انٹرنیٹ پر آج کل جزو وقتی کام کرکے لوگ عام نوکریوں کی نسبت کہیں زیادہ آمدنی حاصل کررہے ہیں اور یہ ذریعہ آمدن لوگوں میں خاصا مقبول بھی ہو رہا ہے، ایک ایسے ہی چوکیدار نے سب کو حیران کر ڈالا۔
لاہور کے ایک سرکاری کالج میں سیکیورٹی گارڈ کی نوکری کرنے والے نذیر احمد نے اپنے شوق اور لگن کی بدولت تھوڑی سی محنت سے نہ صرف امریکی ڈالر کمائے بلکہ ایک نئی مثال بھی قائم کی۔
اے آر وائی نیوز سے گفتگو کرتے ہوئے نذیر احمد نے بتایا کہ میں چوکیدار کی نوکری کے ساتھ گزشتہ 6 سال سے فری لانسنگ کا کام بھی کرتا ہوں، اس سے قبل ایک سافٹ ویئر ہاؤس میں چوکیدار کی ملازمت کے دوران وہاں کے لڑکوں سے کمپیوٹر چلانا سیکھا۔
انہوں نے بتایا کہ میں نے اس وقت ایک لیپ ٹاپ لیا تھا جس کے بعد اب چھٹی کے بعد آن لائن فوٹو شاپ کا کام کرتا ہوں۔
چوکیدار نذیر احمد نے نوجوانوں کے نام اپنے پیغام میں کہا کہ جب میں کم تعلیم یافتہ ہوکر ملک میں ڈالر لاسکتا ہوں تو وہ لڑکے جو تعلیم یافتہ ہیں بیرون ملک جانے کے بجائے یہاں بیٹھ کر بھی اچھی آمدنی حاصل کرسکتے ہیں۔
