ARYNews.tv | Urdu – Har Lamha Bakhabar

Tag: ڈی آئی ایس پی آر میجر جنرل آصف غفور

  • کابل دھماکا، قمر باجوہ کی زخمیوں کے علاج و معالجے کی پیش کش

    کابل دھماکا، قمر باجوہ کی زخمیوں کے علاج و معالجے کی پیش کش

    راولپنڈی: سینئر ملٹری قیادت نے آرمی چیف کی جانب سے پاکستان میں متعین افغان سفیر سے ٹیلی فون پر رابطہ کر کے کابل فوجی اسپتال میں خودکش دھماکے کی شدید الفاظ میں مذمت کی اور زخمیوں کے علاج و معالجے کی پیش کش بھی کی۔

    آئی ایس پی آر کی جانب سے جاری کردہ اعلامیے میں کہا گیا ہے کہ سینئر ملٹری آفیسر نے پاکستان میں متعین افغان سفیر کو ٹیلی فون کیااورانہیں آرمی چیف جنرل قمرجاوید باجوہ کاپیغام پہنچایا۔

    ڈی جی آئی ایس پی آر کے مطابق اپنے پیغام میں آرمی چیف نے کابل میں فوجی اسپتال پرخودکش حملےپر افسوس کا اظہار کیااورافغان حکومت کو ہر قسم کی مدد زخمیوں کے پاکستان میں علاج کی بھی پیشکش کی۔

    پڑھیں: ’’ پاک افغان سرحد دو روز کھلنے کے بعد دوبارہ غیر معینہ مدت کے لئے بند ‘‘

    افغان سفیر نے آرمی چیف کے بیان کو سراہا اور اُن کے تعاون پر شکریہ ادا کیا۔
    یاد رہے گزشتہ روز کابل کے فوجی اسپتال میں اسلامی شدت پسند جماعت کے مسلح کارندے ڈاکٹرز کا روپ دھار کر اسپتال میں داخل ہوئے اور فائرنگ کر کے 32 افراد کو موت کے گھاٹ اتار دیا تھا۔
  • دہشت گردی سے متعلق واٹس ایپ پیغام جھوٹا ہے، آئی ایس پی آر

    دہشت گردی سے متعلق واٹس ایپ پیغام جھوٹا ہے، آئی ایس پی آر

    راولپنڈی: ترجمان پاک فوج نے کہا ہے کہ واٹس ایپ سے جاری ہونے والے دہشت گردی سے متعلق پیغام کا تعلق آئی ایس پی آر سے نہیں، عوام اس قسم کے جھوٹے پیغامات کو آگے نہ بڑھائیں۔

    پاک فوج کے تعلقات عامہ سے جاری بیان میں کہا گیا ہے کہ سوشل میڈیاپرخطرات سےمتعلق پیغامات سے پاک فوج کا کوئی تعلق نہیں، آئی ایس پی آر کے پیغامات آفیشل پیج اورویب سائٹ پرجاری کیے جاتے ہیں۔

    آئی ایس پی آر اعلامیے میں کہا گیا ہے کہ دہشت گردی سے متعلق کسی بھی قسم کی خبر واٹس ایپ کے ذریعے نشر نہیں کی گئی عوام اس قسم کے جھوٹے پیغامات کو آگے نہ بڑھائیں اور اسے مسترد کردیں۔

    ترجمان پاک فوج نے عوام سے اپیل کی ہے کہ وہ موصول ہونے والے پیغامات کی تصدیق کے لیے ویب سائٹ یا آفیشل پیچ پر جائیں اور آئندہ کسی بھی قسم کے جھوٹے پیغامات آگے بھیجنے سے قبل ٹوئٹر اور فیس بک اکاؤنٹ سے اس کی تصدیق کرلیں۔

    خیال رہے گزشتہ دنوں آئی ایس پی آر کے نام سے ایک جھوٹا پیغام جاری کیاگیا تھا، جس میں عوام سے اپیل کی گئی تھی کہ وہ دہشت گردی کے ممکنہ حملوں کے پیش نظر رش والی جگہ کا رخ نہ کریں اور بازار وغیرہ احتیاط سے جائیں۔

  • سینتیس بریگیڈیئرز کی میجر جنرل کے عہدے پر ترقی

    سینتیس بریگیڈیئرز کی میجر جنرل کے عہدے پر ترقی

    راولپنڈی: آرمی چیف جنرل قمر باجوہ کی زیرِ صدارت آرمی سلیکشن بورڈ کے اجلاس میں 37 بریگیڈیئرز کو میجر جنرل کےعہدے پر ترقی دے دی گئی۔

    ڈی جی آئی ایس پی آر کے مطابق جی ایچ کیو میں آرمی چیف جنرل قمر باجوہ کی زیرصدارت ہونے والے آرمی سلیکشن بورڈ کے اجلاس میں 37 بریگیڈیرز کو میجر جنرل کے عہدے پر ترقی دینے کی منظوری دے دی گئی۔

    ڈی جی آئی ایس پی آر میجر جنرل آصف غفور کے مطابق ترقی پانے والوں میں آرمی میڈیکل کور کے9 افسران بھی شامل ہیں جن میں طاہر سردار، عرفان علی شیخ، لیاقت علی، افتخاراحمد، عمران فضل، طاہر اقبال، طارق محمود دستی، طاہر خادم سمیت خاتون بریگیڈیئر مسز نگار جوہر بھی شامل ہیں۔

    واضح رہے کہ بریگیڈیئر مسز نگار جوہر میجر جنرل کے عہدے پر ترقی پا کر پاک فوج کی تاریخ میں تیسری خاتون میجر جنرل بن گئی ہیں۔

    ڈی جی آئی ایس پی آر کی جانب سے سماجی رابطے کی ویب سائٹ ٹوئٹر پر دی گئی تفصیلات کے مطابق ترقی پانے والے دیگر افسران میں نعمان زکریا، کنور عدنان احمد خان، سید عامر رضا، طارق ضمیر، طاہر گلزار ملک، شاہد محمود، محمد اصغر، خالد سعید، ایمان بلال صفدر، سرفراز محمد، رفیق الرحمان، انعام حیدر ملک، سلمان فیاض غنی، سرفراز علی، محمد انیق الرحمان ملک، محمد عاصم ملک، فیاض حسین شاہ، شاہد نذیر، ضیا الرحمان، زاہد محمود، اظہر اقبال عباسی، طارق محمود، احسن گلریز، شاہد امتیاز، رضوان افضل، عثمان حق، شہاب شاہد، نعمان احمد ہاشمی شامل ہیں۔

  • پاکستان کا کروز میزائل’بابر تھری‘ کا کامیاب تجربہ

    پاکستان کا کروز میزائل’بابر تھری‘ کا کامیاب تجربہ

    راولپنڈی : پاکستان نے آبدوزسے فائر کئے جانیوالے پہلے کروز میزائل ’’ بابر تھری‘‘ کا کامیاب تجربہ کیا ہے، یہ میزائل 450 کلومیٹر تک کے ہدف کو کامیابی سے نشانہ بنانے کی اہلیت رکھتا ہے۔

    ڈی جی آئی ایس پی آر میجر جنرل آصف غفور کی طرف سے جاری بیان کے مطابق پاکستان نے آبدوز سے فائر کئے جانیوالے پہلے کروز میزائل ’’ بابر تھری‘‘ کا کامیاب تجربہ کیا ہے جو 450 کلو میٹر تک ہدف کو کامیابی سے نشانہ بنا سکتا ہے۔

    آئی ایس پی آر کے مطابق میزائل کا تجربہ پاکستان کے سمندری حدود میں کیا گیا اور زیر آب موبائل پلیٹ فارم سے داغے گئے میزائل نے انتہائی کامیابی سے اپنے ہدف کو نشانہ بنایا۔

    یاد رہے ’’ بابر تھری‘‘ میزائل زمین سے مار کرنیوالے کروز میزائل ’’ بابر ٹو‘‘ کا نیا ورژن ہے جو سمندر سے ہدف کو نشانہ بناتا ہے یاد رہے کہ بابر ٹو کا گزشتہ برس دسمبر میں کامیاب تجربہ کیا گیا تھا۔

    ذرائع کے مطابق ’’ بابر تھری‘‘ میزائل اسٹیٹ آف دی آرٹ ٹیکنالوجیز سے لیس ہے جس میں انتہائی جدید گائیڈینس اینڈ نیوی گیشن فیچرز موجود ہیں،یہ میزائل مختلف اقسام کے ہتھیار لے جانے کی صلاحیت رکھتا ہے۔

    اس صلاحیت کا حصول پاکستان کی جانب سے ایک بڑے سنگ میل تک پہنچنے کا ثبوت اورپڑوس میں اپنائی جانیوالی نیوکلیئر اسٹریٹیجز کے موزوں ردعمل کی حکمت عملی کا اظہار ہے۔

    آئی ایس پی آر کے مطابق چیئرمین جوائنٹ چیفس آف اسٹاف کمیٹی جنرل زبیر محمود حیات ،ڈی جی اسٹرٹیجک پلانز ڈویژن لیفٹیننٹ جنرل مظہر جمیل ، کمانڈر نیول اسٹرٹیجک فورس کمانڈ ، سائنسی اسٹرٹیجک اداروں کے افسروں اور سائنسدانوں نے میزائل تجربہ دیکھا۔

    دوسری جانب سے چیئرمین جوائنٹ چیفس آف اسٹاف کمیٹی جنرل زبیر محمود حیات ، چیف آف آرمی اسٹاف جنرل قمر جاوید باجوہ چیف آف ایئر اسٹاف اور چیف آف نیول اسٹاف نے بھی اس غیر معمولی کامیابی پر قوم اور ٹیم کو مبارکباد دی ہے۔

    اس کے علاوہ صدر مملکت ممنون حسین اور وزیراعظم پاکستان نواز شریف نے بھی بابر تھری کے کامیاب تجربے پر قوم کو مبارک باد اور میزائل تیار کرنے والی پوری ٹیم کو خراج تحسین پیش کیا ہے۔