کراچی: الہٰ دین پارک کے نزدیک ڈکیتی کے دوران مزاحمت کرتے ہوئے گاڑی سوار نے فائرنگ کر کے ایک ڈاکو کو ہلاک کردیا جب کہ دوسرا ڈاکو فرار ہو گیا۔
تفصیلات کے مطابق الہ دین پارک کے قریب دو ڈاکوؤں نے ڈکیتی کی نیت سے ایک گاڑی کو روکنے کی کوشش کی جس پر گاڑی میں سوار سادہ لباس میں ملبوس رینجرز اہلکار نے مزاحمت کرتے ہوئے ڈاکو پر فائرنگ کردی جس کے نتیجے میں ایک ڈاکو ہلاک اور ایک راہگیر زخمی ہوگیا۔
ریسکیو ذرائع کے مطابق فائرنگ کے واقعے میں2 افراد زخمی ہوئے تھے جنہیں فوری طور عباسی شہید اسپتال لے جایا گیا جہاں ایک شخص زخموں کی تاب نہ لاتے ہوئے ہلاک ہو گیا جب کہ دوسرے شخص کو طبی امداد دی جا رہی ہے۔
ایس پی گلشن اقبال غلام مرتضٰی نے کہا کہ فائرنگ سے ہلاک ہونے والا شخص ڈکیت تھا جو ایک گاڑی کو روک کر لوٹ مار میں ملوث تھا کہ گاڑی میں سوا رینجرزکے سادہ لباس اہلکار نے ڈاکو پر فائرنگ کردی جس کے نتیجے میں ایک ڈکیت مارا گیا جب کہ ایک فرار ہوگیا۔
ایس پی گلشن نے بتایا کہ سادہ لباس میں ملبوس رینجرز اہلکار کی فائرنگ سے قریب سے گزرنے والا رکشا ڈرائیور بھی زخمی ہوا جسے قریبی اسپتال میں طبی امداد دی جا رہی ہے جب کہ مفرور دوسرے ڈکیت کی گرفتاری کے لیے چھاپے مارے جا رہے ہیں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
