لاہور : سپریم کورٹ نے ڈپٹی اسپیکر کی رولنگ کے خلاف درخواست کی سماعت کے تحریری حکم نامے میں کہا ہے کہ بظاہر معاملہ کافی پیچیدہ لگتا ہے ، امید کرتے ہیں تمام فریقین اپنی قیمتی رائے سے عدالت کی معاونت کریں گے۔
تفصیلات کے مطابق سپریم کورٹ نے ڈپٹی اسپیکر رولنگ کے خلاف درخواست پر آج کی سماعت کا تحریری حکم نامہ جاری کردیا۔
جس میں کہا ہے کہ عدالت کو ڈپٹی اسپیکر سے مناسب معاونت کی توقع ہے، 63اے کے تحت جمہوری پارلیمانی پارٹی نےطے کرنا ہےکہ کس کوووٹ دیا جائے۔
حکم نامے میں کہا گیا ہے کہ ڈپٹی اسپیکر نے اپنی رولنگ میں کہا کہ پارٹی سربراہ کی ہدایت کے مطابق ووٹ دیا جائے، ڈپٹی سپیکر نے عدالتی فیصلے کے پیراگراف 3پر انحصار کیا۔
ڈپٹی اسپیکر کی رولنگ کے خلاف ابتدائی سماعت کے تحریری حکم نامے میں کہا کہ ڈپٹی اسپیکر دوست مزاری ریکارڈ سمیت آج عدالت میں پیش ہوں ، ڈپٹی اسپیکر نے اپنی رولنگ میں لارجر بینچ کا حوالہ دیا لیکن اس پیراگراف کو پوائنٹ نہیں کیا جس کا حوالہ دیا گیا۔
سپریم کورٹ کا کہنا ہے کہ بظاہر معاملہ کافی پیچیدہ لگتا ہے ، امید کرتے ہیں تمام فریقین اپنی قیمتی رائے سے عدالت کی معاونت کریں گے۔
تحریری حکم نامے میں کہا کہ سوال یہ ہےکہ عدالتی فیصلہ کیا یہ کہتا ہے جو ڈپٹی اسپیکر نے رولنگ میں کہا ہے۔
