کراچی: منی لانڈرنگ کیس میں ملوث شہرہ آفاق ماڈل ایان علی کو فلم انڈسٹری میں لانے کیلئے کئی پروڈیوسر ز سرگرم ہوگئے، ایک سے زائد آفرز ملنے کے باوجود ایان علی نے ایک فلم میں کام کرنے کا فیصلہ کر لیا ہے۔
ذرائع نے انکشاف کیا کہ ایان علی کو عدالت میں حاضری سے مستثنیٰ قرا ر دئیے جانے کے بعد کئی ایک فلم پروڈیوسرز نے ان سے رابطے کئے ہیں کراچی سے تعلق رکھنے والے ایک فلمساز کی آفر کو قبول کرتے ہوئے ایان علی نے فلم میں کام کرنے کافیصلہ کیا ہے جس کو فی الحال اس نے خفیہ رکھنے کی استدعا کی ہے۔
ان کے قریبی ذرائع کا کہنا ہے کہ عدالتی کارروائیوں کی بنا پر وہ مزید ٹینشن سے بچنے کیلئے فلم کاکام خاموشی سے کرنے کی خواہش مند ہیں۔اسکے علاوہ فیشن انڈسٹری سے وابستہ کئی ایک شخصیات نے بھی ایان کو فلمی ہیروئین بنانے کیلئے آفرز دی ہیں۔
انکاکہنا ہے کہ منی لانڈرنگ کی بنا پر اشتہاری اداروں نے ایان علی کو فی الحال کسی پراڈکٹ میں ماڈلنگ کیلئے سائن کرنے سے معذرت کر لی ہے جبکہ ریمپ پر واک کے لئے بھی ان سے رابطے نہیں کئے جارہے، کوئی ادارہ اپنے پراڈکٹ کی ماڈلنگ کیلئے اسکو سائن کرنے کیلئے تیار نہیں ہے، اسی بنا پر ایان علی نے بھی فلمی دنیا میں اپنی نئی شناخت بنانے کا فیصلہ کیا ہے واضح رہے کہ مذکورہ فلم کی کاغذی تیاریاں جاری ہیں۔
