Tag: ڈاکوؤں کی فائرنگ

کراچی : لانڈھی میں ڈاکوؤں نےایک اور معصوم کی جان لے لی جبکہ خالہ زخمی ہوئی، 10 سالہ امین دو بہنوں کا اکلوتا بھائی تھا۔

تفصیلات کے مطابق کراچی کے علاقے لانڈھی 89 میں ڈکیتوں نے نوجوان سے موٹر سائیکل چھینتے ہوئے اندھا دھند فائرنگ کردی ، جس سے گلی میں موجود 10 سالہ امین گردن پر گولی لگنے سے موقع پر ہی دم توڑ گیا۔

پولیس کا کہنا تھا کہ فائرنگ کے واقعے میں نوجوان کی خالہ ناصرہ بی بی بھی زخمی ہوئی، جنہیں تشویش ناک حالت میں جناح اسپتال منتقل کر دیا گیا ہے تاہم فرار ملزمان کی تلاش جاری ہے۔

لواحقین نے بتایا کہ گھر میں لائٹ نہ ہونے کے باعث امین خالہ کیساتھ گھر کے باہر بیٹھا تھا کہ بائیک پر ڈاکو موٹر سائیکل سوار شخص کا تعاقب کرتے ہوئے آرہے تھے، ڈاکو جس شخص کا تعاقب کررہے تھے اس کے پاس نئی موٹر سائیکل تھی،ڈاکوؤں نے موٹر سائیکل سوار شخص پر متعدد فائر کیے مگر وہ بچ گیا لیکن گولی لگنےسے امین دم توڑگیا اس کی خالہ زخمی ہوئی۔

مقتول امین مدرسہ کا طلبعلم اور دو بہنوں کا اکلوتا بھائی تھا، ورثا نے مطالبہ کیا ہے کہ انصاف فراہم کیا جائے اور واردات میں ملوث ملزمان کو گرفتار کیا جائے۔

پولیس کےمطابق واردات میں شامل ڈکیتوں کی تعداد چار تھی،رواں برس ڈکیتوں کی فائرنگ سے جاں بحق شہریوں کی تعداد چالیس ہوگئی۔

ایس ایس پی کورنگی نے بتایا کہ ملزمان لانڈھی بابر مارکیٹ میں واردات کررہے تھے کہ موبائل اسنیچنگ کےدوران عوام ڈاکوؤں کے پیچھے بھاگی، کچھ لوگوں نےملزمان کاموٹر سائیکلوں پرپیچھا کیا، شہریوں کو بھگانےکےلیےملزمان نے گولیاں چلائیں۔

کراچی : غریب آباد انڈرپاس کےقریب ڈاکوؤں کی فائرنگ سے سیکیورٹی گارڈ جاں بحق ہوگیا، مقتول واحد کا آبائی تعلق لاڑکانہ سے تھا اور چھ ماہ قبل ہی ہاؤسنگ سوسائٹی میں سیکیورٹی گارڈ کی نوکری شروع کی تھی۔

تفصیلات کے مطابق کراچی میں عید سے پہلے کرمنلز کو کھلی چھوٹ مل ہوئی، غریب آباد میں پولیس اوررینجرز کی اسنیپ چیکنگ سے بچنے کیلئے سوسائٹی میں گھسنے سے روکنے پر ملزمان نے سیکیورٹی گارڈ کو قتل کردیا اور فرار ہوگئے۔

پولیس نے بتایا کہ 2 موٹرسائیکل پر 4 ملزمان شہریوں سے لوٹ مارکر رہےتھے کہ گشت پرموجود رینجرز اہلکاروں نے ملزمان کوپکڑنےکی کوشش کی تاہم وہ موٹر سائیکل پھینک کرفرار ہوگئے۔

رینجرز اہلکاروں نے پیدل فرار ہونے والے ملزمان کا تعاقب کیا، ملزمان قریب کی سوسائٹی میں داخل ہوئے، جس پر سوسائٹی کےگارڈ نے ملزم کوپکڑنےکوشش کی تو ملزمان نے فائرنگ کردی ، ملزمان کی فائرنگ سے سیکیورٹی گارڈ جاں بحق ہوگیا،

مقتول واحد نے چھ ماہ قبل ہی ہاوسنگ سوسائٹی میں سیکورٹی گارڈ کی نوکری شروع کی تھی ، ہاوسنگ سوسائٹی کے مکین کا کہنا ہے کہ واقعہ سے کچھ دیر قبل ہی مقتول کو تنخواہ ادا کی تھی ، جس پر اس نے بچوں کو عید شاپنگ پر لے جانا کا کہا تھا۔

پولیس کے مطابق جائے وقوعہ سے پولیس نے تین خول برآمد کرکے ملزمان کی تلاش شروع کردی۔

دوسری جانب اکتیس مارچ کو ڈکیتی میں مزاحمت پر ڈاکوؤں کی فائرنگ سے زخمی شہری چل بسا، مقتول سعد کراچی گلشن اقبال کارہائشی اور دو بچوں کا باپ تھا۔

واضح رہے رواں سال ڈکیتی مزاحمت میں قتل کئے گئے افراد کی تعداد ساٹھ اور ماہ رمضان میں قتل ہونیوالوں کی تعداد بیس ہوگئی ہے۔