جارجیا: امریکا میں تقریباً سوا سال قبل دریافت ہونے والی ایک ڈوبی کار سے برآمد انسانی باقیات 1976 سے لاپتا طالب علم کی نکل آئی۔
امریکی میڈیا کے مطابق امریکی ریاست جارجیا میں تفتیش کاروں نے آخر کار اطمینان کا سانس لے لیا ہے، جو الاباما کریک میں ایک ڈوبی کار سے برآمد ہونے والی انسانی باقیات سے متعلق تحقیق کر رہے تھے۔
تفتیش کاروں نے معلوم کیا ہے کہ انسانی باقیات کی شناخت 1976 سے لاپتا طالب علم کے طور پر ہوئی ہے، یہ ایک 22 سالہ نوجوان تھا جو 45 سال سے زیادہ عرصے سے لاپتا تھا۔
ٹروپ کاؤنٹی پولیس کے مطابق بائیس سالہ کائل ویڈ کلنک اسکیلز کو آخری بار 27 جنوری 1976 کو جارجیا کے شہر لاگرینج میں موس کلب پر دیکھا گیا تھا، ٹروپ کاؤنٹی شیرف کے دفتر نے کہا کہ اس کے بعد طالب علم وہاں سے الاباما کی اوبرن یونیورسٹی جانے کے لیے روانہ ہو گیا تھا۔
پولیس حکام کے مطابق الاباما جاتے ہوئے کائل ویڈ کلنک اسکیلز لا پتا ہو گیا، اور اس کی گم شدگی 8 دسمبر 2021 تک ایک معمہ بنی رہی، کسی کو پتا نہیں چلا کہ وہ کہاں غائب ہوا، آٹھ دسمبر کو اس کی کار ’پنٹو رناباؤٹ‘ الاباما کی چیمبرز کاؤنٹی میں ڈوبی مل گئی۔
جب کار کو کریک سے نکال کر دیکھا گیا تو گاڑی پر 1976 کا ٹیگ لگا تھا اور ٹروپ کاؤنٹی کا ایک اسٹیکر بھی، جب گاڑی کی شناخت کے نمبر (وی آئی این) کا تعین ہو گیا تو یہ بھی معلوم ہو گیا کہ گاڑی کلنک اسکیلز کی ہے۔
پولیس کا کہنا تھا کہ جب گاڑی پانی سے نکالی گئی تو اس میں انسانی ڈھانچے کی باقیات اور دیگر ذاتی سامان موجود تھا، جس پر حکام نے انھیں شناخت اور جانچ کے لیے جارجیا بیورو آف انویسٹی گیشن کرائم لیب کو بھیجا۔
اور آخر کار 19 فروری کو نتائج نے ثابت کیا کہ ڈھانچے کی باقیات کلنک اسکیلز کی ہیں، تاہم ابھی تک یہ نہیں معلوم ہو سکا ہے کہ اس کی موت کیسے واقع ہوئی تھی۔
