کراچی: شہر قائد کے علاقے محمود آباد نمبر پانچ کے قریب ایک گلی میں پولیس اور ڈاکوؤں کے درمیان فائرنگ کے تبادلے کی سی سی ٹی وی فوٹیج سامنے آئی ہے۔
سرویلنس کیمرے کی فوٹیج میں تنگ گلی میں ڈاکوؤں کو فائرنگ کرتے ہوئے فرار ہوتے دیکھا جا سکتا ہے، پولیس اہلکار کو فرار ہونے والے ڈاکو کا تعاقب کرتے ہوئے بھی دیکھا جا سکتا ہے۔
پولیس اور ڈاکوؤں کے درمیان فائرنگ کے تبادلے میں پولیس اہلکار رضوان، راگیر خاتون فائزہ اور رکشہ ڈرائیور عمران زخمی ہوئے ہیں، پولیس حکام کے مطابق پولیس اہلکار کو بائیں ران میں، راہ گیر خاتون کو کمر اور رکشہ ڈرائیور کو سینے پر گولی لگی ہے۔
مسلح ڈاکو فائرنگ کرتے ہوئے فرار ہو گئے تھے، پولیس مقابلے کے دوران ڈاکوؤں کی جانب سے اندھا دھند فائرنگ کی گئی تھی، جس سے زخمی ہونے والے افراد کو اسپتال منتقل کر دیا گیا ہے۔
