Tag: ڈینگی مہم

راولپنڈی: اینٹی ڈینگی مہم کے لیے استعمال ہونے والی دوا ڈیلٹا میتھرین بے اثر ہو گئی ہے، ڈینگی مچھر نے اس دوا کو برداشت کرنے کی صلاحیت حاصل کر لی۔

تفصیلات کے مطابق پنجاب میں ڈینگی کے شکار مریضوں کی تعداد بڑھتی جا رہی ہے، صوبائی حکومت نے ڈینگی سے نمٹنے کے لیے ڈیلٹا میتھرین دوا پر انحصار کیا تاہم یہ دوا اب بے اثر ہو گئی ہے۔

بتایا گیا ہے کہ ڈبلیو ایچ او نے ڈیلٹا میتھرین کی بجائے لیمڈا کلیتھورین تجویز کی تھی لیکن اینٹی ڈینگی مہم میں ڈیلٹا میتھرین پر انحصار کیا جاتا رہا ہے۔

انتظامیہ کی جانب سے غفلت کے باعث مزید 68 مریضوں میں ڈینگی کی تصدیق ہو چکی ہے۔

یہ بھی پڑھیں:  اسلام آباد میں ڈینگی وائرس سر اٹھانے لگا

ادھر وفاقی دار الحکومت میں بھی ڈینگی وائرس سر اٹھانے لگا ہے، 28 اگست کو پمز اسپتال میں صرف 24 گھنٹوں میں 24 مریضوں میں ڈینگی وائرس کی تصدیق کی گئی تھی۔

پمز کے ترجمان کا کہنا تھا کہ 24 گھنٹے میں ڈینگی کے 150 مشتبہ مریض لائے گئے تھے، اسپتال میں ڈینگی آئیسولیشن وارڈ بھی قایم کر دیا گیا ہے، جس میں 10 بیڈز رکھے گئے ہیں۔

صوبائی وزیر صحت ڈاکٹر یاسمین راشد نے گزشتہ ہفتے کہا تھا کہ حالیہ بارشوں کے بعد راولپنڈی میں ڈینگی کے کیسز سامنے آئے ہیں، حکومت ڈینگی مہم کی تمام تر سرگرمیوں کی مانیٹرنگ کر رہی ہے، ڈینگی سے متعلق آگاہی کے لیے مؤثر مہم بھی چلائی جا رہی ہے۔