پیرس: اولمپکس میں شریک بھارتی ریسلر انتم پنگھل اور ان کی ٹیم کو پیرس سے ڈی پورٹ کرنے کا فیصلہ کیا گیا ہے۔
بھارتی میڈیا رپورٹ کے مطابق انڈر 20 ورلڈ چیمپئن ریسلر انتم پنگھل کی بہن نشا ان کا ایکریڈیٹیشن کارڈ (اجازت نامہ) استعمال کرتے ہوئے پکڑی گئیں جس کے بعد انہیں پولیس کے حوالے کردیا گیا۔
میڈیا رپورٹ کے مطابق انتم پنگھل اپنا کچھ سامان اولمپکس ولیج میں بھول گئی تھیں جس کے بعد انتم نے اپنی بہن کو سامان واپس لانے کے لیے گیمز ولیج بھیجا تھا۔
رپورٹ کے مطابق انتم کی بہن کو گیمز ولیج سے سامان واپس لاتے ہوئے سیکیورٹی آفیسرنے پکڑ لیا اور پولیس کے حوالے کردیا۔
میڈیا رپورٹس کے مطابق پیرس اولمپکس میں بڑی ڈسپلنری خلاف ورزی کرنے پر ریسلر اور ان کی ٹیم کو ڈی پورٹ کیا جا رہا ہے، ایتھلیٹ کا اپنا ایکریڈیشن کارڈ کسی کو دینا ڈسپلن کی ایک بڑی خلاف ورزی ہے۔
دوسری جانب انڈین اولمپک ایسوسی ایشن کا کہنا ہے کہ فرانسیسی حکام کی نشاندہی پر انتم اور ان کے اسٹاف کو واپس بھیجنےکا فیصلہ ہوا ہے۔