کراچی: شہر قائد کے علاقے کریم آباد کے قریب ایک رکشے کو ٹکر مارنے والی ڈبل کیبن گاڑی ڈی آئی جی اظفر مہیسر کی نکلی۔
تفصیلات کے مطابق کریم اباد کے قریب ایک ڈبل کیبن گاڑی نے رکشے کو ٹکر مار کر بہت نقصان پہنچا دیا تھا، گاڑی کے بارے میں اب معلوم ہوا ہے کہ وہ سندھ پولیس کے ڈی آئی جی اظفر مہسر کی تھی۔
پولیس حکام کا کہنا ہے کہ ڈبل کیبن گاڑی ڈی آئی جی کا بیٹا حاشر مہیسر چلا رہا تھا، اس حادثے میں رکشے کے علاوہ کوئی اور نقصان اس لیے نہیں ہوا تھا کیوں کہ رکشہ سڑک کنارے کھڑی تھی اور خالی تھا، پولیس کا کہنا ہے کہ حادثے کے وقت رکشے میں کوئی سوار نہیں تھا۔
تیز رفتار سرکاری ڈبل کیبن گاڑی کی ٹکر سے رکشہ مکمل تباہ، ویڈیو
پولیس حکام نے رکشہ ڈرائیورز کی لاپرواہی کا ذکر کرتے ہوئے کہا کہ وہ سڑک پر رکشے پارک کر کے چلے جاتے ہیں، پولیس کا کہنا ہے کہ اس واقعے میں کوئی جانی نقصان یا زخمی نہیں ہوا، اور واقعے کی مزید تحقیقات جاری ہے۔
اس واقعے کی موبائل ویڈیوز بھی سامنے آئیں، واقعے کے بعد شہری مشتعل ہو گئے تھے، بڑی تعداد میں جمع مشتعل شہریوں نے ڈبل کیبن گاڑی میں موجود ڈرائیور کو باہر نکالنے کی کوشش کی تھی، تاہم سرکاری گاڑی کے حادثے کی اطلاع پر ڈی ایس پی عزیز آباد نے نفری کے ساتھ موقع پر پہنچنے میں دیر نہیں لگائی تھی، جس کی وجہ سے حالات کنٹرول میں رہے۔
