ARYNews.tv | Urdu – Har Lamha Bakhabar

Tag: ڈیپ فیک

  • سچن ٹنڈولکر بھی ڈیپ فیک ویڈیو کا شکار

    سچن ٹنڈولکر بھی ڈیپ فیک ویڈیو کا شکار

    بھارت کے لیجنڈری کھلاڑی و سابق کپتان سچن ٹنڈولکر بھی ڈیپ فیک ویڈیو کا شکار ہوگئے۔

    سابق کپتان سچن ٹنڈولکر  نے ایکس پر اپنی جعلی ویڈیو شیئر کی اس ڈیپ فیل ویڈیو میں کھلاڑی کو آن لائن گیمنگ ایپ کی تشہیر کرتے ہوئے دیکھا جاسکتا ہے۔

    گیمنگ ایپ کی تشہیر کے لیے بنائی گئی اس جعلی ویڈیو میں سچن ٹنڈولکر کی ویڈیو اور آواز کا استعمال کیا گیا ہے۔

    پریانکا چوپڑا کی ڈیپ فیک ویڈیو منظر عام پر آگئی

    سابق کپتان سچن ٹنڈولکر نے ویڈیو کے کیپشن میں اپنے مداحوں کو جعلی ویڈیو کے حوالے سے آگاہ کرتے ہوئے لکھا کہ ’یہ ویڈیوز جعلی ہے‘۔

    سچن  نے ٹیکنالوجی کے غلط استعمال پر تشویش کا اظہار کرتے ہوئے کہا کہ ٹیکنالوجی کا مسلسل غلط استعمال کیا جارہا ہے جو کہ ایک پریشان کن بات ہے۔

    انہوں نے کہا کہ  میری صارفین سے درخواست ہے کہ اس طرح کی تمام ایپس، اشتہارات اور ویڈیوز کو بڑی تعداد میں رپورٹ کریں ساتھ ہی سابق کھلاڑی نے سوشل میڈیا پلیٹ فارمز سے اپیل کرتے ہوئے کہا کہ اس طرح کی جعلی ویڈیوز کے خلاف فوری کارروائی کی جائے۔

    رشمیکا مندانہ کے بعد عالیہ بھٹ کی ڈیپ فیک ویڈیو وائرل

    بھارت کے سابق کپتان سچن ٹنڈولکر  نے لکھا کہ سوشل میڈیا پلٹ فارمز صارفین کی شکایات پر چاکنا رہیں، ان کی جانب سے کئے گئے فوری اقدامات ہی اس طرح کی ڈیپ فیک اور غلط معلومات کے پھیلاؤ کو روک سکتے ہیں۔

    واضح رہے کہ کھلاڑی سچن ٹنڈولکر سے قبل ان کی بیٹی سارہ ٹنڈولکر، بھارتی اداکارائیں عالیہ بھٹ، رشمیکا اور پرینکا بھی جعلی ویڈیوز اور تصاویر کا شکار ہوچکی ہیں۔

  • ڈیپ فیک کتنا خطرناک ہے؟ کیسے بچا جائے؟

    ڈیپ فیک کتنا خطرناک ہے؟ کیسے بچا جائے؟

    ڈیپ فیک ایک ایسی تکنیک ہے جو ویڈیوز، تصاویر اور آڈیوز کو جوڑ توڑ کرنے کے لیے مصنوعی ذہانت کا استعمال کرتی ہے، موجودہ دور میں اس کا استعمال بڑھتا جارہا ہے۔

    اس ٹیکنالوجی کی مدد سے کسی دوسرے شخص کی تصویر یا ویڈیو کو استعمال کرتے ہوئے اس پر کسی اور کا چہرہ لگا کر تبدیل کیا جاسکتا ہے۔

    اے آر وائی نیوز کے پروگرام باخبر سویرا میں سوشل میڈیا ایکسپرٹ اسد بیگ نے ڈیپ فیک سے متعلق ناظرین کو آگاہ کیا اور اس کے سدباب کیلئے مختلف مشورے بھی دیے۔

    انہوں نے بتایا کہ اس تکنیک کی مدد سے کسی دوسرے شخص کی تصویر یا ویڈیو کو استعمال کرتے ہوئے اس پر کسی اور کا چہرہ لگا کر تبدیل کیا جاسکتا ہے یا یوں کہہ لیں کہ مصنوعی ذہانت سے ایک جعلی ویڈیو بنائی جاسکتی ہے جو کہ اصلی نظر آتی ہے لیکن اصلی ہوتی نہیں ہے۔

    اسد بیگ نے کہا کہ بہت سے لوگوں نے مصنوعی ذہانت (اے آئی) کے ذریعے ڈیپ فیک کو اپنے مقاصد کیلئے استعمال کیا جو بہت نقصان دہ بھی ہے، خاص طور پر پسماندہ علاقوں کے صارفین پر برے اثرات مرتب ہورہے ہیں اور یہ چیز معاشرتی برائی کے فروغ کا سبب بن رہی ہے۔

    انہوں نے بتایا کہ ڈیپ فیک کے سدباب کیلیے لوگوں میں آگاہی پھیلانے کی اشد ضروت ہے جس کیلئے بحث و مباحثوں کا انعقاد کیا جائے جسے خاص ٹرم میں ’ڈیجیٹل لٹریسی‘ بھی کہتے ہیں، اس کے ذریعے لوگوں کو بتایا جائے کہ ڈیجیٹل پلیٹ فارمز کو کس طرح آپریٹ یا استعمال کیا جائے۔

    اس کے علاوہ پالیسی میکرز کو بھی اپنا کردار ادا کرنا ہوگا کہ اے آئی کے کیا فوائد اور نقصانات ہیں، سوشل میڈیا کے حوالے سے بننے والے ڈیجیٹل قوانین کے فائدے کم اور نقصانات زیادہ ہیں، لہٰذا قوانین پر عمل درآمد کرانا ضروری ہے۔

  • اداکارہ رشمیکا کے بعد کترینہ کیف کی ’ڈیپ فیک‘ تصویر وائرل

    اداکارہ رشمیکا کے بعد کترینہ کیف کی ’ڈیپ فیک‘ تصویر وائرل

    ممبئی: تامل فلموں کی خوبرو اداکارہ رشمیکا مندانا کے بعد اب بالی وڈ کوئین کترینہ کیف کی نامناسب ڈیپ فیک (جعلی) تصویر وائرل ہوگئی ہے۔

    اداکار رشمیکا منڈانہ کی ڈیپ فیک ویڈیو کے چند دن بعد بالی وڈ اداکارہ کترینہ کیف کی ایک ایڈیٹ شدہ تصویر اب سوشل میڈیا پر گردش کر رہی ہے۔

    چند روز قبل رشمیکا مندانہ کی ایک نامناسب جعلی ویڈیو نے بھارتی فلم انڈسٹری میں تہلکہ مچادیا تھا جبکہ اداکارہ نے بھی اپنی جعلی ویڈیو سے متعلق بیان جاری کرتے ہوئے تشویش کا اظہار کیا تھا۔

    رشمیکا مندانہ کی ویڈیو معاملے پر بھارتی حکومت کا اہم اقدام

    رشمیکا مندانہ کی ویڈیو سامنے آنے کے بعد بھارت کی مرکزی حکومت بھی چوکنا ہوگئی تھی اور ایڈوائزری جاری کرتے ہوئے آئی ٹی انٹرمیڈیٹ رولز پر عمل درآمد کے لیے کہا ہے۔

    تاہم اسی دوران بالی وڈ اسٹار کترینہ کیف کی بھی نامناسب جعلی تصویر منظرِ عام پر آگئی ہے۔

    رشمیکا مندانہ کا ’ڈیپ فیک‘ ویڈیو پر ردعمل آگیا

    بھارتی میڈیا کے مطابق بالی وڈ کی نئی آنے والی فلم ’ٹائیگر 3‘ کے ایک سین سے کترینہ کیف کی تصویر کو ڈیپ فیک (جعلی) تصویر میں تبدیل کرکے سوشل میڈیا پر وائرل کیا گیا ہے۔

    اصل تصویر میں بالی وڈ اسٹار فلم ‘ٹائیگر 3′ کے ایک سین میں ہالی وڈ کی اسٹنٹ وومین سے لڑرہی تھیں، تاہم سوشل میڈیا پر وائرل جعلی تصویر میں کترینہ کیف کو  نامناسب انداز میں دکھایا گیا ہے۔

    بھارتی میڈیا کا کہنا ہے کہ کترینہ کیف کی تصویر کو آرٹیفیشل انٹیلیجنس ٹولز ( اے آئی)کا استعمال کرتے ہوئے تبدیل کیا گیا ہے، جو ویڈیوز اور تصاویر میں کسی بھی انسان کے چہروں کو تبدیل کرنے کی صلاحیت رکھتا ہے۔

  • کیا ملکہ برطانیہ نے واقعی اس ویڈیو میں رقص کیا ہے؟

    کیا ملکہ برطانیہ نے واقعی اس ویڈیو میں رقص کیا ہے؟

    برطانوی چینل 4 نے ایک ویڈیو جاری کی ہے جس میں ملکہ برطانیہ کی ہمشکل اپنا ویڈیو پیغام دیتی ہیں، اس ویڈیو میں وہ بہت سے متنازعہ موضوعات پر گفتگو کر رہی ہیں جبکہ انہیں رقص کرتے ہوئے بھی دکھایا جاتا ہے۔

    برطانوی چینل 4 نے گزشتہ روز اعلان کیا تھا کہ وہ رواں برس کرسمس پر برطانوی ملکہ کا ایک متبادل پیغام پیش کریں گے جو ڈیجیٹل طور پر تیار کیا گیا ہے۔

    اب کرسمس کے موقع پر یہ ویڈیو جاری کردی گئی ہے، اس ویڈیو میں اداکارہ ڈیبرا سٹیفنسن ملکہ کی نقل کرتی دکھائی دی دیں جنہیں ڈیپ فیک سافٹ ویئر کی مدد سے بالکل ملکہ کا ہمشکل بنا دیا گیا۔

    چینل 4 کے مطابق ان کے اس ویڈیو بنانے کا مقصد اس ٹیکنالوجی کے حوالے سے خطرات کو اجاگر کرنا ہے کہ کس طرح کسی بھی شخص کا چہرہ استعمال کر کے غلط اور گمراہ کن معلومات پھیلائی جاسکتی ہیں اور کوئی بھی بیان کسی سے بھی منسوب کیا جا سکتا ہے۔

    ویڈیو میں جعلی ملکہ بھی اسی پر بات کرتی دکھائی دیتی ہیں کہ اسمارٹ فونز کی اسکرین پر دکھائی دینے والے مواد پر بھروسہ کرنا بے حد مشکل ہے کہ آیا وہ اصل ہے یا جعلی۔

    ویڈیو میں ملکہ کی ہمشکل کہتی دکھائی دیتی ہیں کہ وہ لاک ڈاؤن کے عرصے میں نیٹ فلکس دیکھنے کے بجائے ٹک ٹاک ویڈیوز پر رقص کی پریکٹس کرتی رہی ہیں، بعد ازاں وہ رقص بھی کرتی ہیں۔

    ویڈیو کے آخر میں چند جھلکیاں اصل منظر کی بھی ہیں جس میں اس ویڈیو کی تیاری کا سیٹ اپ دیکھا جاسکتا ہے۔

    دوسری جانب شاہی محل نے اس حوالے سے کوئی بھی تبصرہ کرنے سے انکار کیا ہے۔