ARYNews.tv | Urdu – Har Lamha Bakhabar

Tag: ڈی جی خان

  • ڈی جی خان: جھنگی چیک پوسٹ پر دہشت گردوں کا بڑا حملہ ناکام

    ڈی جی خان: جھنگی چیک پوسٹ پر دہشت گردوں کا بڑا حملہ ناکام

    ڈیرہ غازی خان :  ڈیرہ غازی خان کی جھنگی چیک پوسٹ پر دہشت گردوں کا بڑا حملہ ناکام بنادیا گیا، جوابی کارروائی پر دہشت گرد فرار ہوگئے۔

    تفصیلات کے مطابق پنجاب پولیس نے ڈی جی خان کی جھنگی چیک پوسٹ پر دہشت گردوں کا حملہ پسپا کردیا ، ترجمان پولیس نے بتایا کہ بیس سے پچیس دہشت گردوں نے مختلف اطراف سے چیک پوسٹ پر حملہ کیا تھا۔

    ترجمان کا کہنا تھا کہ حملے میں راکٹ لانچر اور جدید اسلحہ استعمال کیا گیا تاہم پپولیس نے زبردست مزاحمت کرکے حملہ ناکام بنا دیا۔

    پولیس کی بھرپور کارروائی پر دہشت گرد فرار ہوگئے اور جانی نقصان کی اطلاعات بھی ہیں تاہم مفروردہشت گردوں کی تلاش کیلئے علاقےمیں سرچ آپریشن جاری ہے۔

    آئی جی پنجاب عثمان انور نے حملہ ناکام بنانے پر ڈی جی خان پولیس کو شاباش دی اور کہا بہادر سپاہی دشمنوں کے سامنے سیسہ پلائی دیوار ہیں۔

    وزیر داخلہ محسن نقوی نے ڈی جی خان کے تھانہ وا ہوا کی پولیس چوکی پر حملہ ناکام بنانے پر پنجاب پولیس کو خراج تحسین پیش کیا۔

    محسن نقوی نے کہا پولیس کے دلیر جوانوں نے بہادری سےخوارجی دہشت گردوں کا مقابلہ کیا اور انہیں مار بھگایا ساتھ ہی مذموم عزائم کوخاک میں ملای، پولیس کی پیشہ وارانہ صلاحیتوں اور جرات پر فخر ہے، خوارجی دہشت گردوں کیخلاف پولیس جوان سیسہ پلائی دیوار بنے رہے۔

  • سفاکیت کی انتہا ، خالہ نے 3 کمسن بھانجوں کو آگ لگادی

    سفاکیت کی انتہا ، خالہ نے 3 کمسن بھانجوں کو آگ لگادی

    ڈی جی خان : خالہ نے سفاکیت کی انتہا کردی اور اپنے3 کمسن بھانجوں کو تشدد کے بعد آگ لگادی۔

    تفصیلات کے مطابق پنجاب کے ضلع ڈیرہ غازی خان (ڈی جی خان) میں تھانہ صدر کےعلاقے میں افسوسناک واقعہ پیش آیا ، جہاں خالہ نے 3 بھانجوں کوزخمی کرنےکےبعدآگ لگادی۔

    ریسکیوذرائع نے بتایا کہ خالہ نے 2سالہ رضوان، 4 سالہ عرفان اور 8 سالہ مصباح کوآگ لگائی تاہم زخمی اور جھلسنے والے بچوں کوٹیچنگ اسپتال منتقل کردیا گیا ہے۔

    ذرائع کا کہنا ہے کہ رضوان اورعرفان کاجسم 50فیصدجھلس چکا ہے جبکہ مصباح کاجسم 80 فیصد جھلسا ، جسے برن یونٹ ملتان روانہ کردیاگیا ہے۔

    پولیس نے بتایا کہ فرارملزمہ کی تلاش جاری ہے اور تحقیقات کا آغازکردیا گیا ہے۔

  • غازی یونیورسٹی کی طالبہ کی شکایت پر دو پروفیسر گرفتار

    غازی یونیورسٹی کی طالبہ کی شکایت پر دو پروفیسر گرفتار

    ڈی جی خان: غازی یونیورسٹی کی طالبہ کی زیادتی کی شکایت پر دو پروفیسرز کو پولیس نے گرفتار کر لیا۔

    تفصیلات کے مطابق ڈیرہ غازی خان کی غازی یونیورسٹی کی طالبہ ثنا ارشاد سے زیادتی کے الزام میں پولیس نے ڈاکٹر ظفر وزیر اور ڈاکٹر خالد خٹک کو گرفتار کر لیا۔

    بی ایس فزکس کی طالبہ ثنا ارشاد نے غازی یونیورسٹی کے پروفیسر ڈاکٹر ظفر وزیر اور ڈاکٹر خالد خٹک پر زیادتی اور بلیک میل کرنے کا الزام عائد کیا تھا۔ میبنہ زیادتی کیس کے ملزمان کے خلاف ثنا ارشاد اور اس کے والد ارشاد احمد کی مدعیت میں دو علیحدہ مقدمات درج ہیں۔

    یاد رہے کہ منگل کو غازی یونیورسٹی کی طالبہ ثنا ارشاد نے دو اساتذہ پر جنسی ہراسگی کا الزام لگایا تھا اور ایک ویڈیو میں کہا تھا کہ ڈاکٹر ظفر وزیر نے انھیں نشہ آور چیز پلا کر زیادتی کی، یہ ویڈیو سوشل میڈیا پلیٹ فارمز پر وائرل ہوئی۔ طالبہ نے و یڈیو بیان میں بتایا کہ یونیورسٹی پروفیسرز نے اپنے ہاسٹل بلایا اور بعد میں بلیک میل کرتے رہے کہ کسی کو کچھ نہیں بتانا۔

    طالبہ نے الزام عائد کیا کہ اب وہ میری چھوٹی بہن کو بھی بلیک میل کر رہے ہیں، اگر میری شکایت پر کچھ نہیں کیا گیا تو خود کو آگ لگا لوں گی، جس کے ذمے دار وائس چانسلر ہوں گے۔

    واضح رہے کہ اس سے قبل اسلامیہ یونیورسٹی بہاول پور کا شرمناک اسکینڈل ملک کے تعلیمی اداروں کی بدنامی کا سبب بنا تھا، جس کی تحقیقات تاحال جاری ہیں۔

  • ڈی جی خان میں دہشت گردی کا منصوبہ ناکام بنادیا گیا

    ڈی جی خان میں دہشت گردی کا منصوبہ ناکام بنادیا گیا

    جنوبی پنجاب کے ضلع ڈی جی خان میں سی ٹی ڈی نے دہشت گردی کا منصونہ ناکام بناتے ہوئے دو دوہشت گردوں کو گرفتار کرلیا ہے۔

    سی ٹی ڈی حکام کے مطابق تونسہ شریف کے قریب دہشت گردوں کی موجودگی پر خفیہ آپریشن کیا گیا، آپریشن کے دوران کالعدم ٹی ٹی پی کے دو دہشت گردوں کو گرفتار کیا گیا، گرفتار دہشت گردوں کی شناخت میزان غازی اور میر احمد کے نام سے ہوئی، دونوں دہشت گردوں کا تعلق ڈیرہ اسماعیل خان سے ہے۔

    یہ بھی پڑھیں: سوات میں دہشت گردی کا منصوبہ ناکام، 2 دہشت گرد ہلاک

    حکام سی ٹی ڈی کے مطابق گرفتار دہشت گردوں سے ہینڈ گرینیڈ،اسلحہ وبارود برآمد ہوا ہے، گرفتار دہشت گرد ڈی جی خان میں دہشت گردی کا منصوبہ بناچکے تھے، گرفتار دہشت گردوں کے خلاف مقدمہ درج کرتے ہوئے تفتیش شروع کردی ہے، نیٹ ورک میں شامل دیگردہشت گردوں کی گرفتاری کی کوششیں جاری ہیں۔

    واضح رہے کہ سی ٹی ڈی دہشت گردوں کی سرکوبی کے لئے مختلف شہروں میں ٹارگٹڈ آپریشن کرتی رہتی ہے، رواں ماہ کوہاٹ پولیس نے تخریب کاری کا منصوبہ ناکام بناتے ہوئے مرئی چیک پوسٹ کے قریب کارروائی کرتے ہوئے 5 ملزمان کو گرفتار کیا تھا۔

    کارروائی کے دوران بڑی تعداد میں گولہ بارود اور اسلحہ برآمد کیا گیا تھا۔

  • ویڈیو: زائرین سے بھری ٹریکٹر ٹرالی نہر میں گرنے سے 23 افراد ڈوب گئے

    ویڈیو: زائرین سے بھری ٹریکٹر ٹرالی نہر میں گرنے سے 23 افراد ڈوب گئے

    ڈی جی خان: ڈیرہ غازی خان میں زائرین سے بھری ایک ٹریکٹر ٹرالی نہر میں گرنے کے باعث 23 افراد ڈوب گئے۔

    تفصیلات کے مطابق گزشتہ روز ڈیرہ غازی خان میں سخی سرور جانے والے زائرین کی ٹریکٹر ٹرالی کو حادثہ پیش آیا ہے، ٹریکٹر بے قابو ہو کر نہر میں جا گری، جس کے باعث تئیس افراد ڈوب گئے ہیں۔

    ٹریکٹر ٹرالی میں 47 افراد سوار تھے، نہر میں گرنے والے 26 افراد کو ڈوبنے سے بچا لیا گیا، تاہم باقی افراد ڈوب گئے، جن میں سے 6 افراد کی لاشیں نکال لی گئی ہیں۔

    گزشتہ روز ڈوبنے والے افراد کی تلاش کے لیے آج ریسکیو آپریشن دوبارہ شروع کر دیا گیا ہے، نہر میں ڈوبنے والوں کی لاشوں کی تلاش جاری ہے۔

    اس افسوس ناک واقعے کی سی سی ٹی وی فوٹیج بھی سامنے آ گئی ہے جس میں ٹریکٹر ٹرالی کو نہر میں بے قابو ہو کر گرتے دیکھا جا سکتا ہے، ریسکیو ذرائع کا کہنا ہے کہ ٹرالی میں خواتین اور بچے بھی سوار تھے۔

  • ڈی جی خان : سرکاری اسکول میں 12 سالہ طالب علم کو خونخوار کتوں نے بھنبھوڑ کر مار ڈالا

    ڈی جی خان : سرکاری اسکول میں 12 سالہ طالب علم کو خونخوار کتوں نے بھنبھوڑ کر مار ڈالا

    ڈی جی خان : سرکاری اسکول میں 12 سالہ طالب علم کو خونخوار کتوں نے بھنبھوڑ کر مار ڈالا ، وزیر اعلیٰ پنجاب نے واقعہ کا نوٹس لیتے ہوئے کمشنرڈیرہ غازی خان سے رپورٹ طلب کرلی ہے۔

    تفصیلات کے مطابق جنوبی پنجاب کے ضلع ڈیرہ غازی خان کے سرکاری اسکول میں چھ کتوں نے ساتویں جماعت کے طالبعلم پر حملہ کردیا ،خوفزدہ طالبعلم مبشر بیہوش ہوکرگرا تو کتوں نے نوچ ڈالا۔

    ریسکیو کو پہنچنے میں تاخیر ہوئی تو زخمی مبشر کو موٹر سائیکل پر اسپتال لے جایا گیا تاہم وہ راستے میں دم توڑگیا۔

    وزیر اعلیٰ پنجاب نے واقعہ کا نوٹس لیتے ہوئے کمشنرڈیرہ غازی خان سے رپورٹ طلب کرلی اور غفلت کےمرتکب ذمہ داروں کے خلاف قانون کےمطابق کارروائی کی ہدایت کی۔

    وزیراعلیٰ پنجاب نےجاں بحق بچے کے لواحقین سےدلی ہمدردی اورافسوس کا اظہارکرتے ہوئے انصاف کی فراہمی یقینی بنانے کی یقین دہانی کروائی ہے۔

    ڈی جی خان کے اسکول میں کتوں کے کاٹنے سے طالبعلم کے جاں بحق ہونے کے واقعے پر وزیر اعلی پنجاب سردار عثمان بزدار کی ہدایت پر 5رکنی انکوائری کمیٹی تشکیل دے دی گئی ہے۔

    لاہور:ایڈیشنل ڈپٹی کمشنر جنرل ڈیرہ غازی خان کمیٹی کی قیادت کریں گے ، کمیٹی غفلت کےذمےداروں کا تعین کرکے کارروائی کی سفارش کرے گی اور افسوسناک واقعےکی روک تھام کے لیےضروری اقدامات تجویز کرے گی۔

    وزیر اعلی ٰ پنجاب عثمان بزدارنےکمیٹی سے 24 گھنٹے میں رپورٹ طلب کر لی ہے۔

  • خواجہ داؤد کے عثمان بزدار پر الزامات، پی ٹی آئی ارکان کا تنظیمی کارروائی کا مطالبہ

    خواجہ داؤد کے عثمان بزدار پر الزامات، پی ٹی آئی ارکان کا تنظیمی کارروائی کا مطالبہ

    ڈی جی خان: پاکستان تحریک انصاف کے رکن پنجاب اسمبلی خواجہ داؤد سلیمانی کے وزیر اعلیٰ پنجاب عثمان بزدار پر الزامات پر ڈیرہ غازی خان کے پی ٹی آئی ارکان اسمبلی عثمان بزدار کے حق میں بول پڑے ہیں۔

    تفصیلات کے مطابق ڈی جی خان سے پی ٹی آئی ارکان نے خواجہ داؤد کے وزیر اعلیٰ پر الزامات کو مسترد کرتے ہوئے خواجہ داؤد کے خلاف تنظیمی کارروائی کا مطالبہ کر دیا ہے۔

    پی ٹی آئی رکن سردار احمد علی خان دریشک کا کہنا تھا خواجہ داؤد کے پیچھے کون ہے، ہم بے نقاب کریں گے، اور بہت جلد ثبوت بھی منظر عام پر لے آئیں گے۔

    سردار دریشک نے کہا کہ خواجہ داؤد سینیٹ انتخاب سے قبل کسی اشارے پر متحرک ہوئے ہیں، اور وہ اپنی نا اہلی چھپانے کے لیے الزامات لگا رہے ہیں، خواجہ داؤد حلقے میں جاتے نہیں لوگ بھی ان سے نالاں ہیں۔

    پی ٹی آئی ایم پی اے کی پرویز الہٰی سے وزیر اعلیٰ کی شکایت

    انھوں نے کہا خواجہ داؤد کے پیچھے موجود قوتوں کو بے نقاب کیا جائے گا، حکومت کو چھوڑ کر کوئی اپوزیش میں نہیں جانا چاہتا، وزیر اعلیٰ پنجاب کی قیادت میں تمام پی ٹی آئی ارکان متحد ہیں۔

    حنیف پتافی نے بھی خواجہ داؤد کے حلقے میں کام نہ ہونے کا دعویٰ مسترد کر دیا، انھوں نے کہا خواجہ داؤد کے حلقے کے لیے ساڑھے 3 ارب روپے کا پیکج دیاگیا، جنوبی پنجاب میں ترقیاتی کاموں کا جال بچھایا جا رہا ہے، مجموعی بجٹ کا 33 فی صد جنوبی پنجاب کے لیے لازم قرار دیاگیا ہے، اختلاف رائے ہو سکتا ہے لیکن الزام تراشی نہیں ہونی چاہیے۔

  • نئی نویلی دلہن نے خودکشی کرلی

    نئی نویلی دلہن نے خودکشی کرلی

    ڈی جی خان: صوبہ پنجاب کے ضلع ڈیرہ غازی خان میں نوبیاہتا دلہن نے شادی کے دو روز بعد خودکشی کرلی۔

    اے آر وائی نیوز کی رپورٹ کے مطابق پنجاب کے ضلع ڈیرہ غازی میں نوبیاہتا دلہن نے شادی کے دو روز بعد ہی اپنی زندگی کا خاتمہ کرلیا۔

    پولیس کے مطابق 20 سالہ دلہن کی 2 دن پہلے پرویز نامی شخص سے شادی ہوئی تھی، پولیس کا کہنا ہے کہ مقتولہ کی لاش کو ضابطے کی کارروائی کے لیے اسپتال منتقل کردیا گیا ہے۔

    ڈی جی خان پولیس کا کہنا ہے کہ ابتدائی طور پر خودکشی کی وجوہات معلوم نہیں ہوسکیں، واقعے کی تحقیقات جاری ہیں۔

    مزید پڑھیں: دلہا نے دلہن کو قتل کرکے اپنی گردن کاٹ لی

    واضح رہے کہ گزشتہ ماہ جنوبی پنجاب کے ضلع اوچ شریف میں شوہر نے دلہن کو قتل کرکے اپنی گردن کاٹ لی تھی۔

    پولیس کا کہنا تھا کہ اوچ شریف میں حق مہر کا قیمتی پلاٹ واپس نہ کرنے پر جھگڑا ہوا خاوند نے نئی نویلی دلہن کو قتل کرکے تیز دھار آلے سے اپنی گردن کاٹ کر خودکشی کی کوشش کی۔

    پولیس کا کہنا تھا کہ زخمی شوہراجمل کو طبی امداد کے لیے اسپتال منتقل کردیا گیا ہے، مقتولہ نصرت کی شادی 4 ماہ قبل ہوئی تھی۔

  • ظالم مالک مکان کا 7 سالہ ملازمہ پر ڈنڈوں اور راڈ سے تشدد

    ظالم مالک مکان کا 7 سالہ ملازمہ پر ڈنڈوں اور راڈ سے تشدد

    ڈی جی خان: ڈیرہ غازی خان میں ظالم مالک مکان نے 7 سال کی ملازمہ کو ڈنڈوں اور راڈ سے بہیمانہ تشدد کا نشانہ بنا دیا، وزیر اعلیٰ پنجاب عثمان بزدار نے واقعے کا نوٹس لے لیا۔

    تفصیلات کے مطابق ڈی جی خان میں کلیم اللہ نامی شخص کے گھر ملازمہ فرزانہ سنجرانی رہائش پذیر تھی، ملزم نے ملازمہ پر ڈنڈوں اور راڈ سے بدترین تشدد کیا، جس کے باعث سات سالہ بچی کو اسپتال منتقل کر دیا گیا۔

    پولیس کا کہنا ہے کہ ملزم کے خلاف مقدمہ درج کر لیا گیا ہے تاہم اس کی گرفتاری عمل میں نہیں لائی جا سکی ہے، پولیس ملزم کی گرفتاری کے لیے چھاپے مار رہی ہے۔

    ادھر وزیر اعلیٰ پنجاب نے 7 سالہ گھریلو ملازمہ پر تشدد کا نوٹس لیتے ہوئے آر پی او ڈیرہ غازی خان سے فوری رپورٹ طلب کر لی ہے، انھوں نے ہدایت کرتے ہوئے کہا کہ بچی پر تشدد کے ذمہ دار کو فوری طور پر گرفتار کیا جائے۔

    عثمان بزدار کا کہنا تھا کہ معصوم بچی پر تشدد انتہائی افسوس ناک اور سماجی المیہ ہے، 7 سالہ بچی پر تشدد کی خبر سے بہت دکھ پہنچا، کمشنر ڈیرہ غازی خان کو بچی کا علاج معالجہ کرانے کی ہدایت کر دی ہے۔

    یاد رہے کہ 25 جولائی کو بھی کوٹ لکھپٹ میں گھریلو ملازمہ پر تشدد کا ایک واقعہ سامنے آیا تھا، مالک مکان نے 20 سالہ گھریلو ملازمہ پر موبائل چوری کا الزام لگا کر تشدد کیا تھا، ملازمہ سے تفتیش اور تشدد کی خود ہی ویڈیو بھی بناتا رہا، جو بعد ازاں اس نے ملازمہ کے لواحقین کو بھیجی۔

  • ڈی جی خان سے کلیئر 8افراد میں کورونا وائرس کی تصدیق

    ڈی جی خان سے کلیئر 8افراد میں کورونا وائرس کی تصدیق

    چنیوٹ : ڈی جی خان سےکلیئر8افرادمیں کوروناوائرس کی تصدیق ہوگئی ، ڈپٹی کمشنر کا کہنا ہے کہ محکمہ صحت اور سرویلنس ٹیموں کی کلیئرنس تک علاقے سیل رہیں گے۔

    تفصیلات کے مطابق ڈپٹی کمشنر محمدریاض نے ڈی جی خان سے کلیئر8 افراد میں کوروناوائرس کی تصدیق کردی اور بھوانہ کے 3،چنیوٹ کےایک گاؤں کوآئسولیشن کادرجہ دے دیا ہے۔

    ڈپٹی کمشنر کا کہنا ہے کہ چاروں دیہاتوں میں رہائشیوں کی نقل و حرکت پر مکمل پابندی ہوگی اور محکمہ صحت، سرویلنس ٹیموں کی کلیئرنس تک علاقے سیل رہیں گے۔

    یاد رہے گذشتہ ماہ کے آخر میں ڈیرہ غازی خان کے قرنطینہ سے بھی 26 زائرین کو کرونا وائرس ٹیسٹ کی رپورٹ منفی آنے پر گھروں کو روانہ کردیا گیا تھا، مذکورہ زائرین کا تعلق فیصل آباد سے تھا۔

    خیال رہے پنجاب سے کورونا وائرس کے مزید 86 کیسز کی تصدیق ہونے کے بعد مریضوں کی تعداد 2004 ہوگئی ہے،
    ترجمان کا کہنا ہے کہ مریضوں کے اعدادوشمار زائرین، تبلیغی ارکان، قیدی اور عام شہریوں کی درجہ بندی میں رکھے جا رہے ہیں۔

    ترجمان کے مطابق ڈی جی خان میں 213 زائرین، ملتان میں 359 زائرین، فیصل آباد میں 5 کنفرم زائرین میں کورونا وائرس کی تصدیق ہوئی ہے۔

    ترجمان پرائمری اینڈ سیکنڈری ہیلتھ کئیر کا کہنا ہے کہ رائے ونڈ مرکز میں 398، منڈی بہاوالدین میں 3، سرگودھا 13، وہاڑی 14، راولپنڈی میں 6، جہلم میں 10تبلیغی ارکان ، ننکانہ میں 2، گجرات 8، رحیم یار خان 15، بھکر 1، خوشاب 4، راجن پور 1، حافظ آباد میں 31، سیالکوٹ 4، لیہ میں 13 تبلیغی ارکان میں کورونا کی تصدیق ہوئی۔