کراچی: کراچی کےعلاقے نیو ٹاوٗن تھانے کی حدود میں شہیدِ ملت روڈ پر واقع بینک سے ڈاکو 40 لاکھ سے زائد رقم لوٹ کر فرار ہوگئے۔
پولیس کے مطابق شہیدِ ملت روڈ پر ہونے والی بینک ڈکیتی میں چھ مسلح ملزمان سیکیورٹی گارڈز کو زخمی کرکے بینک میں داخل ہوئے، بینک کے اندر سیکیورٹی کے انتطامات ناقص تھے، بینک عملے کو بھی شامل تفتیش کیا جائے گا۔
ایس ایس پی سی ایسٹ سید پیر محمد شاہ نے میڈیا سے بات چیت کرتے ہوئے بتایا کہ ملزمان نے اسلحے کے زور پر بینک کے کھاتیداروں اور عملے کو یرغمال بنانے کے بعد لوٹ مارکی، اس دوران مزاحمت پر بینک کے دو گارڈز بھی زخمی ہوئے۔
واقعے کی سی سی ٹی وی فوٹیج موجود نہیں اس لئے عینی شاہدین کی مدد سے ملزمان کے خاکے تیار کئے جائیں گے۔
