کراچی(29 اگست 2025):سرجانی پولیس نے کار لفٹنگ کی متعدد وارداتوں میں ملوث مطلوب ملزم کو گرفتار کرلیا۔
تفصیلات کے مطابق سرجانی پولیس نے خفیہ اطلاع پر کچی آبادی میں کارروائی کرتے ہوئے کار لفٹنگ کی متعدد وارداتوں میں ملوث مطلوب ملزم کو گرفتار کرلیا، ملزم محمد علی سے سرکاری کار سمیت 5 گاڑیاں برآمد ہوئی ہے۔
ایس ایس پی ویسٹ طارق الٰہی مستوئی کے مطابق ملزم سے 9 ایم ایم پستول بھی برآمد ہوئی ہے، تمام گاڑیاں کراچی کے مختلف علاقوں سے چرائی گئی تھیں، ملزم نے عزیز بھٹی تھانے کی حدود سے سرکاری کار چوری کی تھی۔
طارق الٰہی کا کہنا ہے کہ گاڑی سندھ ٹیکنیکل ایجوکیشن اینڈووکیشنل ٹریننگ اتھارٹی کو الاٹ تھی، دوسری گاڑی عزیز آباد تیسری گلبرک سے چوری کی گئی تھی۔
حکام کا کہنا ہے کہ چوتھی بلال کالونی اور پانچویں جوہرآباد سے چوری کی گئی تھی، ملزم سے 4 گاڑیوں کے ٹیپ اور ٹائر بھی برآمد ہوا، ملزم ماسٹر چابی کے ذریعے کاریں چوری کرتا تھا۔
ایس ایس پی ویسٹ طارق مستوئی نے مزید کہا کہ گرفتار ملزم کچھ گاڑیوں کا سامان اور کہیں پوری گاڑی بیچ دیتا تھا، ملزم سے مزید پوچھ گچھ کا عمل جاری ہے۔
