کراچی: ڈی جی رینجرز میجر جنرل محمد سعید کا کہنا ہے کہ ٹارگٹڈ آپریشن کراچی سمیت سندھ بھر میں جاری رہے گا۔ دہشت گردوں اور پشت پناہی کرنے والوں کو جڑ سے اکھاڑ پھینکیں گے۔

تفصیلات کے مطابق ڈی جی رینجرز میجر جنرل محمد سعید نے کراچی کے مختلف سیکٹرز کا دورہ کیا اور افسران اور جوانوں سے ملاقات کی۔ ڈی جی رینجرز نے کراچی میں امن کی بحالی میں سندھ رینجرز کے کردار کو سراہا اور لیفٹینینٹ جنرل بلال اکبر کے اقدامات کو خراج تحسین پیش کیا۔

میجر جنرل محمد سعید نے دہشت گردوں کے خلاف آپریشن جاری رکھنے کے عزم کا اعادہ کرتے ہوئے کہا کہ دہشت گردی میں اندرونی و بیرونی طاقتوں کا پورا ادراک ہے جو شر پسند عناصر کو استعمال کر کے قیام امن میں رکاوٹ ڈالنا چاہتے ہیں۔

انہوں نے کہا کہ دہشت گردوں، عسکری ونگ، اغوا کاروں اور بھتہ خوروں کا خاتمہ یقینی بنائیں گے۔

ڈی جی رینجرز کا مزید کہنا تھا کہ عوام کی مدد سے دہشت گردوں اور سہولت کاروں کے مذموم مقاصد کو جڑ سے اکھاڑ کر کراچی میں پائیدار امن یقینی بنائیں گے اور مقصد کے حصول کے لیے کسی بھی قربانی سے دریغ نہیں کریں گے۔

کراچی : وزیراعلیٰ سندھ سید مراد علی شاہ نے کہا ہے کہ رینجرز نے کامیاب آپریشن کرکے کراچی کا امن بحال کیا،دہشت گردی کے مکمل خاتمے تک آپریشن جاری رہے گا۔

وزیراعلیٰ سندھ سید مراد علی شاہ نے آج آئی جی سندھ پولیس اور ہوم سیکریٹری کے ہمراہ رینجرز ہیڈ کوارٹر کا دورہ کیا جہاں ڈی جی رینجرز بلال اکبر نے وزیراعلیٰ کا استقبال کیا اور کانفرنس روم میں سندھ میں کیے گئے آپریشن کی تفصیلات سے آگاہ کیا۔

اس موقع پر وزیر اعلیٰ سندھ نے کہا کہ کراچی سمیت سندھ بھر میں امن وامان بحال کرنے میں رینجرزکی کوششیں قابل ستائش ہیں،رینجرز آپریشن کے باعث کراچی کی رونقیں بحال ہوئیں اور عوام نے سُکھ کا سانس لیا۔

وزیر اعلی سندھ کا کہنا تھا کہ معیشت کی بحالی اور صوبے کی تعمیر و ترقی کے لیے امن و امان کا قیام اولین ضرورت ہے جس کے لیے رینجرز کے جوانوں نے اپنی جانوں کے نذرانے پیش کیے ہیں جسے فراموش نہیں کیا جا سکتا۔

وزیر اعلیٰ سندھ سید مراد علی شاہ نے اس عزم کا اعادہ کیا کہ دہشت گردی کے مکمل خاتمے تک آپریشن جاری رہے گا تا کہ عوام کو آپریشن کے دور رس اور پائیدار فوائد مل سکیں۔