ARYNews.tv | Urdu – Har Lamha Bakhabar

Tag: ڈوب گئی

  • کراچی: سی ویو کے قریب کشتی الٹ گئی، فیصل ایدھی سمیت 6 افراد کو بچا لیا گیا

    کراچی: سی ویو کے قریب کشتی الٹ گئی، فیصل ایدھی سمیت 6 افراد کو بچا لیا گیا

    کراچی: شہر قائد میں سی ویو کے قریب ایدھی کے کشتی الٹ گئی، فیصل ایدھی سمیت 6 افراد کو بچا لیا گیا۔

    تفصیلات کے مطابق پاکستان کے معروف فلاحی ادارے ایدھی فاؤنڈیشن کے سربراہ فیصل ایدھی کی کشتی سی ویو کے قریب الٹ گئی، کشتی میں سوار فیصل ایدھی سمیت 6 افراد کو ریسکیو کر لیا گیا۔

    فیصل ایدھی اور دیگر افراد کو قریب موجود ماہی گیروں نے ریسکیو کیا،فیصل ایدھی پانی میں ڈوبے ایک شخص کی تلاش کے لیے گئے تھے۔

    ایدھی فاؤنڈیشن کے سربراہ فیصل ایدھی اور دیگر افراد کو ابراہیم حیدری جیٹی منتقل کیا جا رہا ہے۔

    فیصل ایدھی کرونا وائرس سے صحت یاب ہوگئے

    یاد رہے 21 اپریل کو ایدھی فاؤنڈیشن کے سربراہ فیصل ایدھی میں کرونا کی تشخیص ہوئی تھی،ان کا ٹیسٹ شفا انٹرنیشنل اسپتال اسلام آباد میں کیا گیا تھا، جس کے بعد فیصل ایدھی نے خود ٹیسٹ پازیٹو آنے کی تصدیق کی تھی اور قرنطینہ میں چلے گئے تھے۔

    بعدازاں 6 مئی کو ایدھی فاؤنڈیشن کے سربراہ فیصل ایدھی کی کرونا ٹیسٹ رپورٹ منفی آگئی تھی۔

  • انڈونیشیا میں کشتی ڈوبنے سے 8 افراد ہلاک

    انڈونیشیا میں کشتی ڈوبنے سے 8 افراد ہلاک

    جکارتہ: انڈونیشیا کے جزیرے بورنو کے سمندر میں کشتی ڈوبنے سے کم از کم 8 افراد ہلاک جبکہ متعدد لاپتہ ہوگئے۔

    تفصیلات کے مطابق آنوگرا ایکسپریس نامی کشتی شمالی کالیمنٹان کے صوبائی دارالحکومت تانجنگ سے سیلور سے تاراکان جارہی تھی کہ حادثہ پیش آیا۔

    ریسیکو حکام کے مطابق بچوں سمیت 48 افراد کے علاوہ عملے کے تین ارکان بھی کشتی میں سوار تھے جن میں 8 افراد کی لاشیں نکال لی گئی ہیں جبکہ دیگر کی تلاش جاری ہے۔

    انڈونیشین پولیس نے حادثے کی وجوہات جاننے کے لیے تفتیش کا آغاز کردیا ہے تاہم ابھی تک حادثے کی وجہ معلوم نہیں ہوسکی۔

    خیال رہے کہ گزشتہ سال جولائی میں تانجنگ سیلور جاتے ہوئے کشتی ڈوبنے سے 8 افراد ہلاک ہوگئے تھے۔

    یاد رہے کہ گزشتہ سال یکم جنوری 2017 کو سیاحوں کی کشتی کو پیش آنے والے حادثے میں 23 افراد ہلاک ہوگئے تھے۔

    برازیل میں کشتی ڈوب گئی،22افرادہلاک

    واضح رہے کہ 25 اگست 2017 کو برازیل میں باہیا کے ساحلی شہر کے قریب کشتی الٹنے سے 22 افراد ہلاک جبکہ درجنوں لاپتہ ہوگئے تھے۔

    اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس  وال پر شیئر کریں۔

  • دریائے راوی میں کشتی الٹ گئی، درجنوں افراد لاپتہ

    دریائے راوی میں کشتی الٹ گئی، درجنوں افراد لاپتہ

    لاہور: دریائے راوی میں ننکانہ صاحب کے قریب کشتی الٹ گئی۔ کشتی میں تقریباً ڈیڑھ سو افراد سوار تھے۔ لوگوں کو بچانے کے لیے ریسکیو ٹیموں کی امدادی سرگرمیاں جاری ہیں۔

    تفصیلات کے مطابق دریائے راوی میں بدقسمت کشتی الٹ گئی۔ کشتی میں 40 افراد کی گنجائش تھی لیکن کشتی میں ڈیڑھ سو کے قریب افراد سوار تھے۔

    حادثے کی اطلاع ملتے ہی ریسکیو ٹیموں نے جائے وقوعہ پر پہنچ کر امدادی کام شروع کردیا۔ اطلاعات کے مطابق اب تک 40 سے 45 افراد کو بچا لیا گیا ہے جبکہ مزید افراد کی تلاش کا کام جاری ہے۔

    کشتی سیداں والا سے اوکاڑہ کے گاؤں جندراکہ جارہی تھی۔ حادثے میں بچ جانے والے ایک شخص نے اے آر وائی نیوز سے بات کرتے ہوئے بتایا کہ کشتی پر 50 کے قریب خواتین بھی سوار تھیں۔ متاثرہ شخص کا کہنا تھا کہ کشتی دریا میں ایک ڈبے سے ٹکرائی اور الٹ گئی۔

    کشتی پر سامان، مویشی، موٹر سائیکلیں بھی لادی گئیں تھیں۔ کشتی کے مالک نے گنجائش سے دو گنا زائد افراد کو سوار کیا تھا۔

  • لیبیامیں تارکین وطن کی کشتی الٹ گئی‘100کےقریب افراد لاپتہ

    لیبیامیں تارکین وطن کی کشتی الٹ گئی‘100کےقریب افراد لاپتہ

    طرابلس : لیبیامیں تارکینِ وطن کی کشتی الٹ گئی،جس کےنتیجے میں ہلاک ہونے والےآٹھ افراد کی لاشوں کو نکال لیاگیاہےجبکہ 100 کے قریب افراد کے لاپتہ ہونے کا خدشہ ظاہر کیا جا رہا ہے۔

    تفصیلات کےمطابق لیبیا کے ساحل کے قریب بحیرہ روم میں تارکینِ وطن کی کشتی الٹنے کے نتیجے میں اس میں سوار 100 کے قریب افراد کے لاپتہ ہونے کا خدشہ ظاہر کیا جا رہا ہے۔

    اطالوی کوسٹ گارڈز کا کہناہےکہ سمندر میں ڈوبنے والے آٹھ افراد کی لاشوں کو نکالاجاچکاہےجبکہ چار افراد کو زندہ بچالیاگیاہے۔تارکین وطن کی کشتی اٹلی اور لیبیا کے درمیان لیبیا کے ساحل سے 50 کلومیٹر دورسمندر میں الٹ گئی تھی۔

    یاد رہےکہ دو روز قبل بحیرہ روم میں سفر کرنے والے 550 تارکین وطن کو اٹلی کے کوسٹ گارڈز نے زندہ بچایا تھا۔

    مزید پڑھیں: تارکین وطن کی کشتی الٹ گئی،41افراد جاں بحق

    اس سے قبل گزشتہ سال جولائی میں لیبیا کے ساحل کے قریب تارکین وطن کی کشتی الٹنے سے 41 افراد ہلاک جان کی بازی ہار گئےتھے،تارکین وطن کی بڑی تعداد سمندری راستےکےذریعے یورپی ممالک کی طرف ہجرت کررہی تھی.

    واضح رہےکہ یو این ایچ سی آر کا کہنا ہےکہ گذشتہ برس پانچ ہزار افراد سمندر کے راستے یورپ جانے کی کوشش میں ہلاک ہوئے تھے۔

  • ڈھاکہ: دریا میں کشتی ڈوبنے سے 14 افراد ہلاک

    ڈھاکہ: دریا میں کشتی ڈوبنے سے 14 افراد ہلاک

    ڈھاکہ: بنگلہ دیش کے جنوبی حصے سے گزرنے والے دریا میں مسافر کشتی الٹنے کےباعث 14 افراد ہلاک اور درجنوں لاپتہ ہوگئے۔

    تفصیلات کے مطابق بنگلہ دیش کے جنوبی ضلع باریسال کے مقام پر دریا میں ہونے والے حادثے میں متعدد افراد نے اپنی مدد آپ کے تحت جان بچائی۔

    ضلع کے پولیس چیف محمد اختر الزماں کے مطابق کشتی میں تقریبا 70 سے 80 کے درمیان افراد سوار تھے۔ان کا کہنا تھا کہ اب تک ہم نے دریا سے 14 افراد کی لاشیں نکالی ہیں جن میں بچے اور خواتین بھی شامل ہیں جبکہ متعدد افراد اب بھی لاپتہ ہیں۔

    پولیس افسر کا کہنا تھا کہ مذکورہ کشتی کے ڈرائیور کی نشاندہی پر متاثرہ کشتی کو کھینچ کر کنارے پر لایا گیا۔

    انہوں نے کہا کہ جس وقت کشتی کو حادثہ پیش آیا اس وقت ایک اور کشتی اس کے قریب سے گزر رہی تھی جس نے لوگوں کو دریا سے نکالنے میں مدد فراہم کی۔

    یاد رہے کہ بنگلہ دیش میں یومیہ ہزاروں کی تعداد میں لوگ کشتی کے ذریعے سفر کرتے ہیں اور مذکورہ کشتیوں کی خستہ حالی کے باعث ہر سال سیکٹروں لوگ ڈوب کر ہلاک ہوجاتے ہیں۔

    واضح رہے کہ گزشتہ سال فروری میں بنگلہ دیش کے وسطی علاقے میں کشتی کو پیش آنے والے حادثے میں 69 افراد ہلاک ہوگئے تھے۔