Tag: کالعدم تنظیم

کوئٹہ: بلوچستان پولیس کے محکمہ انسداد دہشت گردی فورس (کاؤنٹر ٹیررازم ڈیپارٹمنٹ) نے شہر میں کارروائی کرتے ہوئے  دہشت گردی کی کئی وارداتوں اور خودکش حملوں میں ملوث کالعدم تنظیم کے کمانڈر کو گرفتار کرلیا۔

ڈی آئی جی سی ٹی ڈی اعتزاز گورایہ نے ایف سی حکام کے ہمراہ پریس کانفرنس کرتے ہوئے بتایا کہ کوئٹہ سے کالعدم تنظیم کے اہم دشت گرد عبدالرحیم کو گرفتار کیا گیا جو خودکش حملوں سمیت ٹارگٹ کلنگ کی کئی وارداتوں میں ملوث ہے۔

اُن کا کہنا تھاکہ پولیس نے خفیہ اطلاع پر  کارروائی کی جس کے نتیجے میں عبدالرحیم گرفتار جبکہ قبصے سے دستی بم اور پستول بھی برآمد کیا۔ اعتزاز گورایہ کا کہنا تھا کہ دہشت گرد ہزارہ ٹاؤن، آئی جی پولیس کی رہائش گاہ پر ہونے والے حملوں اور گومل یونیورسٹی کے خودکش دھماکے میں ملوث تھا، اس کے علاوہ ملزم ہزاربرادری کی ٹارگٹ کلنگ کی 9 وارداتوں میں بھی ملوث ہے۔

ڈی آئی جی سی ٹی ڈی کا کہنا تھا کہ ملزم عبدالرحیم کی گرفتاری کوئٹہ ہزارہ ٹاؤن میں ہونے والی حالیہ ٹارگٹ میں اہم پشرفت ہے کیونکہ ملزم نے کئی وارداتوں کے اعتراف کیے، دہشت گرد کے مزید ساتھیوں کی گرفتاری کے لیے چھاپے مارے جارہے ہیں۔ اعتزاز گورایہ کا کہنا تھا کہ عبدالرحیم قانون نافذ کرنے والے اداروں کو مطلوب تھا جس کے سر کی قیمت 20 لاکھ روپے مقرر کی گئی تھی۔

یاد رہے کہ کوئٹہ میں ہزارہ برادری نے حالیہ ٹارگٹ کلنگ کے بعد شہر کے مختلف علاقوں میں بھوک ہڑتالی کیمپ لگائے ہوئے ہیں اُن کا مطالبہ ہے کہ ہمیں تحفظ فراہم کیا جائے۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

اسلام آباد : ایس ای سی پی نے کالعدم تنظیموں کو عطیات دینے پر پابندی عائد کرتے ہوئے جرمانے کا اعلان کردیا ہے جب کہ کالعدم تنظیموں سے منسلک افراد کے پر سفری پابندیاں بھی عائد ہوں گی.

تفصیلات کے مطابق وفاقی ادارے سیکیورٹیز اینڈ ایکسچینج کمیشن آف پاکستان نے ایک اعلامیہ جاری کیا ہے جس میں اقوام متحدہ کی پابندی فہرست میں موجود تمام تنظیموں کو عطیات دینا ممنوع  قرار دے دیا گیا ہے.

اعلامیہ میں کہا گیا ہے کہ پابندی کی خلاف ورزی کرنے والوں پر ایک کروڑ روپے تک جرمانہ ہوگا اس کے علاوہ  کالعدم تنظیموں اور ان سے  منسلک افراد پر سفری پابندیاں عائد کرتے ہوئے کالعدم تنظیموں اور افراد کے اثاثہ جات منجمد کردیئے گئے ہیں.

ایس ای سی پی کی جانب سے جاری اعلامیہ میں کالعدم تنظیموں جن پر پابندی عائد کی گئی ہے میں حافظ سعید کی جماعت الدعوۃ اور  فلاح انسانیت فاؤنڈیشن اقوام متحدہ کی پابندی فہرست میں شامل ہیں اس لیے ان پر بھی نوٹیفیکشن کا اطلاق ہوگا.

دوسری جانب اطلاعات ہیں کہ وفاق حکومت نے جماعۃ الدعوۃ اور فلاح انسانیت فاؤنڈیشن کے مالی اثاثے ضبط کرتے ہوئے دونوں تنظیموں کا انتظام سرکاری تحویل میں لینے کا بھی فیصلہ کیا ہے تاہم اس کی تصدیق نہیں ہو سکی ہے.

غیر ملکی خبر رساں ادارے رائٹرز نے اپنی خصوصی رپورٹ میں کہا ہے کہ وفاقی حکومت نے حافظ سعید کی سربراہی میں چلنے والی تنظیم جماعۃ الدعوۃ اور فلاحی ادارے فلاح انسانیت فاؤنڈیش کا نظم و نسق سنبھالنے کا حتمی فیصلہ کرلیا ہے.

رائٹرز نے یہ دعوی بھی کیا ہے اس بات کا فیصلہ 19 دسمبر کو ہونے والے اعلیٰ سطح کے اجلاس میں کیا گیا تھا جہاں صوبائی اور وفاقی حکومت کو دونوں تنظیموں کے اثاثہ جات کی تفصیلات جمع کرکے سرکاری تحویل میں لینے کے لیے اقدامات کرنے کے احکامات دے دیے گئے.

دوسری جانب جماعتہ الدعوہ کے ترجمان نے اس قسم کے کسی اقدام سے لاعلمی کا اظہار کرتے ہوئے کہنا تھا کہ حکومت پاکستان کی جانب سے دونوں تنظیموں کے اثاثہ جات یا سرکاری تحویل میں لیے جانے کے حوالے سے کوئی حکم نامہ موصول نہیں ہوا ہے.