمپ جنگی منصوبہ لیک ہونے پر انتظامیہ کے دفاع میں میدان میں آگئے
ڈیموکریٹس کانگریس مین نے سینیٹ کمیٹی کی سماعت میں امریکی وزیر دفاع سے مستعفی ہونے کا مطالبہ بھی کیا، اور کہا یہ عمل ناقابل قبول ہے، یہ قومی سلامتی کا معاملہ ہے، ہمارے فوجی خطرناک محاذ پر لڑ رہے ہیں اور یہ لوگ تفصیلات بتا رہے ہیں، امریکی وزیر دفاع فوری مستعفی ہو۔
یاد رہے کہ تین روز پہلے صحافی جیفری گولڈ برگ نے یمن میں حوثیوں پر حملے کی چیٹ لیک ہونے کا دعویٰ کیا تھا۔ اٹلانٹک میگزین کے چیف ایڈیٹر جیفری گولڈ برگ نے اطلاع دی کہ انھیں مائیک والٹز نے غلطی سے سگنل چیٹ میں شامل کر دیا تھا۔ انھوں نے اپنی نیوز اسٹوری میں اس معاملے کا انکشاف کیا، جس میں انھوں نے لکھا کہ اس نے چیٹ میں یمن میں امریکی حملوں کے لیے خفیہ فوجی منصوبے دیکھے، جن میں ہتھیاروں کے پیکج، اہداف اور وقت شامل تھا، بم حملے سے محض دو گھنٹے قبل۔
