پشاور: اسکول حملے میں ملوث دہشت گردوں کی شناخت ہوگئی ہیں، حملے کی قیادت کالعدم تحریک طالبان کا کمانڈر لئیس خان کر رہا تھا جبکہ دہشتگردوں کے زیرِ استعمال گاڑی بھی متعلقہ تھانے منتقل کر دی گئی ہے۔
پشاور میں معصوم طلباء کو خون میں نہلانے والے دہشتگردوں کی شناخت ہوگئی ہیں، ذرائع کا کہنا ہے کہ آرمی پبلک اسکول پر حملے کی قیادت کالعدم تحریکِ طالبان مہمند ایجنسی کا کمانڈر لئیس خان کررہا تھا، جس کا تعلق اپر دیر سے بتایا جاتا ہے۔
سیکیورٹی ذرائع کا کہنا ہے کہ جائے وقوعہ سے ایک ٹوپی بھی ملی ہے ،جس پر کمانڈر اپر دیر کے الفاظ تحریر ہیں۔
دوسری جانب پشاور واقعے میں دہشت گردوں کے زیرِ استعمال بر آمد ہونیوالی گاڑی متعلقہ تھانے منتقل کردی گئی ہے، پولیس کے مطابق گاڑی نمبر ون ایٹ سیون کا چیسس اور انجن نمبر بھی حاصل کرلیا گیا ہے، جسے تصدیق کےلیے مختلف اداروں کو بھجوایا گیا ہے۔
سوزوکی کیری کا رنگ سفید اور بشیر عنایت نامی شخص کی ملکیت ہے، انسدادِ دہشتگردی کی ٹیم بھی جائے وقوعہ پر تفتیش شروع کر چکی ہے، تحقیقاتی ٹیم اسکول کے مختلف اطراف کی فوٹو گرافی بھی کرے گی۔
واضح رہے گزشتہ روز دہشت گردوں نے پشاور آرمی اسکول پر حملہ کر کے 132 بچوں سمیت 141 افراد شہید ہوگئے تھے، حملہ کی ذمہ داری تحریکِ طالبان نے قبول کی تھی ، ترجمان طالبان کا کہنا تھا کہ یہ حملہ آپریشن ضربِ عضب کے جواب میں کیا گیا۔
