امریکا میں ایک دریا سے پکڑی جانے والی قوی الجثہ اور طویل قامت مچھلی نے لوگوں کو حیران کردیا، اس کی عمر 100 سال بتائی جارہی ہے جبکہ اس کی قامت انسانی قامت سے بھی زیادہ ہے۔
بین الاقوامی ویب سائٹ کے مطابق امریکی فش اینڈ وائلڈ لائف سروس نے ڈیٹرائٹ کے دریا سے مچھلی کی ایک نایاب قسم پکڑی ہے۔ اسٹرجن نامی اس مچھلی کا وزن 90 کلو گرام ہے جبکہ اس کی قامت 6 فٹ 10 انچ ہے۔
سماجی رابطے کی ویب سائٹ فیس بک پر اپنی پوسٹ میں وائلڈ لائف سروس کا کہنا تھا کہ اس مچھلی کی عمر ممکنہ طور پر 100 سال ہوسکتی ہے، یعنی یہ ڈیٹرائٹ دریا میں سنہ 1920 سے موجود ہے۔
وائلڈ لائف سروس کی جانب سے اسے عفریت بھی کہا گیا ہے۔
تصویر میں محکمے کا ایک ملازم مچھلی کے برابر میں لیٹا دکھائی دے رہا ہے اور دیکھا جاسکتا ہے کہ اس کی قامت مچھلی سے کم ہے۔
A once in a lifetime catch for our Detroit River native species crew last week! This real life river monster was tipping…
Posted by Alpena Fish and Wildlife Conservation Office on Friday, April 30, 2021
پوسٹ میں کہا گیا کہ اس مچھلی کی جانچ پڑتال کے بعد اسے فوری طور پر واپس دریا میں چھوڑ دیا گیا۔
اس پوسٹ پر فیس بک صارفین نے نہایت حیرت و مسرت کا اظہار کیا، بعض افراد نے کہا کہ یہ جاننا نہایت خوش کن ہے کہ آبی آلودگی کے باجود یہ مچھلی ایک طویل عمر جینے میں کامیاب رہی۔
امریکی ڈپارٹمنٹ آف نیچر ریسورسز کی جانب سے یہ مچھلی معدومی کے خطرے کا شکار جاندار قرار دی جاچکی ہے جبکہ تجارتی بنیادوں پر اس کے شکار پر پابندی عائد ہے۔
ماہرین کے مطابق اسٹرجن مچھلی سات فٹ تک طویل ہوسکتی ہے، مادہ مچھلیاں نر مچھلیوں کی نسبت زیادہ وزنی اور طویل قامت ہوتی ہیں، نر مچھلی کی عمر زیادہ سے زیادہ 55 سال جبکہ مادہ مچھلی کی عمر زیادہ سے زیادہ 70 سے 100 سال تک ہوسکتی ہے۔
