ARYNews.tv | Urdu – Har Lamha Bakhabar

Tag: ڈرائیور

  • امارات میں کم عمر طالبہ اسکول بس کے نیچے آکر جاں بحق، ڈرائیور گرفتار

    امارات میں کم عمر طالبہ اسکول بس کے نیچے آکر جاں بحق، ڈرائیور گرفتار

    ابو ظہبی: متحدہ عرب امارات میں 12 سالہ طالبہ اسکول بس کے نیچے آکر جاں بحق ہوگئی جس کے بعد ڈرائیور کو گرفتار کرلیا گیا۔

    مقامی میڈیا رپورٹ کے مطابق عجمان میں 12 سالہ طالبہ اسکول بس کے نیچے آکر جاں بحق ہوگئی، طالبہ کا تعلق خلیجی ملک سے ہے۔

    عجمان میں محکمہ ٹریفک کے ڈائریکٹر سیف الفلاسی نے بتایا کہ بس ایک ایشیائی ڈرائیور چلا رہا تھا، طالبہ کے سر میں شدید زخم آئے تھے، بعد ازاں زخموں کی تاب نہ لا کر وہ چل بسی۔

    ڈائریکٹر کا کہنا ہے کہ طالبہ بس سے اتر کر اپنے گھر کی جانب جانے کے لیے بس کے سامنے سے گزر رہی تھی، کہ عین اسی وقت ڈرائیور نے دیکھے بغیر گاڑی چلا دی۔

    انہوں نے کہا کہ ڈرائیور کو قانونی کارروائی کے لیے حراست میں لیا گیا ہے، بس ڈرائیوروں کو ہدایت کی گئی ہے کہ وہ ٹریفک ضوابط کی پابندی اور طلبہ کی سلامتی کا خیال رکھیں۔

  • برطانیہ: کار سوار ریلوے ٹریک پر آگیا۔۔ پھر کیا ہوا؟ ویڈیو جاری

    برطانیہ: کار سوار ریلوے ٹریک پر آگیا۔۔ پھر کیا ہوا؟ ویڈیو جاری

    برطانیہ میں ایک ڈرائیور نے دل دہلا دینے والی حرکت کرتے ہوئے تیز رفتار ٹرین کے سامنے سے اپنی گاڑی گزاری، پولیس نے مذکورہ شخص کو پکڑ کر روڈ سیفٹی اور ٹریفک قوانین کا کورس کروایا۔

    یہ دل دہلا دینے والا واقعہ برطانیہ میں پیش آیا جس کی فوٹیج ٹرین پر لگے کیمرے میں ریکارڈ ہوگئی۔

    ویڈیو میں دیکھا جاسکتا ہے کہ ایک اوپن ریلوے کراسنگ پر، جس کے ارد گرد کوئی حفاظتی بیریئرز نہیں، ایک ڈرائیور تیز رفتار ٹرین آنے کے باوجود اپنی گاڑی لے کر جارہا ہے۔

    ڈرائیو نے صرف چند سیکنڈز کے فرق سے اپنی گاڑی وہاں سے گزاری جس کے بعد ٹرین تیزی سے وہاں سے گزری۔

    یہ ویڈیو برٹش ٹرانسپورٹ پولیس کو موصول ہوئی جس کے بعد انہوں نے مذکورہ ڈرائیور کو ڈھونڈ کر اس کے سامنے 2 راستے رکھے۔

    انہوں نے کہا کہ یا تو وہ پولیس کو 100 پاؤنڈز کا جرمانہ ادا کرے، یا پھر 87 پاؤنڈز کا ٹریفک قوانین اور روڈ سیفٹی آگاہی کا کورس مکمل کرے، شہری نے کورس کرنے میں عافیت جانی۔

    بعد ازاں پولیس نے یہ ویڈیو سوشل میڈیا پر جاری کی اور لوگوں کو اس حوالے سے خطرات سے کھیلنے سے باز رہنے اور محتاط رہنے کی تاکید کی۔

    پولیس کا کہنا ہے کہ ملک میں اس طرح کے 6 ہزار اوپن کراسنگ ہیں اور یہ ہماری ڈیوٹی ہے کہ ایسی گزر گاہوں کی جانچ کی جائے اور وہاں موجود ممکنہ خطرات میں کمی لائی جائے۔

  • گاڑی کی ٹوٹی لائٹ میں سے جھانکتا ہوا ہاتھ کس کا تھا؟

    گاڑی کی ٹوٹی لائٹ میں سے جھانکتا ہوا ہاتھ کس کا تھا؟

    آسٹریلیا میں ایک ٹرک ڈرائیور نے اپنے آگے جاتی گاڑی کی ٹوٹی ہوئی ریئر لائٹ کے خلا سے ایک ہاتھ جھانکتا ہوا دیکھا جس کے بعد اس نے پولیس کو اطلاع دی، پولیس نے کارروائی کر کے ڈگی میں چھپائی گئی لڑکی کو بازیاب کرلیا۔

    یہ واقعہ آسٹریلوی ریاست نیو ساؤتھ ویلز میں پیش آیا، ٹرک ڈرائیور کے آگے ایک سفید گاڑی جارہی تھی جس کی پچھلی لائٹس ٹوٹی ہوئی تھیں، اچانک ٹوٹی ہوئی لائٹ کے خلا میں سے ایک انسانی ہاتھ باہر نکلا اور کسی کومتوجہ کرنے کے انداز میں لہرایا جانے لگا۔

    ٹرک ڈرائیور نے صورتحال تشویشناک محسوس کرتے ہوئے پولیس کو اطلاع دی اور اگلے چند منٹوں میں پٹرولنگ پولیس نے مذکورہ گاڑی کو روک لیا۔

    پولیس نے گاڑی کی ڈگی کھولی تو اندر سے ایک 24 سالہ لڑکی برآمد ہوئی، اس کے چہرے اور بازوؤں پر چاقو کے وار کے نشانات تھے۔

    پیرا میڈکس اسٹاف نے موقع پر ہی لڑکی کو طبی امداد دی جس کے بعد اسے قریبی اسپتال روانہ کردیا گیا، وہاں اس کی حالت بہتر بتائی جارہی ہے۔

    پولیس نے گاڑی میں موجود 2 خواتین کو گرفتار کرلیا جن کی عمریں 24 اور 18 سال تھیں، تینوں خواتین کے درمیان کیا رشتہ ہے، اور واقعے کی وجوہات کیا تھیں، اس بارے میں پولیس نے کوئی معلومات نہیں دیں۔

    پولیس نے ٹرک ڈرائیور کا بے حد شکریہ ادا کیا اور اس کی تعریف کرتے ہوئے کہا کہ ٹرک ڈرائیور کی وجہ سے ایک ناخوشگوار واقعہ ہوتے ہوتے رہ گیا۔

  • گاڑی میں کرسی رکھ کر ڈرائیونگ کرنے والے شخص کو جرمانہ

    گاڑی میں کرسی رکھ کر ڈرائیونگ کرنے والے شخص کو جرمانہ

    کینیڈا میں ایک شخص کو کار میں ڈرائیونگ سیٹ کی جگہ فولڈنگ چیئر لگانے پر پولیس نے جرمانہ کردیا۔

    یہ واقعہ کینیڈا کے شہر اونٹاریو میں پیش آیا، جہاں پولیس نے غیر معمولی نظر آنے والی ایک کار کو روکا۔

    پولیس کا کہنا ہے کہ ڈرائیور عجیب انداز سے کار میں بیٹھا دکھائی دے رہا تھا جس پر انہوں نے اسے روکا، اندر دیکھنے پر معلوم ہوا کہ کار کی ڈرائیونگ سیٹ غائب ہے۔

    صرف یہی نہیں بلکہ ڈرائیونگ سیٹ کی جگہ کار میں لان میں رکھی جانے والی فولڈنگ چیئر فکس کی گئی تھی۔

    پولیس نے فوری طور پر مذکورہ شخص کو ٹکٹ جاری کیا اور اسے غیر محفوظ انداز میں ڈرائیونگ اور غیر مناسب سیٹ بیلٹ پر جرمانہ کیا جبکہ گاڑی کی نمبر پلیٹ اتار کر گاڑی کو بھی ضبط کرلیا گیا۔

  • کویت میں گھریلو ملازمین کے لیے ایک اور سہولت

    کویت میں گھریلو ملازمین کے لیے ایک اور سہولت

    کویت سٹی: کویتی حکام نے کویت میں کام کرنے والے گھریلو ملازمین کے لیے نئی سہولت کا آغاز کردیا۔

    مقامی میڈیا رپورٹ کے مطابق وزارت داخلہ نے گھریلو ملازمین کو ڈرائیور کے اقامے کی منتقلی کی اجازت دے دی ہے۔

    سیکیورٹی ذرائع کا کہنا ہے کہ وزارت داخلہ نے گھریلو ملازمین یا اس پیشے سے ملتی جلتی حیثیت رکھنے والے افراد کے اقاموں کو ڈرائیور کے اقامے پر منتقلی کی اجازت دے دی ہے اس سے قطع نظر کہ اس کے آبائی ملک میں ڈرائیونگ کا لائسنس جاری ہوا ہے یا نہیں۔

    ذرائع کے مطابق ڈائریکٹر جنرل ریذیڈنسی امور بریگیڈیئر جنرل حماد التوالہ نے ایک سرکلر جاری کیا جس میں کہا گیا کہ انہیں ڈرائیور کے پیشے میں گھریلو ملازمین کی منتقلی کی منظوری اور دستخط کرنے کا اختیار دیا گیا ہے۔

  • گاڑی کے ڈرائیور سے بحث و تکرار نے نوجوان کو موت کے دہانے پر پہنچا دیا

    گاڑی کے ڈرائیور سے بحث و تکرار نے نوجوان کو موت کے دہانے پر پہنچا دیا

    آسٹریلیا میں ایک نوجوان، کار ڈرائیور سے بحث کے بعد اس کے غصے اور انتقام کا نشانہ بن کر اسپتال پہنچ گیا جہاں وہ زندگی اور موت کی جنگ لڑ رہا ہے۔

    یہ واقعہ آسٹریلیا کے شہر پرتھ میں پیش آیا جو سڑک پر لگے لگے سی سی ٹی وی کیمرا میں ریکارڈ ہوگیا۔

    فوٹیج میں دیکھا جاسکتا ہے کہ نوجوان ایک گاڑی سے باہر نکلا، گاڑی میں موجود شخص اور اس کے درمیان بحث و تکرار ہوئی تھی۔

    نوجوان کے گاڑی سے اترنے کے دوران ہی ڈرائیور نے گاڑی چلا دی اور نوجوان گاڑی کے دروازے سے لٹک گیا، چند میٹر تک اسی طرح گھسٹنے کے بعد وہ زمین پر گر گیا۔

    اس کے بعد ڈرائیور نے گاڑی ریورس کی اور زمین پر گرے لڑکے پر چڑھا دی جس کے خون بہہ رہا تھا، بعد ازاں ڈرائیور موقع سے فرار ہوگیا۔

    مقامی افراد نے پیرا میڈیکس کو کال کی جنہوں نے موقع پر پہنچ کر نوجوان کو اسپتال پہنچایا۔

    پولیس کا کہنا ہے کہ نوجوان اور ڈرائیور ایک دوسرے کے شناسا تھے اور ان کے درمیان کسی بات پر بحث ہوئی۔ پولیس نے سی سی ٹی وی فوٹیج جاری کر کے لوگوں سے ڈرائیور کی شناخت میں مدد کی اپیل کی ہے۔

  • ڈرائیور کی چند لمحوں کی غفلت، چور مرسڈیز گاڑی لے اڑے

    ڈرائیور کی چند لمحوں کی غفلت، چور مرسڈیز گاڑی لے اڑے

    کینبرا: آسٹریلیا میں قیمتی مرسڈیز کار کا مالک چابی گاڑی میں چھوڑ کر چند لمحے کے لیے نیچے اترا اور اسی دوران 2 موٹر سائیکل سوار اس کی گاڑی لے کر رفو چکر ہوگئے۔

    یہ واقعہ آسٹریلیا کے شہر سڈنی میں پیش آیا جس کی سی سی ٹی وی فوٹیج جاری کردی گئی ہے۔

    فوٹیج میں دیکھا جاسکتا ہے کہ پیٹرول اسٹیشن پر مرسڈیز کا 18 سالہ مالک چابی گاڑی میں چھوڑ کر پیٹرول ڈالنے کے لیے نیچے اترا، اسی لمحے ہیلمٹ پہنا ایک شخص اس کے قریب آیا اور اسے چاقو سے دھمکانے لگا۔

    اس کے بعد وہ گاڑی کا دروازہ کھول کر اندر بیٹھ گیا جبکہ اس نے گاڑی کے مالک کو پیچھے رہنے کا حکم دیا۔

    مالک اپنی مہنگی گاڑی کو ہاتھ سے جاتا دیکھ کر ایک بار پھر دروازہ کھولنے کی کوشش کرتا ہے تبھی ایک اور ہیلمٹ پہنا ہوا شخص قریب آتا ہے اور اسے دھکا دیتا ہے۔

    اسی اثنا میں گاڑی میں بیٹھا چور گاڑی لے کر تیز رفتاری سے روانہ ہوجاتا ہے۔

    پولیس کا کہنا ہے کہ گاڑی کی مالیت 1 لاکھ 10 ہزار ڈالر ہے، مقامی پولیس نے فوٹیج کے ذریعے لوگوں سے ملزمان کو ڈھونڈنے اور ان کی شناخت میں مدد کی اپیل کی ہے۔

  • سعودی عرب میں ڈرائیور حضرات کے لیے خوش خبری

    سعودی عرب میں ڈرائیور حضرات کے لیے خوش خبری

    ریاض: سعودی عرب میں ڈرائیور حضرات کے لیے نئی سہولت متعارف کرادی گئی۔

    عرب میڈیا کی رپورٹ کے مطابق غیرقانونی طور پر گاڑی پارکنگ کی صورت میں ٹریفک اہلکار گاڑیاں تحویل میں لے لیتے ہیں ایسی صورت حال میں ڈرائیورز کو یہ پتا لگانا بہت مشکل ہوتا ہے کہ ان کی گاڑیوں کو کہاں رکھا گیا ہے۔

    انتظامیہ نے سعودی موبائل ایپلکیشن ابشر میں ایسی سہولت متعارف کرائی ہے جس کے تحت آن لائن اپنی گاڑی کی لوکیشن دریافت کی جاسکے گی، سعودی شہری یا مقیم غیر ملکی کو پہلے ابشر پر اپنے اکاﺅنٹ پر لاگ ان ہونا ہوگا۔

    اس سہولت سے فائدہ اٹھاتے ہوئے شہری پارکنگ سے اٹھائی گئی گاڑی کی لوکیشن جان سکیں گے۔ خیال رہے کہ شہری یہ شکوہ کرتے پائے جاتے ہیں کہ گاڑی پارکنگ میں کھڑی کی تھی، معلوم نہیں کس نے گاڑی اٹھائی ہے، تاہم اب اس نئی سہولت سے یہ مسئلہ حل ہوجائے گا۔

    سعودی عرب میں نیا ٹریفک قانون متعارف

    محکمہ ٹریفک نے وضاحت کی ہے کہ نہ صرف ڈرائیور کو اس طرح آسانی میسر آئے گی بلکہ تحویل میں لی گئی گاڑیوں کی تفصیلات بھی جلد ویب سائٹ پر اپلوڈ کردی جائیں گی۔

    واضح رہے کہ محکمہ ٹریفک کے 345 سینٹر قائم ہیں جہاں تحویل میں لی جانے والی گاڑیاں رکھی جاتی ہیں۔

  • ہائی وے پر دل دہلا دینے والی ڈرائیونگ، ویڈیو وائرل

    ہائی وے پر دل دہلا دینے والی ڈرائیونگ، ویڈیو وائرل

    ام القوین:‌متحدہ عرب امارات میں ہائی وے پر مخالف سمت میں تیز رفتار گاڑی چلانے والے ڈرائیور کو گرفتار کر لیا گیا۔

    خلیجی میڈیا رپورٹ کے مطابق منچلے کو ہائی وے پر کرتب دکھانا مہنگا پڑ گیا، ریاست ام القوین میں پولیس نے لاپرواہی اور لوگوں کی زندگیاں خطرے میں ڈالنے والے کار ڈرائیور کو گرفتار کر لیا۔

    پولیس کو سوشل میڈیا پر وائرل ہونے والی ایک ویڈیو موصول ہوئی جس میں ایک لاپرواہ ڈرائیور ہائی وے پر تیز رفتاری سے رانگ وے گاڑی چلا رہا تھا، یہ منظر دیکھ کر ہائی وے پر سفر کرنے والے دنگ رہ گئے اور خوف کے مارے چیخ و پکار کرنے لگے۔

    یہ ویڈیو ہائی وے پر ایک مسافر کی جانب سے بنائی گئی جس میں دیکھا جاسکتا ہے کہ کار سوار شخص مخالف سمت میں تیز رفتاری سے گاڑیوں کے بیچ سے گزر رہا ہے، یہ سڑک التحاد سے شارجہ کی جانب الحمریہ کے علاقے جاتی ہے۔

    ویڈیو میں گاڑی کی نمبر پلیٹ اور ڈرائیور کا چہرہ صاف واضح تھا، پولیس نے فوری طور پر کارروائی کرتے ہوئے ملزم کو گرفتار کر کے گاڑی ضبط کر لی اور اس کے خلاف مزید تفتیش شروع کردی گئی ہے۔

  • شہری کو سڑک پر چھینکنا مہنگا پڑ گیا، بھاری جرمانہ عائد

    شہری کو سڑک پر چھینکنا مہنگا پڑ گیا، بھاری جرمانہ عائد

    لندن: برطانوی شہری کو اس وقت لینے کے دینے پڑ گئے جب اس نے چھینکنے کے لیے وقتی طور پر گاڑی سڑک کنارے پارک کی۔ ڈرائیور پر بھاری جرمانہ عائد ہوگیا۔

    غیرملکی خبررساں ادارے کی رپورٹ کے مطابق صرف 26 سیکینڈ کے لیے سڑک کنارے گاڑی کھڑی کرنے پر شہری کو 100 پاؤنڈ جرمانہ ادا کرنا پڑا۔ ڈرائیور کا کہنا ہے کہ اسے شدت سے چھینک آرہی تھی اسی لیے اس نے گاڑی ایک طرف پارک کی اور چھینکنے کے بعد واپس چلتا بنا۔

    یہ واقعہ برطانیہ کے علاقے اٹلیبورو میں پیش آیا۔ 37 سالہ شخص نے بتایا کہ وہ اپنی دوست کو لے کر اپنی منزل مقصود کی طرف جارہا تھا کہ اچانک مجھے چھینک آئی، میں نے کسی ناگہانی صورت حال یا حادثے سے بچنے کے لیے کار سائیڈ میں پارک کرکے چھینکا اور پھر آرام سے چلا گیا۔

    بیٹی کو مرنے سے بروقت کیوں بچایا؟ باپ پر جرمانہ عائد

    تاہم سڑک پر نصب کیمرے کی مدد سے میری شناخت نکالی گئی اور سو پاؤنڈ کا جرمانہ عائد کردیا گیا۔ ڈرائیور کا کہنا تھا کہ میں نے اپنے اور دوسرے کے بھلے کے لیے ایسا کیا، تاکہ چھینک آنے پر گاڑی کا کنٹرول نہ چھوٹ جائے جو حادثے کا سبب بنے، مذکورہ جرمانہ مضحکہ خیز ہے۔

    شہری نے یہ بھی بتایا کہ اس نے اس جرمانے کے خلاف متعلقہ ادارے میں اپیل بھی دائر کی ہے۔