پاکپتن : ڈسٹرکٹ ہیڈ کوارٹر اسپتال (ڈی ایچ کیو) میں 20 بچوں کی موت نے بہت سے سنگین سوالات کو جنم دیا تاہم تحقیقات کے لیے بنائی گئی کمیٹی نے انکوائری مکمل کرلی ہے۔
تفصیلات کے مطابق پاکپتن میں ایک انتہائی افسوسناک واقعہ سامنے آیا، جہاں مبینہ غفلت کے باعث ایک ہفتے کے دوران بیس نومولود زندگی کی بازی ہارگئے ہیں۔
پاکپتن کے ڈسٹرکٹ ہیڈ کوارٹراسپتال میں رواں ماہ سولہ سے بائیس جون کے دوران مبینہ غفلت اور سہولیات کے فقدان کے باعث بیس بچوں کی اموات ہوئیں، بچوں کی ہلاکت سے علاقے میں تشویش کی لہر دوڑ گئی ہے۔
صرف انیس جون کو پیڈیا ٹرک وارڈ میں پانچ بچے دم توڑ گئے، ابتدائی تحقیقات میں کہا گیا کہ پندرہ نومولود مختلف نجی اسپتالوں سے لائے گئے تھے، جس میں سے تین بچوں کی پیدائش گھروں میں ہوئی۔
بچوں کے ورثا نے طبی عملے پر غفلت، آکسیجن کی کمی اور ناقص سہولیات کا الزام لگایا ہے۔
کمشنر ساہیوال کی ہدایت پربنائی گئی تین رکنی کمیٹی نے انکوائری مکمل کرلی ہے، رپورٹ دوجولائی کوپیش کی جائے گی، تحقیقاتی ٹیم میں ساہیوال ٹیچنگ اسپتال اور محکمہ صحت کے نمائندے شامل تھے۔
دوسری جانب اس واقعے کے بعد ضلعی انتظامیہ کوہوش آیا ہے، مختلف کارروائیوں میں متعدد غیر رجسٹرڈ نجی اسپتالوں کو سیل کر دیا گیا ہے۔
