Tag: ڈاکٹر عشرت العباد خان

طویل ترین گورنر شپ کا خاتمہ؟

سابق گورنر سندھ ڈاکٹر عشرت العباد خان پاکستان کی تاریخ کے وہ واحد گورنر ہیں جو طویل ترین عرصہ سے اس عہدے پر فائز ہیں۔

تقریباً 14 سال گورنر سندھ کے عہدے پر فائز رہنے والے عشرت العباد ایشیا کے دوسرے اور دنیا بھر میں تیسرے طویل المدتی گورنر ہیں۔

عشرت العباد خان 2 مارچ 1963 کو کراچی میں پیدا ہوئے۔ انہوں نے اپنے سیاسی سفر کا آغاز اپنے تعلیمی سفر کے ساتھ ساتھ ڈاؤ میڈیکل کالج سے کیا جہاں وہ متحدہ قومی موومنٹ کے اسٹوڈنٹس ونگ اے پی ایم ایس او کے اہم لیڈر کے طور پر ابھرے۔

سنہ 1990 میں انہیں صوبائی وزیر برائے ہاؤسنگ اور ٹاؤن پلاننگ بنایا گیا۔ اس وقت انہیں ماحولیات اور صحت کی وزارت کا اضافی چارج بھی دیا گیا۔ سنہ 1993 میں وہ برطانیہ چلے گئے جہاں انہوں نے سیاسی پناہ کے لیے درخواست دی جو قبول ہوگئی۔ بعد ازاں انہیں برطانوی شہریت بھی حاصل ہوگئی۔

جسٹس (ر) سعید الزماں صدیقی نئے گورنر سندھ نامزد *

سنہ 2002 میں انہیں متحدہ قومی موومنٹ کی جانب سے گورنر سندھ نامزد کیا گیا جس کے بعد 27 دسمبر کو وہ گورنر منتخب ہوگئے۔ وہ پاکستان کی تاریخ کے کم عمر ترین گورنر تھے۔

ڈاکٹر عشرت العباد خان نے اپنے عہد گورنری کا عرصہ خاموشی سے گزارا اور اس دوران انہوں نے کسی قسم کے سیاسی معاملے میں مداخلت سے پرہیز کیا تاہم کچھ عرصہ قبل ایم کیو ایم کے منحرف رہنما اور پاک سرزمین پارٹی کے سربراہ مصطفیٰ کمال نے ان پر سنگین نوعیت کے الزامات لگائے جس کے بعد پہلی بار عشرت العباد ٹی وی چینلز پر ذاتی دفاع کرنے کے لیے پیش ہوئے۔

انہوں نے مصطفیٰ کمال پر جوابی الزامات بھی لگائے تاہم انہوں نے حکومت پر توجہ دینے کے بجائے اس قسم کے سیاسی معاملات میں ملوث ہونے پر شرمندگی اور معذرت کا اظہار بھی کیا۔

عشرت العباد فن و ادب کے دلدادہ تھے اور شہر میں ہونے والی ادبی و ثقافتی تقریبات میں بطور خاص شرکت کیا کرتے تھے۔ انہوں نے کئی مواقعوں پر گٹار بجانے اور اپنے گانا گانے کی صلاحیت کا مظاہرہ بھی کیا۔

ڈاکٹر عشرت العباد خان کو گورنر سندھ کے عہدے سے ہٹانے اور ان کی جگہ ریٹائرڈ چیف جسٹس سعید الزماں صدیقی کو مقرر کرنے کا فیصلہ کرلیا گیا ہے۔

نومبر 9, 2016
نوجوان ہی ملک کو آگے لے کر جائیں‌گے، گورنر سندھ

کراچی: گورنر سندھ ڈاکٹر عشرت العباد خان نے کہا ہے کہ قائد اعظم نے قوم کو پیغام دیا ہے کہ کڑے وقت میں بھی سرنگوں نہ ہوا جائے، نوجوان اس ملک کا اثاثہ ہیں اور نوجوان ہی اس ملک کو آگے لے کر جائیں‌ گے۔

مقامی ہوٹل میں‌ منعقدہ یوتھ پارلیمنٹ کی تقریب سے خطاب کرتے ہوئے گورنر سندھ نے قوم کو جشن آزادی کی مبارک باد دی اور کہا کہ ہمارے بزرگوں نے جو ہمیں سکھایا اور بانی پاکستان قائد اعظم محمد علی جناح نے ہمیں اتحاد، تنظیم اور یقین محکم کی صورت میں یہی پیغام دیا ہے کہ کڑے سے کڑے وقت میں بھی ہمیں سرنگوں نہیں ہونا بلکہ یکجہتی کے ساتھ اس کا مقابلہ کرنا چاہیے۔

گورنر نے یوتھ پارلیمنٹ کی کوششوں کو سراہتے ہوئے کہا کہ نوجواں کو ہی اس ملک کو آگے لے کر جانا ہے، حقیقت کو تسلیم کرنا ہوگا، پاکستان کو آگے جانا ہے پاکستان کو ترقی دینی ہے جس کے لیے ہم سب کوشاں ہیں۔

خراب حالات کے سبب کے فور واٹر پروجیکٹ میں تاخیر ہوئی

کے فور واٹر پراجیکٹ کے حوالے سے ان کا کہنا تھا کہ ہمارے سامنے سب سے پہلے کراچی کے حالات کو درست کرنے کا چیلنج تھا جس کے باعث اس منصوبے کو شروع کرنے میں ہمیں 5 سے چھ سال لگے لیکن ہم نے ایف ڈبلیو او کو کہا ہے کہ اس منصوبے کو دو سال عرصے میں مکمل کیا جائے، پچھلے چند برس سے موازنہ کریں تو آج کراچی کے حالات بہت بہتر ہیں اور اسے بہتر کرنے کے لیے ہماری کوششیں جاری ہیں۔

لیاری ایکسپریس وے اگلے مارچ میں مکمل ہوجائے گا

ترقیاتی منصوبوں کے حوالے سے گورنر سندھ نے کہا کہ لیاری ایکسپریس وے کو اگلے برس ستمبر کے بجائے مارچ 2017 میں مکمل کرلیں گے، ماس ٹرانزٹ سسٹم کا اہم جز گرین لائن کا اسٹرکچر بھی مارچ 2017 تک مکمل کرلیا جائے گا، سپر ہائی وے کی خستہ حالت کے باعث کراچی سے حیدر آباد تک راستہ ستمبر 2017 تک مکمل کرلیں گے تاخیر ہونے والے منصوبے جلد شروع ہوں‌گے اور مکمل بھی ہوں‌گے ، ان پروجیکٹس میں سندھ حکومت اور وفاقی حکومت کا اہم تعاون شامل ہے۔

نوجوانوں کو پیغام دیتے ہوئے انہوں نے کہا کہ پاکستان میں اللہ تعالیٰ بہت سی نعمت دے ہیں کسی کو الزام نہیں دینا چاہیے ہمیشہ مثبت سوچ کو اہمیت دینی چاہیے۔

قبل ازیں یوتھ پارلیمنٹ کے بانی چیئرمین رضوان جعفر نے خطاب کرتے ہوئے کہا کہ ہمیں‌ پاکستان کو آگے لے کر جانے کے لیے جدوجہد کرنی ہوگی اور یہ سوچنا ہوگا کہ ہمیں‌آنے والی نسلوں کو کیسا پاکستان دینا ہے۔

گورنر سندھ نے تقریب میں منعقدہ تقریری مقابلے کے فاتح مقررین کو انعامی شیلڈ بھی دیں‌ اور جشن آزادی کا کیک بھی کاٹا ، تقریب میں‌ پیپلز پارٹی کی رہنما اور ممبر سندھ اسمبلی خیر النسا مغل نے بھی شرکت کی۔

اگست 14, 2016
اے آروائی کی شکریہ پاکستان مہم پاکستان کپ ہاکی ٹورنامنٹ کا آغاز

کراچی: گورنر سندھ ڈاکٹر عشرت العباد خان نے شکریہ پاکستان مہم کے تحت پاکستان کپ ہاکی ٹورنامنٹ کے آغاز کا اعلان کردیا، ایونٹ کےتمام میچز اے آر وائی میوزک پر نشر کیے جارہے ہیں۔

اے آر وائی ڈیجیٹل نیٹ ورک کی کاوشیں رنگ لے آئیں، جشن آزادی کا رنگ کھیلوں میں چھلکنے لگا، کراچی میں ہاکی کا میلہ شروع ہوگیا، ایونٹ میں نائن اے سائیڈ کے مقابلوں میں آٹھ ٹیمیں شریک ہیں، شیڈیول کے مطابق روزانہ دو میچ ہوں گے اور فائنل چودہ اگست کو ہوگا، تمام میچز اے آر وائی میوزک پر برہ راست نشر ہو رہے ہیں۔

افتتاح کے موقع پر گورنر سندھ نے ہاکی کلب آف پاکستان کو عبدالستار ایدھی کے نام سے منسوب کرنے کا بھی اعلان کیا، گورنر سندھ نے قومی کاموں میں اے آر وائی نیٹ ورک کی کوششوں کو سراہا۔

ڈاکٹر عشرت العباد خان کا کہنا تھا کہ جشن آزادی بھرپور طریقے سے مناکر پوری دنیا کو بتائیں گے کہ زندہ قومیں کس طرح آزادی کا جشن مناتی ہیں۔

گورنر سندھ نے پینتیس لاکھ روپے انعام کا بھی اعلان کیا، جیتنے والی ٹیم کو بیس لاکھ، رنرز اپ ٹیم کو دس لاکھ اور تیسری پوزیشن حاصل کرنے والی ٹیم کو پانچ لاکھ روپے انعام دیا جائے گا۔

شکریہ پاکستان مہم کے تحت پاکستان کپ ہاکی ٹورنامنٹ کے افتتاحی روز دو میچ کھیلے گئے، جس میں پی آئی اے اور کسٹمز نے کامیابی حاصل کی۔

افتتاحی میچ میں پی آئی اے نے واپڈا کے خلاف تین کے مقابلے میں دو گول سے کامیابی حاصل کی، فاتح ٹیم کے محمد زبیر نے دو اور شفقت رسول نے ایک گول کیا، واپڈا کی جانب سے عرفان جونئیر اور تصور عباس نے گول کیے۔

دوسرے میچ میں کسٹمز نے پی ڈی ایس کلر کو ایک کے مقابلے میں دو گول سے زیر کیا، کسٹمز کے طرف سے محمد عابد اور محمد عامر نے گول کیے، پی ڈی ایس کا واحد گول محمد نوید نے کیا۔

ایونٹ میں کل بھی دو میچ ہوں گے پہلا میچ نیشنل بینک اور سوئی گیس کے درمیان ہوگا، دوسرے میچ میں ائیرفورس اور پی ڈی ایس وائٹ کی ٹیمیں مدمقابل ہوں گی۔

اگست 7, 2016
گورنر سندھ کی امریکی قونصل جنرل برائن ہیتھ سے ملاقات

کراچی: گورنر سندھ ڈاکٹر عشرت العباد خان سے امریکی قونصل جنرل برائن ہیتھ نے آج شام گورنر ہاؤس میں ملاقات کی، اس موقع پر سیاسی و اقتصادی چیف شیڈ پیٹر سن اور نئے تعینات ہونے والے سیاسی و اقتصادی چیف ایڈ ورڈ بر کھالٹر بھی موجود تھے۔

ملاقات میں امریکی قونصل جنرل برائن ہیلتھ نے گورنر سندھ ڈاکٹر عشرت العباد خان سے ان کی صحت کے بارے میں معلوما ت حاصل کی ۔گورنر سندھ نے کہا کہ ڈاکٹروں کی اجازت کے بعد انہوں نے دفتری امور کی انجام دہی بھرپور طریقے سے شروع کردی ہے، ملاقات میں پاک امریکہ تعلقات اور دوطرفہ تعاون پر بھی تفصیلی تبادلہ خیال کیا گیا ۔

گورنر سندھ نے کہا کہ وقت کے ساتھ پاک امریکہ تعلقات اتار چڑھاؤ کا شکار رہے لیکن دونوں ممالک دہشت گردی کے خلاف جاری جنگ میں ایک پیج پر ہیں اور ہر قسم کی دہشت گردی کے خاتمے کے لئے ایک دوسرے کے ساتھ ہیں ۔

انہوں نے کہا کہ آپریشن ضرب عضب کی کامیابی دنیا کے سامنے ہے، گورنر سندھ نے امریکی قونصل جنرل کوسیکیورٹی کے حوالے سے اٹھائے گئے اقدامات پر بتاتے ہوئے کہا کہ وقت کے ساتھ ساتھ صوبہ سندھ میں امن و امان میں تیزی سے بہتری آرہی ہے، انہوں نے مزید کہا کہ مقامی صنعت کاروں اور تاجروں کے ساتھ ساتھ بین الاقوامی سرمایہ کار وں کا اعتماد بحال ہو رہا ہے۔

گورنر سندھ نے سندھ ہائی کو رٹ کے چیف جسٹس کے صاحبزادے اویس شاہ کی بحفاظت بازیابی کے حوالے سے تفصیلات بتاتے ہوئے انٹیلی جنس اداروں کی کارکردگی کو سراہتے ہوئے کہا کہ اس ایک واقعہ سے قانون نافذ کرنے والے اداروں پر عوام کے اعتماد میں بے پناہ اضافہ ہوا ہے اور پوری قوم نے سیکیورٹی اداروں کی کارکردگی کی تعریف کی ہے، انہوں نے کہا کہ عوام میں احساس تحفظ کا پیدا ہونا امن و امان کے قیام کا مظہر ہے ۔

امریکی قونصل جنرل برائن ہیلتھ نے سندھ ہائی کورٹ کے چیف جسٹس کے صاحبزادے کی باحفاظت بازیابی پر مبارک باد دی اس ضمن میں پاکستانی اداروں کے ایکشن کو بھی سراہا، انہوں نے کہاکہ جیسے جیسے امن و امان کی صورتحال بہتر ہو گی سرمایہ کاربھی اس صوبہ کی استعدا د کا فائدہ اٹھانے کے لئے یہاں کا رخ کرینگے اس سلسلہ میں امریکہ کے سرمایہ کار پہلے ہی کئی منصوبوں پر کام کررہے ہیں ۔

دریں اثناء اقوام متحدہ کے ریذیڈنٹ کو آرڈینیٹر اور کے ریزیڈنٹ نمائندے نے بھی گورنر ہاؤس میں گورنر سندھ ڈاکٹر عشرت العباد خان سے ملاقات کی، ملاقات میں انہوں نے گورنر سندھ کو صحت یابی پر مبارک باد بھی پیش کی ، اس موقع پر اقوام متحدہ کے ریزیڈنٹ کو آرڈینیٹر نے پاکستان میں اقوام متحدہ کے جاری پروگرامز کے بارے میں تفصیل سے آگاہ کیا ۔

جولائی 20, 2016
گورنر سندھ کا شہر کے مختلف سرکاری اسپتالوں کا دورہ

کراچی : گورنر سندھ ڈاکٹر عشرت العباد خان نے شہر کے مختلف سرکاری اسپتالوں میں ادویات کی عد م فراہمی کے حوالے سے کہا ہے اس بات کا مکمل احساس ہے اور اسی ہی وجہ سے سرکاری اسپتالوں کے جاری منصوبوں کو بروقت پورا کیا جائے گا عباسی شہید اسپتال اور قومی ادارہ امراض قلب کراچی میں صحت کی بنیادی سہولتوں کو آ پریشنل کیا جائے گا۔

کراچی کے مختلف اسپتالوں کے ہنگامی دورئے کے بعد میڈیا سے گفتگو کررہے تھے گورنر سندھ نے بتایا کہ صوبائی حکومت سباسی شیہید اسپتال کو ادویات کے لئے فنڈ ز جاری کر دئے ہیں جبکہ قومی ادارہ امراض قلب کراچی کو ادویات اور آلات کی فراہمی بھی جلد کر دی جائے گی۔

انھوں نے کہا کہ سراکری اسپتالوں میں میں ادویات کی عدم فراہمی کی شکایادرست ہیں تاہم ان تمام مسائل پر قابو پالیا جائے گونر سندھ نے کہا کہ مٹھی کی صورت پر بھی توجہ دے رہے ہیں جبکہ گرم ترین موسم ہونے باوجو وزیر اعلی سندھ اور وزیر صحت خود مٹھی میں موجود ہیں۔

گورنر سندھ نے ٹراماسنیٹر نیپا چورنگی اور سندھ گوئمنٹ اسپتال گلدتان جوہر ،قوامی ادارہ امراض قلب کراچی، اور سندھ گورئمنٹ اسپتال نیو کراچی کا دورہ کیا۔

گورنر سندھ نے بتایا کہ ڈاو یو نیورسٹی آف ہیلتھ سائنسز نے جگر کی پیوندکاری کے تین کامیاب آپریشن کئے ہیں جبکہ جلد کینسر کے حوالے حوالے ایک بڑئے پروجیکٹ پر کام کررہے ہیں۔

مئی 18, 2016
کراچی میں بجلی کی فراہمی کا نظام مؤثر بنایا جائے، گورنر سندھ

کراچی : گورنر سندھ ڈاکٹر عشرت العباد خان نے کے الیکٹرک حکام کو ہدایت کی ہے کہ شہر میں بجلی کی فراہمی کے نظام کو مؤثر رکھنے کے لئے ترجیحی بنیادوں پر کام کریں ۔

انہوں نے کہا کہ موسم گرما میں بجلی کی فراہمی جاری رکھنے کے لئے مربوط لا ئحہ عمل ترتیب دیا جائے تاکہ اس دوران شہریوں کو بجلی کے حوالے سے کوئی پریشانی نہ ہو ۔

یہ بات انہوں نے گورنر ہاؤس میں کے الیکٹرک کے چیئر مین تابش گوہر ، سی ای او طیب ترین اور دیگر حکام سے گفتگو کرتے ہوئے کہی ۔

گورنر ڈاکٹر عشرت العباد خان نے ہدایت کرتے ہوئے کہا کہ کے الیکٹرک کو جنگی بنیادوں پر بجلی پیدا وار میں اضافہ کے لئے ہر ممکن ذرائع بروئے کار لانے ہو نگے کراچی میں جس قدر بجلی پیدا ہو گی اس قدر ترقی ممکن ہو سکتی ہے ۔

چیئر مین تابش گوہر نے گورنر سندھ کو بتایا کہ اس وقت کراچی کے65 سے 70 فیصد علاقے ایسے ہیں جہاں لوڈشیڈنگ نہیں ہو رہی ہے جبکہ کے الیکٹرک نے بجلی چور اور نا دہندہ صارفین کے خلاف ایف آئی اے کے تعاون سے مہم شروع کردی گئی ہے جس کے مثبت نتائج برآمد ہو رہے ہیں۔

مئی 21, 2015
اسماعیلی کمیونٹی کے وفد کی ڈاکٹر عشرت العباد خان سے ملاقات

کراچی : اسماعیلی کمیونٹی کے ایک وفد نے سلطان علی الانہ کی قیادت میں آج شام گورنر ہاؤس میں گورنر سندھ ڈاکٹر عشرت العباد خان سے ملاقات کی۔

اس موقع پر گورنر سندھ نے سانحہ صفوراچورنگی پر افسوس کا اظہار کرتے ہوئے اسے ایک شرمناک واقعہ قرار دیا، انہوں نے کہا کہ آج پوری قوم اشکبار ہے اور پوری قوم نے اس اندوہناک سانحہ کی مذمت کی ہے۔

انہوں نے یقین دلایا کہ جو عناصر بھی اس میں ملوث ہیں انہیں بہت جلد گرفتار کرکے کیفرکردار تک پہنچایا جائے گا انہو ں نے کہا کہ اسماعیلی کمیونٹی پاکستان میں بسنے والی پُرامن کمیونٹی ہے جس کا اعتراف برملا کیا جاتا ہے۔

انہو ں نے کہا کہ اس کمیونٹی کے ساتھ کسی کی دشمنی بعید از خیال ہے، لہذا اس کمیونٹی کے اوپر اس ظلم کی کوئی وجہ نظر نہیں آتی۔

انہو ں نے کہا کہ وفاقی و صوبائی حکومت اس بات کا تہیہ کرچکی ہے کہ اس شہر اور ملک بھر سے دہشت گردی کو یکسر ختم کرکے دم لیں گے۔

انہوں نے کہا کہ دہشت گرد پسپائی اختیار کررہے ہیں لہٰذا وہ اپنی شکست کا بدلہ لینے کیلئے معصوم لوگوں کی جان لے کر خوف کی فضا قائم کرنا چاہتے ہیں۔

گورنر سندھ نے وفد کو یقین دلایا کہ وفاقی و صوبائی حکومتیں اسماعیلی برادری کو تحفظ فراہم کرنے کے لئے ہر سطح پر اقدامات اٹھائیں گی تاکہ آئندہ اس قسم کے واقعات کا اعادہ نہ ہو ۔

دریں اثناء گورنر سندھ ڈاکٹر عشرت العباد خان نے پرنس کریم آغا خان سے ٹیلیفونک رابطہ کیا اور ان سے سانحہ پر افسوس کا اظہار کرتے ہوئے کہا کہ پوری قوم غمزدہ خاندانوں کے ساتھ ہے اور سانحہ میں ملوث عناصر کو کیفر کردار تک پہنچایا جائے گا ۔

مئی 13, 2015
مقامی حکومتوں کا قیام انتہائی نا گزیرہے، ڈاکٹرعشرت العباد خان

کراچی : گورنر سندھ ڈاکٹر عشرت العباد خان نے کہا ہے کہ مقامی حکومتیں کسی بھی جمہوریت کی بنیاد ہوتی ہیں عوام کو نچلی سطح تک فوائد پہنچانے کے لئے مقامی حکومت کا ہونا انتہائی نا گزیرہے سپریم کورٹ کے احکامات کے مطابق صوبے میں مقامی حکومتوں کے انتخابات اس سال متوقع ہیں ۔

انہوں نے کہا کہ منتخب مقامی حکومتوں کی تشکیل سے نہ صرف عوام کو فوائد حاصل ہو نگے بلکہ انفرا اسٹرکچر ڈویویلپمنٹ میں بھی تیزی آئے گی ساتھ ہی پورے صوبے میں ترقیاتی کاموں کا جال پھیل جائے گا ۔

انہوں نے کہا کہ مردم شماری نہ ہونے کی وجہ سے آبادی کا صحیح اندازہ لگانا مشکل ہے یہی وجہ ہے کہ عوام تک ضروری سہولیات فراہم کرنا مشکل ہورہا ہے ۔

انہوں نے کہا کہ مردم شماری اور ڈی لمیٹیشن سے آبادی کا نہ صرف صحیح اندازہ ہوگا بلکہ عوامی نمائندگی کا بھی معاملہ حل ہو سکتا ہے ۔ یہ بات انہوں نے گورنر ہاؤ س میں کینیڈین ہائی کمشنر سے گفتگو کرتے ہوئے کہی ۔

گورنر سندھ نے کہا کہ کراچی شہر اوسطاً آبادی سے زائد نمو حاصل کررہا ہے جس کی بنیادی وجہ پورے ملک سے لوگوں کا روزگار کے حصول کے لئے کراچی آنا ہے جہا ں اس شہر میں وسائل ہیں وہیں جرائم بھی ہیں وفاقی و صوبائی حکومتیں اور قانون نافذ کرنے ادارے یکسو ہیں کہ اس شہر سے بلا تفریق جرائم کا خاتمہ کیا جائے ۔

انہوں نے کہا کہ قانون نافذ کرنے والے اداروں کی کا وشوں سے صو رتحال میں کافی بہتری آئی ہے جس کا اعتراف ہر سطح پر کیا جارہا ہے ۔

انہوں نے کہا کہ کراچی استعداد کے لحاظ سے موزوں ترین شہر ہے جہاں کم لاگت میں کا روبار ، تجارت اور صنعت کاری کی جا سکتی ہے کیونکہ یہ پورٹ سٹی ہے اور یہاں دو بندرگاہیں بھی موجود ہیں لہذا یہاں سامان کی ترسیل و اشیاء کی برآمدگی آسان ہے۔

انہوں نے کہا کہ انفرا اسٹرکچر کا شعبہ فراہمی و نکاسی آب کے منصوبے توجہ طلب ہیں جس میں مفید سرمایہ کاری ممکن ہے جبکہ زراعت کے شعبے میں ویلیو ایڈیشن سے بھاری منافع حاصل کیا جاسکتا ہے ۔

انہوں نے کہا کہ کراچی میں صنعتوں کو بجلی کی فراہمی تسلسل سے کی جارہی ہے یہی وجہ ہے کراچی کی صنعتیں ملک کی دیگر صنعتوں سے بہتر پر فارم کررہی ہیں ۔

انہوں نے کہا کہ جیسے جیسے سیکیورٹی کے حالات میں بہتری آرہی ہے سرمایہ کار بھی اس شہر کا رخ کررہے ہیں ہماری کو شش ہے کہ غیر ملکی سرمایہ کا ر شہر کے استعداد سے بھرپور فائدہ حاصل کریں ۔

انہوں نے کہا کہ حکومت نے ملکی و غیر ملکی سرمایہ کاروں کے لئے خطے کے دیگر ممالک کے مقابلے میں سہل شرائط رکھی ہیں تاکہ سرمایہ کار بلا جھجک و خوف موزوں ترین حالات کا فائدہ حاصل کرسکیں ۔

اس موقع پر کینیڈین ہائی کمشنر نے سرمایہ کاری کے حوالے سے دلچسپی کا اظہار کرتے ہوئے کہا کہ ان کی پوری کوشش ہو گی کہ کینیڈین سرمایہ کار ان مواقع کا بھرپور فائدہ حاصل کریں ۔

مئی 6, 2015
پاکستان کی پہلی لاء یونیورسٹی شہید ذوالفقارعلی بھٹو کی افتتاحی تقریب

کراچی : گورنر سندھ ڈاکٹر عشرت العباد خان نے کہا ہے کہ بلاشبہ جامعات کو تعلیم ، علم ، حکمت اور تحقیق کا اعلیٰ ترین ادارہ سمجھا جاتا ہے یہ صرف فارغ التحصیل طالب علم ہی پیدا نہیں کرتے بلکہ فلسفہ اور ڈاکٹریٹ کے مواقع بھی فراہم کرتے ہیں تاکہ لوگ ان سے استفادہ حاصل کرسکیں اور پھر لوگوں کی رہنمائی کریں تاکہ وہ تہذیب و تمدن اور ملک کی ترقی میں اپنا نام پیدا کرسکیں اوربا مقصد زندگی گذارسکیں۔

ان خیالات کا اظہار انہوں نے پاکستان کی پہلی لاء یونیورسٹی شہید ذوالفقار علی بھٹو کلفٹن کراچی کی افتتاحی تقریب سے خطا ب میں کیا ۔

تقریب میں چیف جسٹس سندھ ہائی کورٹ فیصل عرب ، وائس چانسلر پروفیسر ڈاکٹر قاضی خالد علی ، ہائی کورٹ کے ججز صاحبان ، سابق ججز سپریم کورٹ و ہائی کورٹ ،تاجکستان کے سفیر ایچ ای شیر علی اورمشیر اعلیٰ تعلیم سید وجاھت علی سمیت دیگر قانونی ماہرین نے شریک تھے۔

گورنر سندھ نے کہا کہ میرے لئے یہ بات قابل ستائش ہے کہ آج میں ان لوگوں کے درمیان موجود ہوں جنھیں اللہ تعالیٰ نے حکمت اور تدبر دونوں عطا کی ہیں اور مجھے یہ اعزاز حاصل ہو رہا ہے کہ آج پاکستان کی پہلی جامعہ برائے قانون کا آغاز کررہا ہوں جسے شہید ذوالفقار علی بھٹو کے نام سے منسوب کیا گیا ہے اور یہ اپنی طرز کی پہلی جامعہ ہے جس میں خصوصی طور پر حکومت سندھ کی تعریف کروں گا جنہوں نے اس جامعہ کی اہمیت کو سمجھتے ہوئے اسے فوقیت دی اور یہ اعزاز بخشا کہ مختصر وقت میں اس کا آغاز ہو سکے ۔

انہوں نے کہا کہ ہر بڑے منصوبے کا آغاز اس یقین اور امید سے کیا جاتا ہے کہ اسے با مقصد بنایا جائے گا ایسی مثالیں موجود ہیں جہاں حسین شاہکار کو بناتے ہوئے تمام تر لگن اور توجہ کے ساتھ انتہائی قلیل وسائل اور نا موافق حالات میں مکمل کیا جاتا ہے اور انھیں صفر سے ابتداء کرنا پڑتا ہے ۔

انہوں نے کہا کہ مجھے خو شی ہے کہ شہید ذوالفقار علی بھٹو جامعہ برائے قانون کو ایسے لوگوں کی رہنمائی اور سرپرستی حاصل ہے جنھیں اللہ تعالیٰ نے کئی خصوصیات سے نوازا ہے جن کے پاس صلاحیت ، تجربہ ، علم اور معیار تمام چیزیں موجود ہیں ۔

مجھے یقین ہے کہ وائس چانسلر پروفیسر ڈاکٹر قاضی خالد علی کی سربراہی میں یہ ادارہ ترقی کی راہوں کو عبور کرتا ہوا ایسا مقام حاصل کرے گا جو دوسرے کے لئے نمونہ ہوگا ۔

انہوں نے کہا کہ میں ان خیالات کا اظہار کر نا چاہوں گا کہ قانون اور قانونی جامعہ کی مہذب معاشرے میں کیا اہمیت ہے زندگی کے ساتھ قانون کا بڑا گہرا رشتہ ہے یہ صرف دلائل اور عقل کی لڑائی نہیں ہے ان کا بنیادی فائدہ یہ ہے کہ یہ سچائی کے ذریعے ذہنوں کو روشن کرتا ہے اور قانون انصاف اور سچائی کے لئے کھڑا ہو تا ہے ۔

انہوں نے کہا کہ مجھے امید ہے کہ یہ جامعہ ایسے قانونی ماہرین فراہم کریگا جو قانونی ماہرین اور اعلیٰ ترین سوچ کے حامل اور قائدانہ صلاحیتوں سے آراستہ اور ذاتی مفادات سے بالاتر ہو کر سچ کو قائم کرتے ہوئے ایک خوبصورت معاشرے کی تکمیل میں مدد فراہم کرینگے۔

یہ بات بھی قابل تعریف ہے کہ اس جامعہ میں بزنس ایڈمنسٹریشن ، معاشیات ، کرمنالوجی کے شعبے بھی بنائے جارہے ہیں اس حقیقت سے کوئی انکار نہیں کرسکتا ہے کہ ہم ایک ایسی دنیا میں رہ رہے ہیں جہاں بزنس ، معاشیات اور قانون کی بالادستی ہے ۔

اپریل 9, 2015
یوم پاکستان: گورنر سندھ نے مختلف شخصیات کو اعزازات سے نوازا

کراچی : گورنرسندھ ڈاکٹر عشرت العباد خان نے آج یوم پاکستان کے موقع پر گورنر ہاؤس کے دربار ہال میں منعقد ایک پروقار تقریب میں اپنے اپنے شعبوں میں نمایاں کارکردگی دکھانے والے 27 افراد کو ستارہ امتیاز، صدارتی تمغہ برائے حسن کارکردگی اور تمغہ امتیاز دیئے۔

تقریب میں سینئر صوبائی وزیر تعلیم نثار احمد کھوڑو، ڈپٹی اسپیکر شہلا رضا، کورکمانڈر لیفٹننٹ جنرل نوید مختار ، پاک بحریہ کے کمانڈر کراچی وائس ایڈمرل عارف اللہ حسینی، پاک فضائیہ کی سدرن کمانڈ کے کمانڈر ائر وائس مارشل اظہر حسن رضوی کے علاوہ اعلیٰ حکام ، عمائدین شہر اور ایوارڈز حاصل کرنیوالوں کے اقرباء نے شرکت کی۔

چیف سیکریٹری سندھ محمد صدیق میمن نے تقریب کی نظامت کی ۔ گورنر سندھ ڈاکٹر عشرت العبادخان نے پانچ افراد کو ستارہ امتیاز، 12 افراد کو صدارتی اعزاز برائے حسن کارکردگی اور دس افراد کو صدر پاکستان کی جانب سے تمغئہ امتیاز دیا۔

تمغئہ امتیاز پانیوالوں میں پروفیسر ڈاکٹر عبد القادر مغل (تعلیم)، یوسف کمال شکیل (فن،اداری)، پروفیسر نثار احمد صدیقی (خدماتِ عامہ)، نجیب دانہ والا(خدمات عامہ)، محمد صدیق شیخ (خدمات عامہ) شامل ہیں۔

صدارتی تمغہ برائے حسن کارکردگی حاصل کرنے والوں میں ڈاکٹر رخسانہ مغل (صحت)، پروفیسر شہناز اسماعیل (بصری آرٹس، تعلیم) مہر افروز (فن، پینٹنگ)، مسمات پری (فن، فراسی بنائی)، صلاح الدین تنیو (فن، اداکاری)، عبدالکریم سولنگی (فن، مجسمہ سازی)، محمد بخش عرف نجش مھرانوی(فنون لطیفہ)، ولی رام ولبھو(ادب)، ڈاکٹر علی شوق (ادب و تعلیم)، محمد سلیم کوثر (ادب)، محمد ادریس بختیار (صحافت)، اور عقیل خان (کھیل، ٹینس) شامل ہیں۔

جب کہ تمغئہ امتیاز حاصل کرنیوالوں میں ڈاکٹر سید ریاض باقر (سائنسی تحقیق)، محمد ظفر عادل ملک (انجینئرنگ)، پروفیشر ذکریا ساجد (صحافت)، علامہ غلام رسول سعیدی (تعلیم)، پروفیسر ڈاکٹر محمد شکیل اوج شہید،بعداز وفات(تعلیم)، انواراحمد خان مرحوم ، بعد از وفات (کھیل، ھاکی)، عبدالوحید خان (کھیل، ھاکی)، نجم الثاقب حمید (سماجی خدمات)، مہتاب الدین چاؤلہ (سماجی خدمات)، اور سید عتیق الرحمان (سماجی خدمات) شامل ہیں۔

مارچ 23, 2015