Tag: ڈیرہ بگٹی

شاہ زین بگٹی کےقافلے کا دھرنا ختم کرانے کے لئے ضلعی انتظامیہ کی جانب سے مذاکرات ناکام ہوگئے، ہفتے سے جاری دھرنے سے قومی شاہراہ پر گاڑیوں کی قطاریں لگ گئیں، جس سے مسافروں کو شدید مشکلات کا سامنا ہے۔

جمہوری وطن پارٹی کے رہنما نواب شاہ زین بگٹی کی قیادت میں بگٹی مہاجرین کے قافلے کو ڈیرہ بگٹی کے قریب سے واپس بھیج دیا گیا تھا، ڈیرہ بگٹی اور کشمور ضلعی انتظامیہ نے بگٹی مہاجرین کے قافلے کو ڈیرہ بگٹی جانے کی اجازت نہیں دی۔

جس پر کشمور ڈیرہ موڑ قومی شاہراہ پر بگٹی مہاجرین نے احتجاجا دھرنا دے دیا، ہفتے کی شام سے جاری دھرنےسے قومی شاہراہ پر گاڑیوں کی قطاریں لگ گئیں، جس سے مسافروں کو شدید مشکلات کا سامنا رہا۔

انتظامیہ کے شاہ زین بگٹی سے احتجاج ختم کرانے کیلئے مذاکرات بھی ناکام رہے، شاہ زین بگٹی کا کہنا تھا کہ وزیراعلی بلوچستان آئیں تو پھر دھرنا ختم کرنے کا سوچیں گے، انہوں نے مطالبہ کیا کہ قافلے کو ڈیرہ بگٹی جانے دیا جائے، سرد موسم میں ہماری خواتین، بچوں اور بزرگوں کو مشکلات جھیلنا پڑ رہی ہیں۔

نواب شاہ زین بگٹی کا قافلہ سینکڑوں افراد کے ہمراہ ڈیرہ بگٹی کی جانب رواں دواں ہے، ان کا مطالبہ ہے کہ بگٹیوں کو دوبارہ ڈیرہ بگٹی میں آباد اور ہمارے نقصان کا ازالہ بھی کیا جائے۔

بگٹی قبائل کے لوگ جمہوری وطن پارٹی کے سربراہ نواب شاہ زین بگٹی کی سربراہی میں اپنے آبائی علاقے ڈیرہ بگٹی جارہے ہیں، قافلے میں موجود لوگوں کے مطابق ان کو دو ہزار پانچ میں جبرا ان کے آبائی علاقے سے بے دخل کیا گیا اور وہ اپنے گھر لوٹنے کیلئے بے قرار ہیں۔

شاہ زین بگٹی کا کہنا ہے کہ اگر ان کے قبیلے کے لوگوں کو ان کے آبائی علاقوں کو جانے سے روکا گیا تو یہ پاکستان کے آئین کے منافی ہوگا جبکہ ہر شہری کے جان و مال کی ذمہ داری حکومت پر ہے۔