Tag: ڈینگی لاروا

لاہور: محکمہ صحت پنجاب نے کہا ہے کہ 1850 مقامات سے ڈینگی لاروا تلف کیا گیا، جب کہ 130 کمرشل مقامات پر ڈینگی لاروا کی موجودگی پر مقدمات درج کیے گئے اور 21 افراد کو گرفتار کیا گیا۔

تفصیلات کے مطابق محکمہ صحت پنجاب نے کہا ہے کہ پنجاب کے تمام اسپتالوں میں ڈینگی کے 400 مریض زیر علاج ہیں، جن میں سے صرف 9 مریض شعبہ انتہائی نگہداشت میں داخل ہیں۔

صحت کے محکمے کا کہنا ہے کہ گزشتہ 24 گھنٹوں میں پنجاب میں 170 نئے ڈینگی مریض سامنے آئے، جب کہ چوبیس گھنٹوں کے دوران 169 مریضوں کو اسپتالوں سے ڈسچارج کیا گیا، ڈینگی ایکسپرٹ ایڈوائزی گروپ کے مطابق وائرس سے پنجاب میں 10 اموات ہو چکی ہیں۔

یہ بھی پڑھیں:  ملک بھر میں ڈینگی کیسز کی تعداد 30 ہزار سے تجاوز کر گئی

محکمہ صحت نے بتایا کہ گزشتہ روز محکمے کی ٹیموں نے پنجاب میں 2 لاکھ 63 ہزار 650 مقامات کو چیک کیا، اور اس دوران اٹھارہ سو سے زائد مقامات سے لاروا تلف کیا گیا، 21 افراد کو لاروا کے سلسلے میں غفلت برتنے پر گرفتار کیا گیا۔

ڈینگی لاروا کی موجودگی پر 1394 افراد کو وارننگ بھی جاری کی گئی جب کہ 36 مقامات سیل کیے گئے۔

واضح رہے کہ دو دن قبل وزارت صحت نے کہا تھا کہ ملک بھر میں ڈینگی کیسز کی کل تعداد 30 ہزار سے تجاوز کر گئی ہے اور اب تک ڈینگی سے 47 اموات ہو چکی ہیں۔ سب سے زیادہ ڈینگی کیسز وفاقی دارالحکومت اسلام آباد میں سامنے آئے ہیں جہاں تعداد ساڑھے 8 ہزار کے قریب پہنچ چکی ہے۔