شکاگو: ڈیموکریٹک نیشنل کنونشن میں دوسرے روز فلسطین اور غزہ شہدا کا ذکر گونجتا رہا، کنونشن میں لوگوں نے غزہ میں شہید افراد کے ناموں کے پوسٹرز لہرائے اور سینئیر سینیٹر برنی سینڈرز نے کنونشن میں غزہ میں فوری جنگ بندی کا مطالبہ کیا، جس پر شرکا نے ان کی پذیرائی کی۔
ترقی پسند امریکی قانون ساز نے شکاگو میں ڈیموکریٹک نیشنل کنونشن میں تقریر کے دوران غزہ میں اسرائیلی جارحیت کے بارے میں مختصر خطاب کرتے ہوئے سامعین سے تالیاں اور پذیرائی وصول کی۔
برنی سینڈرز نے کنونشن کی دوسری رات کہا ’’ہمیں غزہ میں اس خوفناک جنگ کو ختم کرنا چاہیے، یرغمالیوں کو بھی گھر پہنچائیں اور فوری جنگ بندی کا مطالبہ کریں۔‘‘
کنونشن میں کسی فلسطینی امریکی رہنما کو اسٹیج پر تقریر کے لیے مدعو نہیں کیا گیا، دی گارڈین کے مطابق ہال میں اندر موجود ’غیر پابند‘ مندوبین کی جانب سے اس کا مطالبہ بھی کیا گیا تھا۔ واضح رہے کہ پچھلے ہفتے مینیسوٹا کے ڈیموکریٹک صدارتی پرائمری میں جو ووٹ ڈالے گئے تھے ان میں پانچواں حصہ ’’غیر پابند‘‘ نشان والے ووٹوں پر مشتمل تھا، یہ ووٹرز دراصل غزہ میں اسرائیل کی جارحیت کے خلاف احتجاج کر رہے ہیں۔
شکاگو میں اسرائیلی ایمبیسی کے باہر بڑا مظاہرہ کیا گیا، پولیس نے مظاہرین کو منتشر کرنے کے لیے لاٹھی چارج کیا اور متعدد مظاہرین کو گرفتار کر لیا گیا۔
غزہ جنگ بندی مذاکرات، قطر کے تجزیہ کار نے امریکی چال بازیاں بے نقاب کر دیں
دریں اثنا، ڈیموکریٹک نیشنل کنونشن کے دوسرے روز ڈیمورکریٹس نے نائب امریکی صدر کاملا ہیرس کی بھرپور حمایت کا اعلان کیا، سابق صدر بارک اوباما اور مشل اوباما نے بھی خطاب کیا۔
اوباما نے کہا ’’ڈونلڈ ٹرمپ اقتدار کو اپنے مقاصد کی تکمیل کا ایک ذریعہ سمجھتے ہیں، ہمیں مزید چار سال کی بوکھلاہٹ، ہنگامہ آرائی اور افراتفری کی ضرورت نہیں ہے۔ ہم نے وہ فلم پہلے دیکھ رکھی ہے اور ہم سب جانتے ہیں کہ سیکوئل عام طور پر بدتر ہوتا ہے۔ امریکا ایک نئے باب کے لیے تیار ہے۔ ایک نئی کہانی کے لیے۔ ہم صدر کاملا ہیرس کے لیے تیار ہیں۔‘‘