ویڈیو رپورٹ: مرزا احمد علی
دریا کی چکنی مٹی سے بنائی جانے والے ٹائلز پر کی جانے والی صدیوں پرانی کاشی گری کا فن آج بھی زندہ ہے۔
ملتان کا شمار دنیا کے قدیم ترین شہروں میں ہوتا ہے صدیوں سے آباد شہر کے قدیم فنون میں سے ایک فن کاشی گری بھی ہے، مزارات پر لگی کاشی گری سے مزین ٹائلز ان کی خوب صورتی میں اضافہ کرتی ہیں۔
آنکھوں کو ٹھنڈا کرنے والے سفید نیلے اور فیروزی رنگوں سے سجی ملتانی کاشی ٹائلز مختلف مراحل سے گزر کر تیار کی جاتی ہیں، سب سے پہلے دریائے چناب سے چکنی مٹی لائی جاتی ہے، مٹی کو سکھا کر صاف کیا جاتا ہے، پھر پانی سے گوند کر سخت کیا جاتا ہے۔ دوبارہ صفائی کے بعد سانچے کی مدد سے ٹائل کی شکل دی جاتی ہے، جسے پیمائش کے مطابق کاٹ کر فنیشنگ کی جاتی ہے۔ خاص قسم کے سانڈ نامی پتھر کمپیوٹر سے کچی ٹائل پر استر لگایا جاتا ہے، بعد ازاں کوئلے کے پاؤڈر سے مختلف ڈیزائن بنا کر انھیں رنگ کیا جاتا ہے۔
ملتانی کاشی ٹائلز میں نیلارنگ خاص قسم کے پتھر لاجورد جب کہ فیروزی رنگ تابنے سے تیار کیا جاتا ہے۔ آخری مرحلے میں شیشے کے پیسٹ سے کور کر کے مٹی کی ٹائل کو 900 ڈگری سینٹی گریڈ تک بھٹی میں 12 گھنٹے کے لیے سینچا جاتا ہے۔ بھٹی سے تیار ہونے پر کاشی ٹائل کا ڈیزائن اور رنگ نکھر کر سامنے آتے ہیں۔
7 سہلیوں کے مزار سے جڑی کہانی کی حقیقت کیا ہے؟ ویڈیو رپورٹ
استاد محمد واجد اپنے خاندان کی چھٹی نسل سے ہیں جو فن کاشی گری سے منسلک ہیں، وہ اس قدیمی فن کو زندہ رکھنے کے خواہاں ہیں۔ اس قدیم فن سے مساجد، مدارس، مزارات اور دیگر تاریخی عمارتوں کے لیے مٹی کی ٹائلز، چھوٹے گنبد، مینار، اسلامی کیلری گرافی والی شیلڈز بھی تیار کی جاتی ہیں۔
محکمہ آثار قدیمہ کے الیاس خان کے مطابق مٹی کی ٹائلز ہڑپہ تہذیب میں تقریباً 7 ہزار سال سے موجود ہیں اور کاشی ٹائلز کا فن تغلق دور حکومت میں 800 سال قبل یہاں آیا، اور اس وقت سے قائم اولیائے کرام کے مزارات پر سجی ٹائلز آج بھی اپنی اصل حالت میں برقرار ہیں، اس کے قدرتی رنگ آنکھوں کو ٹھنڈا کرتے ہیں، یہ ٹائل عمارت کو موسمی اثرات سے مکمل محفوظ رکھتی ہیں۔
