برطانیہ کے شمال مغربی شہر مانچسٹر سٹی میں خوفناک ٹریفک حادثہ پیش آیا ہے، مسافروں سے بھری ڈبل ڈیکر بس پُل سے ٹکرا گئی۔
غیر ملکی میڈیا کے مطابق پُل سے ٹکرانے کے باعث ڈبل ڈیکر بس کی چھت اکھڑ گئی، جس کے نتیجے میں 15 افراد زخمی ہو گئے۔
مذکورہ بس دوپہر تقریباً 3 بجے کے قریب بارٹن روڈ اور ٹرافورڈ روڈ پر رواں دواں تھی کہ اچانک ایک 11 فٹ 6 انچ اونچے پل سے ٹکرا گئی۔ یہ پل پہلے بھی کئی بار حادثات کا باعث بن چکا ہے، جس کی وجہ اس کی کم اونچائی بتائی جاتی ہے۔
حادثے کے فوری بعد مانچسٹر پولیس، فائراینڈ ایمبولینس سروسز کے اہلکار جائے وقوعہ پر پہنچ گئے، زخمیوں کو فوری طبی امداد فراہم کی گئی، ایئرایمبولینس کو بھی طلب کرلیا گیا تھا، جائےحادثہ کے اردگرد کی شاہراہیں عام ٹریفک کیلیے بند کر دی گئیں۔
زخمیوں کو فوری طور پر مانچسٹر رائل اسپتال منتقل کیا گیا، ان میں سے 3 کی حالت انتہائی تشویشناک بتائی جا رہی ہے۔