ARYNews.tv | Urdu – Har Lamha Bakhabar

Tag: ڈکیت

  • ڈکیتوں سے موبائل فون خرید کر فروخت کرنے والا گروہ گرفتار

    ڈکیتوں سے موبائل فون خرید کر فروخت کرنے والا گروہ گرفتار

    کراچی: صوبہ سندھ کے دارالحکومت کراچی میں پولیس نے سافٹ ویئر انجینیئر سمیت 4 ملزمان کو گرفتار کرلیا، ملزم ڈکیتوں سے بلاک موبائل فون خرید کر کھلوا کر فروخت کرنے میں ملوث تھے۔

    تفصیلات کے مطابق کراچی کے علاقے بلال کالونی میں پولیس نے کارروائی کرتے ہوئے سافٹ ویئر انجینیئر سمیت 4 ملزمان کو گرفتار کرلیا۔

    پولیس کا کہنا ہے کہ ملزمان نے ڈسٹرکٹ سینٹرل اور ویسٹ میں 100 سے زائد وارداتوں کا اعتراف کیا ہے، ملزمان کے نام ندیم، غفور، آصف اور شانی ہیں جن کے خلاف مقدمات درج کرلیے گئے۔

    پولیس کے مطابق ملزمان سے اسلحہ، کمپیوٹر، لیپ ٹاپ، موبائل فونز اور موٹر سائیکل برآمد کیے گئے۔

    پولیس کی حراست میں ملزم ندیم نے اعتراف کیا کہ وہ بلاک موبائل کھلوانے کے 1 ہزار اور ای ایم ای آئی تبدیلی کے 5 ہزار دیتا تھا، ملزم شانی نے بتایا کہ وہ ڈکیتوں سے 15 سے 20 ہزار میں موبائل فون خریدتا تھا۔

  • گروسری اسٹور کا مالک ڈاکوؤں کے لیے مصیبت بن گیا، ویڈیو وائرل

    گروسری اسٹور کا مالک ڈاکوؤں کے لیے مصیبت بن گیا، ویڈیو وائرل

    بہار: بھارتی شہر دربھنگہ میں ایک گروسری اسٹور کا مالک 6 ڈاکوؤں کے آگے دیر تک مزاحمت کرتا اور گلّے کے آگے جم کر کھڑا رہا، جس پر اسے ڈاکوؤں کے ہاتھوں تشدد کا سامنا کرنا پڑا۔

    بھارتی میڈیا رپورٹس کے مطابق ریاست بہار کے بڑے شہر دربھنگہ میں ہفتے کی رات 6 نقاب پوش بدمعاشوں نے جوالا مکھی گروسری اسٹور سے 12 لاکھ روپے لوٹنے کی واردات کی، اس واقعے کی سی سی ٹی وی فوٹیج بھی سامنے آئی ہے، جو سوشل میڈیا پر تیزی سے وائرل ہو گئی۔

    فوٹیج میں دیکھا جا سکتا ہے کہ دکان دار، جس کا نام رادھے شیام جھا معلوم ہوا ہے، ڈاکوؤں کے سامنے تقریباً ڈیڑھ منٹ تک مزاحمت کرتا رہا، وہ درازوں کے سامنے جم کر کھڑا ہو گیا تھا، جن میں لاکھوں روپے رکھے ہوئے تھے۔

    ڈاکو کافی دیر تک اسے وہاں سے ہٹانے کی کوشش کرتے رہے، اس دوران لٹیروں نے اس کی زبردست پٹائی بھی کی، ایک موقع پر ڈاکو نے اس پر کرسی بھی اٹھا کر دے ماری، لیکن وہ پھر بھی گلّے کے سامنے سے نہیں ہٹا۔

    آخر کار ڈاکوؤں نے اسے قابو کر کے گلّے سے ہٹایا، ایک نے اسے ٹانگ سے پکڑ لیا، لیکن ایک موقع پر جب دوسرے ڈاکو نے اسے چھوڑا تو وہ ایک ٹانگ پر ایک بار پھر گلّے کی صفائی کرنے والے پر جھپٹا۔

    دکان دار نے مزاحمت تو بہت کی لیکن وہ 12 لاکھ کی رقم لٹنے سے بہ بچا سکا، تشدد سے وہ زخمی بھی ہوا جس پر اسے طبی امداد کے لیے اسپتال بھی لے جایا جانا پڑا۔

  • کراچی: 200 وارداتیں کرنے والا انتہائی مطلوب ڈکیت گرفتار

    کراچی: 200 وارداتیں کرنے والا انتہائی مطلوب ڈکیت گرفتار

    کراچی: صوبہ سندھ کے دارالحکومت کراچی میں رینجرز اور پولیس کی مشترکہ کارروائی میں 200 وارداتیں کرنے والا انتہائی مطلوب ڈکیت گرفتار کرلیا گیا۔

    تفصیلات کے مطابق کراچی کے علاقے پٹیل پاڑہ میں رینجرز نے پولیس کے ساتھ مشترکہ کارروائی کی، کارروائی میں انتہائی مطلوب ڈکیت عقیل عرف کسوڑا گرفتار کرلیا گیا۔

    ترجمان رینجرز کا کہنا ہے کہ گرفتار ملزم 200 سے زائد وارداتوں میں ملوث ہے، گرفتار ملزم سے چوری شدہ موٹر سائیکل بھی برآمد کی گئی۔

    ترجمان کے مطابق ملزم نے اپریل میں پی ای سی ایچ ایس سوسائٹی میں شہری سے لوٹ مار کی، واردات کی سی سی ٹی وی فوٹیج میں ملزم کو دیکھا جا سکتا ہے۔

    ترجمان کا مزید کہنا ہے کہ ملزم کے ساتھیوں کی گرفتاری کے لیے بھی چھاپے مارے جا رہے ہیں۔

  • اسکول کے بچے ڈکیت بن گئے، موبائل چھیننے کی کوشش

    اسکول کے بچے ڈکیت بن گئے، موبائل چھیننے کی کوشش

    برمنگھم: برطانیہ میں اسکول طالب علموں کے گروہ نے موبائل اور سائیکل چھیننے کی کوشش میں 12 سالہ بچے کو لہولہان کردیا۔

    غیرملکی خبررساں ادارے کی رپورٹ کے مطابق گروہ نے ڈکیتی کے دوران بارہ سالہ اسکول طالب علم کو بہیمانہ تشدد کا نشانہ بناتے ہوئے ناک اور منہ بری طرح زخمی کردیا جس کے باعث بچے کا جسم خون میں رنگ گیا۔

    رپورٹ میں کہا گیا ہے کہ یہ واقعہ برطانوی شہر برمنگھم میں پیش آیا، اسکول طالب علموں پر مشتمل گروہ نے بچے سے موبائل اور سائیکل چھیننے کی کوشش کی جبکہ مزاحمت پر تشدد کا نشانہ بنایا گیا۔

    میکنزی نامی طالب علم کی ماں نے سوشل میڈیا پر اپنے زخمی بچے کی تصویر شیئر کرتے ہوئے متعلقہ اداروں سے اپیل کی کہ انہیں فوری طور پر انصاف فراہم کیا جائے۔ ماں کا کہنا تھا کہ ملزمان نے میرے بیٹے کا پیچھا کیا اور موقع دیکھ کر واردات کی کوشش کی، انہیں زرا بھی رحم نہ آیا۔

    برطانیہ میں چاقو زنی کی واردات نہ رکی، آج ایک اور شخص ہلاک

    خاتون نے بتایا کہ حملہ آوروں کی عمریں 9 اور 10 سال کے درمیان تھیں جو بظاہر اسکول کے طالب علم ہی لگ رہے تھے، اس واقعے کے دوران میرے بچے کے دوست بھی موجود تھے۔ ماں نے پولیس سے اپیل کی ہے کہ انہیں فوری طور پر انصاف فراہم کیا جائے بصورت دیگر وہ اس کے خلاف بڑے پیمانے پر آواز اٹھائیں گی۔

  • گزشتہ شام لاہور شہر گھر لوٹنے والوں کے نرغے میں رہا

    گزشتہ شام لاہور شہر گھر لوٹنے والوں کے نرغے میں رہا

    لاہور: پاکستان کے دل کو ڈکیتوں نے گھیر لیا، گزشتہ شام لاہور شہر گھر لوٹنے والوں کے نرغے میں رہا۔

    تفصیلات کے مطابق لاہور شہر میں گزشتہ روز سر شام ہی کئی گھر لوٹ لیے گئے، ڈکیت آزادانہ کارروائیاں کر کے فرار ہو گئے، پولیس بے بس ہو گئی۔

    اے آر وائی نیوز کے مطابق لاہور کے علاقے لیاقت آباد میں شبیر نامی شہری کی فیملی کے ساتھ واردات ہوئی، مانگا منڈی میں ماجد نامی شہری کا گھر لوٹ لیا گیا، گلشن راوی میں مجید نامی شہری جب کہ موچی گیٹ میں محمود نامی شہری کے گھروں کا صفایا کیا گیا۔

    پولیس رپورٹ کے مطابق لاہور کے علاقے مغل پورہ میں فراز، چوہنگ میں بشیر کے گھروں میں ڈاکے ڈالے گئے، گڑھی شاہو میں اعجاز نامی شہری کی فیملی کے ساتھ واردات ہوئی، جب کہ مسلم ٹاؤن، جنوبی چھاؤنی اور شفیق آباد میں گاڑیاں چوری کی گئیں۔

    لاہور میں ڈکیتی اور راہزنی کی وارداتوں میں اضافہ، وجہ سامنے آ گئی

    پولیس کا کہنا ہے کہ لاہور کے علاقوں نواب ٹاؤن، ریس کورس، سرور روڈ، نو لکھا، مستی گیٹ، لار ی اڈہ اور دیگر کئی علاقوں سے موٹر سائیکلیں چوری کی گئی ہیں۔

    یاد رہے کہ گزشتہ روز ہی اے آر وائی نیوز کے نمایندے نے رپورٹ دی تھی کہ پنجاب حکومت اب تک 5 آئی جی تبدیل کر چکی ہے، پولیس کے افسران میں بھی بڑے پیمانے پر اکھاڑ پچھا ڑ کی گئی ہے، تاہم صوبائی دارالحکومت لاہور میں جرائم بڑھتے ہی جا رہے ہیں، نمایندے کے مطابق لاہور میں ڈکیتی اور راہزنی کی 30 سے 40 وراداتیں روز کا معمول بن گئی ہیں۔

  • چونیاں: گھر میں گھسنے والے ڈاکوؤں کی درگت بن گئی

    چونیاں: گھر میں گھسنے والے ڈاکوؤں کی درگت بن گئی

    چونیاں: پنجاب کے تاریخی شہر چونیاں میں لوٹ مار کے لیے ایک گھر میں گھسنے والے ڈاکوؤں کی مراد بر نہیں آئی، الٹا ان کی دُرگت بن گئی۔

    تفصیلات کے مطابق چونیاں کے علاقے الہ آباد کے نواحی گاؤں میں ایک گھر میں گھسنے والے تین ڈاکو اہل محلہ کے ہتھے چڑھ گئے، علاقہ مکینوں نے ڈاکوؤں کی درگت بنا کر پولیس کے حوالے کر دیا۔

    تین ڈاکوؤں نے گاؤں کے رہایشی مقصود کے گھر میں گھس کر اہل خانہ کو یرغمال بھی بنا لیا تھا تاہم گھر والوں نے شور مچا دیا، جسے سن کر علاقہ مکین اکھٹے ہو گئے۔

    محلے والوں نے ڈاکوؤں کو پکڑ کر زد و کوب کیا، تشدد کے بعد ڈاکوؤں کو پولیس کے حوالے کر دیا گیا، پولیس حکام کے مطابق ملزمان کو طبی امداد کے لیے اسپتال منتقل کر کے مزید تفتیش شروع کر دی گئی ہے۔

    یہ بھی پڑھیں:  سانحہ چونیاں کے ملزم سہیل شہزاد نے ایک اور بچے کے قتل کا اعتراف کر لیا

    یاد رہے کہ ستمبر 2019 میں قصور کی تحصیل چونیاں میں ویران جگہ سے لا پتا بچوں‌ کی مسخ شدہ لاشیں برآمد ہوئی تھیں، اس کیس کے منظر عام پر آنے کے بعد پورے ملک میں سنسنی پھیل گئی تھی، بچوں کی لاشوں میں سے ایک لاش مکمل جب کہ دو کے صرف اعضا اور ہڈیاں ملی تھیں، وزیر اعظم عمران خان نے واقعے کا نوٹس لیتے ہوئے غفلت برتنے پر ڈی ایس پی اور ایس ایچ او کو معطل اور ڈی پی او قصور کو عہدے سے ہٹا دیا تھا۔

    بعد ازاں 26 ستمبر کی رات تفتیشی ٹیم نے جیو فرانزک کی مدد سے پنجاب کے علاقے رحیم یار خان میں کارروائی کرتے ہوئے ایک شخص کو گرفتار کیا تھا، جس کی شناخت سہیل شہزاد کے نام سے ہوئی تھی۔ سہیل نے تفتیش کے دوران مختلف اوقات میں مجموعی طور پر 5 بچوں کے قتل کا اعتراف کیا تھا۔

  • اسلام آباد پولیس نے 9 ماہ میں 8 ہزار سے زائد ملزمان گرفتار کر لیے

    اسلام آباد پولیس نے 9 ماہ میں 8 ہزار سے زائد ملزمان گرفتار کر لیے

    اسلام آباد: وفاقی دارالحکومت کی پولیس نے 9 ماہ کی کارکردگی رپورٹ جاری کر دی، اس دوران مختلف جرائم میں ملوث 8623 ملزمان کو گرفتار کیا گیا۔

    اسلام آباد پولیس کے ترجمان کے مطابق نو ماہ کے دوران آٹھ ہزار سے زاید ملزمان کو گرفتار کیا گیا، جن میں میں 1084 اشتہاری ملزمان بھی شامل ہیں۔

    ملزمان سے کروڑوں کا مال مسروقہ بھی برآمد کیا گیا، ڈکیتیوں اور سرقہ بالجبر کے 512 ملزمان گرفتار کیے گئے، نقب زنی اور چوری میں ملوث 582 ملزمان گرفتار کیے گئے۔

    ترجمان کے مطابق 109 کار چور گرفتار کیے گئے اور ان سے 131 گاڑیاں برآمد کی گئیں، موٹر سائیکل چوری میں بھی ملوث 168 ملزمان کو گرفتار کیا گیا۔

    یہ بھی پڑھیں:  منشیات اسمگلروں کے خلاف کارروائی، اے این پی رہنما کے بیٹوں سمیت 6 گرفتار

    پولیس ترجمان نے بتایا کہ منشیات اور شراب فروشوں کے خلاف بھی مؤثر کریک ڈاؤن کیا گیا، جس میں 1070 منشیات و شراب فروشوں کو گرفتار کیا گیا، اور 314 کلو چرس، 41 کلو ہیروئن، 7 کلو سے زاید افیون برآمد کیا گیا۔

    یاد رہے کہ رواں ماہ اسلام آباد میں اینٹی نارکوٹکس فورس (اے این ایف) نے منشیات کے اسمگلروں کے خلاف کارروائی کرتے ہوئے اے این پی رہنما کے بیٹوں سمیت 6 ملزمان گرفتار کر لیے تھے۔

    ملزمان کو 3 گاڑیوں میں منشیا ت کے ساتھ گرفتار کیا گیا تھا، یہ کارروائی موٹر وے ٹول پلازہ کے قریب خفیہ اطلاع پر کی گئی تھی۔

    ذرایع نے بتایا تھا کہ کارروائی میں ضلع خیبر کے اے این پی رہنما عمران آفریدی کے 2 بیٹے کامران اور عرفان کو گرفتار کیا گیا۔

  • عید قرباں قریب آتے ہی ڈکیت سرگرم، مویشیوں کی لوٹ مار کا ایک اور واقعہ

    عید قرباں قریب آتے ہی ڈکیت سرگرم، مویشیوں کی لوٹ مار کا ایک اور واقعہ

    کراچی: عید قرباں قریب آتے ہی ڈکیت سرگرم ہوئے، مویشیوں کو لوٹنے کے واقعات میں‌ اضافہ ہوگیا.

    تفصیلات کے مطابق گزشتہ سال کی طرح امسال بھی عید الاضحیٰ قریب آتے ہی لوٹ مار کا سلسلہ شروع ہوگیا ہے. گلشن معمارکےقریب 12 ڈاکو کیٹل فارم سے قربانی کےجانورلوٹ کر لے گئے۔ْ واردات پوری تیاری سے کی گئی.

    مسلح ڈکیتوں نے اسلحے کے زور پر عملے کو یرغمال بنایا، فارم کے سیکورٹی گارڈ سے اسلحہ چھین لیا، کیٹل فارم کے5 ملازمین کو باندھ کر خوب زدکوب کیا.

    بعد ازاں ڈکیت قربانی کے 16 جانور دو بڑے ٹرکوں میں بھر کر سہولت سے فرار ہوگئے، ڈاکوؤں نے کیٹل فارم کے ملازمین سے نقدی اور موبائل فونزبھی چھین لئے.

    کیٹل فارم میں ڈکیتی کا مقدمہ ملک کی مدعیت میں  گلشن معمار تھانے میں درج کرلیا گیا ہے. خیال رہے کہ ماضی میں بھی عید کے دونوں‌ مویشی منڈیوں میں رش بڑھتے ہی لوٹ مار کا سلسلہ بڑھ جاتا تھا.

    گزشتہ برس  شہر قائد میں سپرہائی وےپر  آٹھ سو ایکڑ پرمویشی منڈی قائم کی گئی تھی، اس سال بھی توقع کی جارہی ہے کہ بڑے پیمانے پر مویشی منڈی کا اہتمام کیا جائے گا۔

  • کراچی: صرف خواتین کو لوٹنے والا ڈکیتوں کا انوکھا گروہ گرفتار

    کراچی: صرف خواتین کو لوٹنے والا ڈکیتوں کا انوکھا گروہ گرفتار

    کراچی: اسپیشل انویسٹی گیشنز یونٹ نے ڈکیتوں کا ایک انوکھا گروہ گرفتار کیا ہے، جو فقط خواتین کو لوٹتا اور اپنے اصولوں کی سختی سے پابندی کرتا ہے.

    تفصیلات کے مطابق پولیس کی حالیہ کارروائی میں گرفتار ہونے والے اسٹریٹ کرمنلز عبدالستار، اسحاق، طاہر اور ندیم احمد نے دوران تفتیش حیران کن انکشافات کیے.

    ڈکیتوں نے واردتوں کے اصول و ضوابط اور طریقہ کار وضع کر رکھا ہے. کارروائیاں‌ پورے ہفتے پر محیط نہیں‌ ہوتی تھیں. ملزمان جمعرات کو مزار پر حاضری اور جمعے کو نماز جمعہ کی چھٹی کیا کرتے تھے، وارداتیں‌ باقی پانچ روز کی جاتیں.

    دل چسپ امر یہ ہے کہ ملزمان کے اصولوں میں صرف خواتین کو لوٹنا شامل تھا. مزید یہ کہ وہ دوپہر چار بجے سے پہلے ہی وارداتیں کرتے تھے. چار بجے کے بعد ملزمان اپنے گھروں میں جاکر خاندان کو وقت دیتے.

    کراچی میں‌ ہونے والی ڈکیتیوں میں منظم افغان گروہ ملوث ہیں: ایس پی صدر

    پولیس کے مطابق ملزمان نے چار سال تک لوٹ مار کی سیکڑوں وارداتیں کیں۔ صرف خواتین کو لوٹنے والے ان ملزمان نے کراچی کے تین مصروف اور کاروباری علاقوں طارق روڈ، گلشن اقبال اور لیاقت آباد کی مارکیٹس کو ہدف بنایا ہوا تھا، جو جیولرز کی دکانوں کے لیے مشہور ہیں.

    ڈکیت گروہ کا کارندہ اسحاق خود بھی سنار تھا، جسے اسی مقصد کے لیے گروہ میں شامل کیا گیا تھا، تاکہ ان ہی خواتین کو لوٹا جائے، جنھوں نے اصلی زیورات پہن رکھے ہوں.

    ایس ایس پی طارق دھاریجو کے مطابق ملزمان کو تفتیش کے لیے ایس آئی یو منتقل کردیا گیا ہے، جہاں ان سے مزید تفتیش جاری ہے۔

    کراچی میں ڈکیتی کےدوران فائرنگ ‘ رینجرزاہلکار شہید

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • کراچی: رینجرز کے چھاپے، 3 ڈکیت اور ایک منشیات فروش گرفتار

    کراچی: رینجرز کے چھاپے، 3 ڈکیت اور ایک منشیات فروش گرفتار

    کراچی: پاکستان رینجرز سندھ نے مختلف علاقوں میں کارروائی کرتے ہوئے تین ڈکیت اور ایک منشیات فروش کو گرفتار کرلیا۔

    تفصیلات کے مطابق کراچی آپریشن کے تحت کارروائیاں کرتے ہوئے رینجرز سندھ نے ڈکیتی، منشیات اور دیگر جرائم میں ملوث تین ملزمان اور ایک منشیات فروش کو گرفتار کرلیا۔

    ترجمان رینجرز کے مطابق تین ملزمان کو گلزار ہجری کے علاقے سے کارروائی کرتے ہوئے گرفتار کیا گیا، ان میں سمیر مصطفی عرف سمیر ڈکیت، شاہد اورعبداللہ شامل ہیں، ملزمان ڈکیتی سمیت متعدد دیگر جرائم میں ملوث ہیں۔

    ڈیفنس سے منشیات فروش گرفتار

    رینجرز کے مطابق چوتھے ملزم کو ڈیفنس کے علاقے میں کارروائی کرتے ہوئے گرفتار کیا گیا، ملزم اظہار حسین شاہ قیوم آباد اور اختر کالونی کے علاقوں میں منشیات فروشی کا کاروبار کرتا ہے۔

    چاروں ملزمان کے قبضے سے غیر قانونی اسلحہ، ایمونیشن، مسروقہ سامان اور منشیات برآمد کی گئی ہے، ملزمان کو قانونی چارہ جوئی کے لیے پولیس کے حوالے کردیا گیا ہے۔