لاہور: پی ٹی آئی رہنما ڈاکٹر شاہد صدیق کے قتل میں ملوث کرائے کے قاتل کو بھی پولیس نے گرفتار کر لیا۔
تفصیلات کے مطابق پی ٹی آئی رہنما اور اسپتال کے مالک ڈاکٹر شاہد کے قتل میں پیش رفت ہوئی ہے، آرگنائزڈ کرائم یونٹ اقبال ٹاؤن نے قتل میں ملوث شوٹرز کو گرفتار کر لیا۔
پولیس حکام کا کہنا ہے کہ کرائے کے قاتل شہریار اور اس کے ساتھی کو گرفتار کر لیا گیا ہے، جن کے ساتھ مقتول ڈاکٹر شاہد صدیق کے بیٹے قیوم نے ایک کروڑ 60 لاکھ میں ڈیل کی تھی۔
پولیس حکام کے مطابق قیوم نے شوٹرز کی مدد سے والد کو قتل کروایا، ڈاکٹر شاہد کے قتل کا مقدمہ ان کے دوسرے بیٹے تیمور کی مدعیت میں درج کیا گیا تھا، جس کے مطابق ڈاکٹر شاہد صدیق اپنی گاڑی میں بیٹھنے لگے تو شوٹر نے فائرنگ کر دی۔
مقتول پی ٹی آئی رہنما کا بیٹا قیوم سامنے اپنی کار کے باہر بیٹھا باپ کو قتل ہوتے دیکھ رہا تھا، قتل کی واردات میں استعمال ہونے والی گاڑی پہلے ہی برآمد ہو چکی ہے، پولیس حکام کے مطابق مرکزی ملزمان شہریار، شہریار کے والد سجاد اور چچا شاہد نے مل کر قتل کیا، جب کہ ملزم شہریار نے 16 لاکھ 75 ہزار روپے وصول کیے تھے۔
