Tag: ڈاکٹر کی غفلت

کراچی: شہر قائد میں ڈاکٹر کی غفلت کے باعث ڈی آئی جی ایڈمن سندھ پولیس عاصم قائمخانی کی والدہ کے انتقال پر ہیلتھ کیئر کمیشن نے نجی اسپتال سے تمام ڈیٹا طلب کر لیا۔

اے آر وائی نیوز کے مطابق گزشتہ ماہ کراچی کے ایک نجی اسپتال میں ڈاکٹر کی غفلت کے باعث ڈی آئی جی عاصم قائمخانی کی والدہ انتقال کر گئی تھیں، جس پر انھوں نے ڈاکٹروں اور اسپتال کے خلاف سندھ ہیلتھ کئیر کمیشن کو خط لکھ دیا تھا۔

خط پر سندھ ہیلتھ کئیر کمیشن حرکت میں آ گیا، کمیشن نے نجی اسپتال سے ڈی آئی جی کی والدہ کا تمام ڈیٹا طلب کر لیا ہے، اسپتال انتظامیہ سے ڈاکٹر اور عملے کی تمام تفصیلات طلب بھی کرلی گئیں۔

واقعے کی تحقیقات کے لیے ایک کمیٹی بھی تشکیل دینے کا فیصلہ کیا گیا ہے، جس میں مختلف اسپتالوں کے ماہر امراض قلب کو شامل کیا جائے گا، امراض قلب کے ماہرین کی ٹیم کی تشکیل کے بعد واقعے کی تفتیش شروع کی جائے گی۔

اس سلسلے میں این آئی سی وی ڈی اور آغا خان کے ماہرین کے لیے اسپتالوں کو خط لکھ دیا گیا ہے۔

خیال رہے کہ ڈی آئی جی کی والدہ کو معمولی پیٹ کی تکلیف پر اسپتال منتقل کیا گیا تھا، لیڈی ڈاکٹر نے دل کا دورہ بتا کر انجیوگرافی اور انجیوپلاسٹی کی، دوران علاج غفلت و لاپرواہی سے آنت کو نقصان پہنچا، ڈی آئی جی کا کہنا تھا کہ ڈاکٹر نے اس واقعے کو چھپایا، آپریشن کے چند روز بعد اچانک والدہ کی طبیعت بگڑی اور ان کا انتقال ہوگیا۔

کراچی: شہر قائد کے علاقے سولجر بازار میں واقع نجی اسپتال میں ڈاکٹر کی غفلت سے بچے کی انگلی کٹنے کا معاملہ بچے کے والد اور اسپتال انتظامیہ کے درمیان 4 لاکھ روپے میں طے ہو گیا۔

تفصیلات کے مطابق 6 ماہ کے بچے منہاج کی گزشتہ رات پٹی کاٹنے کے دوران ڈاکٹر نے انگلی ہی کاٹ دی تھی، بچے کے والد نے اسپتال اور تھانے کے باہر سخت احتجاج بھی کیا تھا، آج اسپتال انتظامیہ اور بچے کے والد کے درمیان مبینہ طور پر معاملہ 4 لاکھ روپے میں طے ہو گیا۔

ذرایع کا کہنا ہے کہ اسپتال اور متاثرہ فیملی میں بھاری رقم کے عوض معاملہ طے پایا ہے، معاوضے کے علاوہ زندگی بھر مفت علاج کی سہولت کا بھی وعدہ کیا گیا۔ دوسری طرف متاثرہ بچے کو علاج کے لیے سول اسپتال منتقل کر دیا گیا ہے۔

تفصیل یہاں پڑھیں:  ڈاکٹر کی سنگین غفلت، 6 ماہ کے بچے کو انگلی سے محروم ہونا پڑ گیا

یاد رہے کہ کراچی کے علاقے سولجر بازار میں نجی اسپتال کی انتظامیہ کی سنگین غفلت کے باعث گزشتہ رات ایک چھ سالہ بچے کو اپنی انگلی سے محروم ہونا پڑا تھا، اے آر وائی نیوز کے نمایندے کے مطابق چھ ماہ کے بچے منہاج کو اس کے والدین بیمار ہونے پر اسپتال لائے تھے، بچے کو کینولہ لگایا گیا تھا، جسے سپورٹ دینے کے لیے ایک اسٹک ہاتھ پر باندھی گئی تھی۔

بچے کے والد نے بتایا کہ بچہ ڈسچارج ہونے لگا تو ڈاکٹر اس کے ہاتھ پر بندھی پٹی کاٹ کر ہٹانے لگی، اس دوران ڈاکٹر نے غفلت کا مظاہرہ کرتے ہوئے بچے کی انگلی ہی کاٹ ڈالی۔ ڈاکٹر نے ہمیں بتایا بھی نہیں، ہمیں بعد میں پتا چلا، انھوں نے کٹی انگلی بھی پھینک دی تھی۔