لاہور: وزیر صحت پنجاب ڈاکٹر یاسمین راشد کا کہنا ہے کہ کرونا وائرس کے خلاف جنگ ڈاکٹرز اور ہم سب نے مل کر ہی لڑنی ہے۔
تفصیلات کے مطابق اے آروائی نیوز کے پروگرام سوال یہ ہے میں گفتگو کرتے ہوئے صوبائی وزیر صحت ڈاکٹر یاسمین راشد نے کہا کہ پنجاب میں لاک ڈاؤن کو 28 دن ہوچکے ہیں۔
ڈاکٹر یاسمین راشد نے کہا کہ لاک ڈاؤن کا یہی مقصد ہے کیسز کم آئیں تا کہ ہمیں مریضوں کو سنبھال سکیں،جس علاقے میں کرونا کیسز کی تعداد زیادہ ہوتی وہاں سختی کرتے ہیں،پنجاب میں جس علاقے میں کم یا کیسز نہیں ہیں وہاں نرمی کی جاتی ہے۔
انہوں نے کہا کہ کرونا کے خلاف جنگ ڈاکٹرز اور ہم سب نے مل کر ہی لڑنی ہے،ڈاکٹرز سے کہتی ہوں ڈرنا نہیں ہے مل کر مقابلہ کریں گے، حکومت نے اپنی رٹ بہت حد تک قائم کی ہوئی ہے۔
صوبائی وزیر صحت کا کہنا تھا کہ اس میں کوئی شک نہیں ہے ٹیسٹنگ بڑھائی ہے کیسز بھی بڑھیں گے،امید ہے پاکستان کے حالات یورپ جیسے نہیں ہوں گے۔
ڈاکٹر یاسمین راشد نے مزید کہا کہ بیرون ملک سے پاکستانی بھی پروازوں کے ذریعے آرہے ہیں،بیرون ملک سے آنے والے پاکستانیوں کوقرنطینہ اور ٹیسٹ کیے جا رہے ہیں۔
