کراچی: سندھ حکومت نے لیاری میں عمارت گرنے پر ڈی جی سندھ بلڈنگ کنٹرول اتھارٹی ( ایس بی سی اے ) محمد اسحاق کھوڑو کو عہدے سے ہٹا دیا۔
تفصیلات کے مطابق لیاری عمارت گرنے کے واقعے پر اسحاق کھوڑو کیخلاف محکمہ جاتی کارروائی شروع کردی گئی۔
ڈی جی سندھ بلڈنگ کنٹرول اتھارٹی ( ایس بی سی اے ) محمد اسحاق کھوڑو کو عہدے سے ہٹا دیا گیا اور نوٹیفکیشن جاری کردیا گیا۔
محمد اسحاق کھوڑو کی جگہ شاہ میر خان بھٹو نئے ڈی جی ایس بی سی اے تعینات کر دیے گئے۔
اس سے قبل وزیراطلاعات سندھ شرجیل میمن نے پریس کانفرنس کرتے ہوئے کہا تھا کہ ڈی جی ایس بی سی اے کو معطل کر دیا گیا ہے۔
انھوں نے بتایا کہ وزیراعلیٰ سندھ نے ملوث افراد پر ایف آئی آر درج کرنے کا حکم دیا ہے، واقعے کے ذمہ داران کیخلاف سخت سے سخت کارروائی ہوگی اور عمارت گرنے میں ملوث افراد کے خلاف مقدمہ درج کیا جائے گا۔
زیراطلاعات سندھ کا کہنا تھا کہ لیاری میں درد ناک واقعہ ہوا، عمارت گرنے سے معصوم جانوں کا ضیاع ہوا، دکھ کی گھڑی میں لواحقین سے افسوس کا اظہار کرتے ہیں، وزیراعلیٰ سندھ نے آج ایک اہم اجلاس طلب کیا۔
شرجیل میمن نےکہا بلڈنگ کنٹرول اتھارٹی کا عملہ عمارت گرنے کا ذمے دار ہے، فیکٹ فائنڈنگ رپورٹ کیلئے دو دن کا وقت دیا گیا ہے فیکٹ فائنڈنگ کمیٹی کی رپورٹ پر ایکشن ہوگا۔
انھوں نے بتایا کہ کنٹونمنٹ سے باہر ایریاز میں بلڈنگ کنٹرول، کے ایم سی اور ڈی ایم سی کا رول ہے، وزیراعلیٰ سندھ نے کہا ہے جو بھی ذمہ دار ہیں فوری ایکشن لیں، پہلے کے بی سی تھا اب سندھ بلڈنگ کنٹرول اتھارٹی ہے۔
صوبائی وزیر کا کہنا تھا کہ ایس بی سی اے کسی میئر یا ڈسٹرکٹ کونسل کے انڈر نہیں ہوسکتا، گھر، پلاٹ یا فلیٹ کی خرید کے وقت دیکھیں این او سی ہے یا نہیں۔
انھوں نے مزید بتایا کہ کراچی میں 51 عمارتوں پر فوری ایکشن کیا جا رہا ہے، کہیں پر کوئی ایمرجنسی ہوگی تو حکومت متبادل فراہم کرے گی ، ایمرجنسی میں سیلاب زدگان اور کورونا متاثرین کی بھی مدد کی گئی تھی۔