چیچنیا : روس میں یورپ کی سب سے بڑی مسجد کاافتتاح کردیاگیا، عظیم الشان مسجد میں تیس ہزار نمازیوں کی گنجائش ہے، اس مسجد کو مسلمانوں کا فخر قرار دیا جا رہا ہے۔
تفصیلات کے مطابق روس کے وفاقی علاقے چیچنیا میں یورپ کی عظیم الشان مسجد کا افتتاح کردیا ، افتتاح چیچنیاکےسربراہ رمضان قدیروف نے سعودی عرب، متحدہ عرب امارات اور اردن کے وفود کے ہمراہ کیا اورنماز اداکی۔
مسجد کی افتتاحی تقریب میں بڑی تعداد میں مقامی اور غیرملکی حکام نے شرکت کی ، جس میں کویتی امیری دیوان کے مشیر اور چیئرمین انٹرنیشنل اسلامک چیئرٹ ایبل آرگنائزیشن (آئی آئی او سی) ڈاکٹر عبداللہ الماتوق بھی موجود تھے۔
سفید ماربل سے بنی اس خوبصورت مسجد کا نام حضرت محمدﷺ کے اسم مبارک پر رکھا گیا ہے اور اس میں 30 ہزار سے زائد نمازیوں کی گنجائش ہے جبکہ مسجد کے باغ میں سترہزارافراد بیک وقت عبادت کرسکتےہیں، اس مسجد کو مسلمانوں کا فخر قرار دیا جا رہا ہے۔
اس موقع پر منعقدہ تقریب میں روسی صدر ولادی میر پیوٹن کے ساتھی چیچن سربراہ رمضان کے درو کا کہنا تھا کہ یہ مسجد اپنے ڈیزائن میں منفرد اور اپنے سائز اور خوبصورتی میں شاہانہ ہے۔
خیال رہے کہ یہ مسجد چیچنیا میں شہالی کے علاقے میں قائم کی گئی ہے، جو دارالحکومت گرونزے کے باہر 54ہزار لوگوں پر مشتمل علاقہ ہے، مسجد کے صحن میں پھولوں اور فاؤنٹینز کو لگایا گیا ہے۔
پانچ لاکھ اڑتیس ہزارفٹ رقبےپرمحیط سنگر مرمر سےآراستہ مسجد کی تعمیر میں خواتین نےبھی حصہ لیا، مشرق وسطیٰ کے ایک اخبار کے مطابق 9ہزار 7سو اسکوائر میٹر پر موجود اس مسجد کو ایک ازبک آرکیٹک نے ڈیزائن کیا۔
رمضان کے دور کی بات کی جائے تو انہیں 2007 میں مسلم اکثریتی علاقے میں حکمرانی کے لیے مقرر کیا گیا تھا، جس کے بعد سے وہ چیچنیا میں اسلام کی بحالی اور مساجد کی تعمیر میں مصروف ہیں، 2008 میں انہوں نے گرونزے میں 10 ہزار نمازیوں کی گنجائش رکھنے والی مسجد چیچنیا کا دل کا افتتاح کیا تھا۔
