ڈیرہ اسماعیل خان: یوم آزادی کے موقع پر دہشت گردی کی منصوبہ بندی کرنے والے 4 دہشت گردوں کو گرفتار کرلیا گیا۔

تفصیلات کے مطابق ڈیرہ اسماعیل خان میں سی ٹی ڈی نے انٹیلی جنس بیسڈ آپریشن کے دوران یوم آزادی پر دہشت گردی اور تخریب کاری کا منصوبہ ناکام بنادیا۔

ڈی پی او سجاد احمد نے بتایا کہ تھانہ گومل یونیورسٹی کی حدود مٹھی بگوانی میں کارروائی کے دوران 4 دہشت گردوں کو گرفتار کرلیا ہے ،گرفتار دہشت گردوں کا تعلق کالعدم لشکر جھنگوی بالی کھیارہ گروپ سے ہے۔

ڈی پی او نے بتایا کہ گرفتار دہشت گرد 14 اگست کے موقع پر دہشتگردی کی منصوبہ بندی کر رہے تھے۔

ان کا مزید کہنا تھا کہ ملزمان سے بھاری مقدار میں اسلحہ، ایمونیشن، دستی بم، بارودی مواد، تیار آئی ای ڈی، ڈیٹونیٹرز، اے جی ایل گرنیڈ، پستول اور رائفل برآمد کی گئی۔

پولیس کے مطابق گرفتار دہشتگرد شہریوں اور پولیس اہلکاروں پر حملوں میں بھی ملوث تھے۔

ڈیرہ اسماعیل خان (10 اگست 2025): ڈیرہ اسماعیل خان کے گاؤں میں سسرالیوں نے بہو کو بدترین تشدد کا نشانہ بنا کر موت کے گھاٹ اتاردیا۔

تفصیلات کے مطابق ڈیرہ اسماعیل خان کے گاؤں بلوٹ میں سسرالیوں کے تشدد سے بہو قتل ہوگئی، مقتولہ کے والد کی مدعیت میں مقدمہ درج کیا گیا ہے جبکہ مقتولہ کے شوہر کو گرفتار کرلیا گیا۔

پولیس کا کہنا ہے کہ مقتولہ نے 6 ماہ قبل پسند کی شادی کی تھی، ملزم کی ماں اور بھائی کی گرفتاری کیلئے چھاپے مارے جارہے ہیں۔

گزشتہ روز شیخوپورہ کے نواحی گاؤں نوکریاں میں ایسا ہی افسوسناک واقعہ پیش آیا تھا جہاں بہو سسرالیوں کے بدترین تشدد کا شکار ہوگئی ساتھ ہی بہن کو لینے آنے والے بھائی کو بھی تشدد کا نشانہ بنایا گیا تھا۔

ذرائع کا کہنا ہے کہ شوہر سمیت سسرالیوں نے خاتون کو ڈنڈوں سے تشدد کرتے ہوئے ٹانگیں توڑ دیں، بہن کو لینے آئے بھائی کو بھی بدترین تشدد کا نشانہ بنایا اور حالت غیر ہونے پر سسرالی خاتون کو چھوڑ کر فرار ہوگئے تھے۔

سوشل میڈیا پر خبروائرل ہونے کے بعد ڈی پی او شیخوپورہ نے نوٹس لیا، پولیس نے متاثرہ خاتون کی والدہ کی مدعیت میں شوہر سمیت پانچ افراد کے خلاف مقدمہ درج کرلیا۔

گزشتہ دنوں ڈی آئی خان میں سیکیورٹی فورسز کے آپریشن میں مارے گئے 4 خارجی دہشتگردوں سے ان کے خاندان اور قبیلے نے لاتعلقی کا اعلان کر دیا ہے۔

اے آر وائی نیوز کے مطابق منگل 15 اپریل کو ڈیرہ اسماعیل خان کے علاقے کلاچی میں سیکیورٹی فورسز کے آپریشن میں 4 خارجی ہلاک ہوئے تھے۔ سیکیورٹی ذرائع کا کہنا ہے کہ ہلاک دہشتگردوں کے خاندان اور قبیلے نے ان سے اعلان لاتعلقی کر دیا ہے۔

سیکیورٹی ذرائع کا کہنا ہے کہ مذکورہ آپریشن میں ہلاک دہشتگردوں میں رنازئی قبلے کا خارجی حذیفہ عرف عثمان بھی شامل تھے۔

اس ہلاک خارجی دہشتگرد کی والدہ نے اپنے ویڈیو پیغام میں کہا ہے کہ حذیفہ عرف عثمان میرا بیٹا تھا لیکن وہ میرا اور اپنے والد کا نافرمان تھا۔وہ فوج کے ہاتھوں مارا گیا۔

ان کا کہنا تھا کہ ہم نے حذیفہ کو بہت سمجھایا، والد نے بھی بہت بار ڈانٹا، لیکن اس پر ہماری بات کو کوئی اثر نہیں ہوتا تھا۔

سیکیورٹی ذرائع کا کہنا ہے کہ کے پی میں متاثرین کی بڑی تعداد فتنہ الخوراج کو مسترد کر رہی ہے۔

ڈیرہ اسماعیل خان میں سیکیورٹی فورسز کے آپریشن میں افغان نائب گورنر مولوی غلام محمد کا بیٹا مارا گیا، جو پاکستان کے خلاف دہشت گردی میں ملوث تھا۔

تفصیلات کے مطابق افغان صوبہ بادغیس کے نائب گورنر مولوی غلام محمد کا بیٹا بدرالدین عرف یوسف سیکیورٹی فورسز کے آپریشن میں کلاچی ڈیرہ اسماعیل خان میں ہلاک ہونے والے تین دہشت گردوں میں شامل تھا، وہ فتنہ الخوارج کے دہشت گردوں کے ساتھ مارا گیا۔

افغانستان کی سرزمین پاکستان کے خلاف دہشت گردی کے لیے استعمال ہو رہی ہے، افغان طالبان کے اعلیٰ عہدیدار کے بیٹے کی ٹی ٹی پی کے ساتھ ہلاکت اس حقیقت کا واضح ثبوت ہے۔

افغان نائب گورنر کے بیٹے یوسف کی ٹی ٹی پی دہشت گردوں کے ساتھ ہلاکت ثابت کرتی ہے کہ افغانستان کھلم کھلا پاکستان میں دہشت گردی کو سپورٹ کر رہا ہے۔

افغانستان میں ٹی ٹی پی اور دیگر دہشت گرد گروپس کو ٹریننگ، اسلحہ اور محفوظ پناہ گاہیں فراہم کی جا رہی ہیں، یہ کھلی جارحیت ہے، جسے مزید برداشت نہیں کیا جا سکتا۔

افغان نائب گورنر کا بیٹا پاکستان کے خلاف دہشت گردی میں ملوث تھا، جو ٹی ٹی پی کے دہشت گردوں کے ساتھ مارا گیا، یہ افغانستان کی ریاستی دہشت گردی کا ناقابلِ تردید ثبوت ہے.

افغانستان میں موجود دہشت گرد گروپس نہ صرف پاکستان بلکہ پورے خطے کے امن کے لیے خطرہ ہیں اور کابل کی حکومت ان گروہوں کو تحفظ دے کر کھلی جنگ چلا رہی ہے.

افغانستان نے ہمیشہ دہشت گردوں کو پناہ دی اور پاکستان کو نقصان پہنچانے کی کوشش کی، ٹی ٹی پی کے ساتھ افغان طالبان کے روابط اب کسی سے ڈھکے چھپے نہیں لیکن جب بھی افغانستان پاکستان کے خلاف دہشت گردوں کو استعمال کرے گا، پاکستان ان کا بھرپور جواب دے گا، افغانستان کی ریاستی سرپرستی میں ہونے والی دہشت گردی اب مزید برداشت نہیں۔

افغانستان کا دہشت گردی کو بطور ہتھیار استعمال کرنا خطے کے استحکام کے لیے خطرناک ہے تاہم پاکستان اپنی سرزمین پر دہشت گردی برداشت نہیں کرے گا

ڈی آئی خان: ڈیرہ اسماعیل خان میں تھانہ پہاڑپور کی موبائل وین پر دہشت گردوں کے حملے میں اے ایس آئی شہید اور دو پولیس اہلکار زخمی ہوگئے۔

تفصیلات کے مطابق ڈیرہ اسماعیل خان میں تھانہ پہاڑپور کی موبائل وین پر دہشت گردوں نے حملہ کردیا ، جس کے نتیجے میں اے ایس آئی میرغلام شہید اور دو پولیس اہلکار زخمی ہوگئے۔

موبائل وین پر پیرا صحاب کے قریب فائرنگ کی گئی، اے ایس آئی میرغلام موقع پر دم توڑ گئے جبکہ رؤف اور یوسف زخمی ہوگئے۔

زخمیوں کو پہلے تحصیل اسپتال پہاڑپورمنتقل کیا گیا جہاں سے تشویشناک حالت کے پیش نظرڈسٹرکٹ ہیڈکوارٹراسپتال ڈیرہ منتقل کیاگیا۔

واقعے کی اطلاع ملتے ہی پولیس کی بھاری نفری موقع پر پہنچ گئی، حملے کی تحقیقات شروع کردی ہے۔

دوسری جانب درابن درہ زندہ چیک پوسٹ پرفائرنگ سے اہلکار یعقوب زخمی ہوگیا، حالت خطرے سے باہر ہے تاہم پولیس کی جوابی کارروائی پر حملہ آور فرار ہوگئے۔

پشاور : ڈیرہ اسماعیل خان (ڈی آئی خان) تھانے پر حملے کا مقدمہ درج کرلیا گیا ، حملے میں 10اہلکار شہید اور 8 زخمی ہوئے تھے۔

پشاور تفصیلات کے مطابق ڈیرہ اسماعیل خان میں تھانے پر حملے کا مقدمہ تھانہ سی ٹی ڈی میں درج کرلیا گیا ، ایس ایچ اوکی مدعیت میں درج مقدمے میں انسداددہشتگردی کی دفعات شامل کی گئی ہے۔

ایف آئی آر میں کہا گیا ہے کہ تھانےپر30دہشت گردوں نےحملہ کیا، دہشتگردوں نےچاروں اطراف سےتھانےپرحملہ کیا، اس دوران دہشت گردوں کے ساتھ 2 گھنٹے تک فائرنگ کاتبادلہ ہوا، حملے میں 10 اہلکار شہید اور 8 زخمی ہوئے۔

گزشتہ رات تحصیل درابن میں جدید اور بھاری ہتھیاروں سے لیس دہشتگردوں نے تھانے پرحملہ کیا، پولیس اوردہشت گردوں کےدرمیان ڈھائی گھنٹےتک فائرنگ جاری رہی۔

شہید اہلکاروں میں اسلم،غلام فرید،جاوید، ادریس،عمران، صفدر، کوثر، احترام سید، رفیع اللہ اورحمید الحق شامل ہیں تاہم شہید اہلکاروں کی اجتماعی نماز جنازہ اداکردی گئی ہے۔

نگراں وزیراعظم انوارالحق کاکڑنے دہشت گردحملےکی مذمت کرتےہوئے کہا تھا کہ بزدلانہ کارروائیاں ہماراعزم ختم کرنے میں ہمیشہ کی طرح ناکام رہیں گی۔