Tag: ڈینگی ٹیسٹ

اسلام آباد : اسلام آباد ہیلتھ کیئر ریگولیٹری اتھارٹی نے ڈینگی ٹیسٹ فیس کی بالائی حد اٹھارہ سو روپے مقرر کر دی ، فیس کا اطلاق 31 دسمبر 2022 تک ہوگا۔

تفصیلات کے مطابق وفاقی حکومت نے اسلام آباد میں ڈینگی ٹیسٹ کی من مانی فیس وصولی کا نوٹس لے لیا۔

ذرائع وزارت صحت نے بتایا کہ اسلام آباد ہیلتھ کیئرریگولیٹری اتھارٹی نے ڈینگی ٹیسٹ فیس مقرر کر دی، ڈینگی ٹیسٹ فیس کی بالائی حد 1800 مقرر کی گئی۔

ذرائع کا کہنا تھا کہ اسلام آباد میں نجی، سرکاری اسپتال،لیبارٹریز پرفیصلے کا اطلاق ہو گا۔

اس حوالے سے ہیلتھ ریگولیٹری اتھارٹی نے چیف کمشنر اور ڈی سی ، سی ای او ڈریپ، این آئی ایچ کو اور اسپتالوں، لیبارٹریز کے نام مراسلہ جاری کردیا ہے۔

وزارت صحت کا کہنا ہے کہ ہیلتھ ریگولیشن 2018کےتحت ڈینگی ٹیسٹ فیس مقرر ہوئی ہے، اسلام آباد میں ڈینگی ٹیسٹ فیس کا اطلاق 31 دسمبر 2022 تک ہو گا۔

ذرائع کے مطابق ڈینگی ٹیسٹ فیس فکس کرنےپراسپتال،لیبارٹریز سے مشاورت ہوئی ہے، اسپتال، لیبارٹریز ڈینگی ٹیسٹ فیس لسٹ آویزاں کرنے کی پابند ہوں گی جبکہ ڈینگی ٹیسٹ رپورٹ میں مشین کا نام، کٹ، بیچ نمبر کا اندراج لازم ہو گا۔

وزارت صحت نے کہا کہ اسلام آباد میں مقررہ سے زائد ڈینگی ٹیسٹ فیس وصولی پر کارروائی ہو گی، نجی لیبارٹریز ڈینگی ٹیسٹ کی 3 ہزار تک فیس وصول کر رہی تھیں۔