Tag: کامران اکمل

قومی کرکٹ ٹیم کے سابق وکٹ کیپر بلے باز کامران اکمل کی پاکستان نیوزی لینڈ میچ سے قبل کی گئی پیش گوئی درست ثابت ہوگئی۔

آئی سی سی ون ڈے ورلڈکپ میں آج پاکستان اور نیوزی لینڈ کے درمیان اہم میچ کھیلا جارہا ہے، جس میں نیوزی لینڈ نے پاکستان کو اب تک کا سب سے بڑا 402 رنز کا ہدف دے دیا ہے۔

اے آر وائی نیوز کے ورلڈ کپ کے خصوصی پروگرام میں کامران اکمل نے میچ شروع ہونے سے قبل کہا تھا کہ پاکستان اگر ٹاس جیت لیتا ہے تو اسے پہلے بیٹنگ کرنی چاہئے، مگر اس کے برعکس پاکستان نے پہلے بالنگ کا فیصلہ کیا اور فیصلہ غلط ثابت ہوا۔

کامران اکمل کا کہنا تھا کہ پاکستان ٹیم مینجمنٹ زیادہ سمجھدار ہے، مجھے تو سارے سائنسدان ہی لگتے ہیں، یہ صرف باتیں کرنے کے لئے آئے ہیں جس میں یہ ماسٹر ہیں، کامران اکمل نے پاکستانی بالرز کو شدید تنقید کا نشانہ بنایا۔

واضح رہے کہ قومی کرکٹ ٹیم کے فاسٹ بولر حارث رؤف نے نیوزی لینڈ کے خلاف میچ میں منفی ریکارڈ اپنے نام کرلیا ہے۔ حارث روف ورلڈ کپ کی تاریخ میں پاکستان کے مہنگے ترین بولر بن گئے۔

پاکستان کے بہترین پیسر آج نیوزی کے خلاف بھی بُری طرح ناکام رہے، آج کے میچ میں انہوں نے دس اوورز میں 85 رنز دیے۔

آج کے اسپیل کے بعد حارث رؤف ورلڈکپ تاریخ میں پاکستان کے سب سے زیادہ رنز دینے والے بولر بن گئے، انہوں نے اس ورلڈکپ ایڈیشن میں سب سے زیادہ چھکے کھانے والے بولر ہونے کا ریکارڈ بھی اپنے نام کرلیا۔

آئی سی سی ون ڈے ورلڈکپ کے میچ میں قومی ٹیم کی آسٹریلیا کے ہاتھوں شکست کے بعد سابق کرکٹرز کی جانب سے شدید تنقید کا سلسلہ جاری ہے، ایسے میں قومی ٹیم کے سابق کرکٹر باسط علی بھی قومی ٹیم کے کھلاڑیوں سے ناراض دکھائی دیئے۔

اے آر وائی نیوز کے خصوصی ورلڈ کپ پروگرام میں بات کرتے ہوئے سابق کرکٹر باسط علی کا حارث رؤف کی خراب بولنگ پر بات کرتے ہوئے کہنا تھا کہ حارث رؤف کو پتہ ہے کہ اس کے پیچھے کوئی بولر نہیں ہے، ابھی حسنین یا احسان اللہ فٹ ہوتے تو حارث رؤف کی باڈی لینگویج بالکل مختلف ہوتی۔

باسط علی نے کہا کہ ابھی تو یہ چار بولرز ہی ہیں، آپشنز کی کمی ہے، کہ ہم نے ہی کھیلنا ہے، یہ ہمارے لئے ایک بہت بڑا لمحہ فکریہ ہے، کہ اللہ نہ کرے کوئی فاسٹ بولر ان فٹ ہوجاتا ہے تو ہمارے پاس اس کا متبادل کیا ہے؟ صرف زمان خان ہے، اس کے علاوہ کوئی نہیں ہے۔

سابق کرکٹر نے کہا کہ معذرت کے ساتھ کہنا پڑ رہا ہے کہ ٹیم میں اپنا اپنا ہورہا ہے، اپنی بولنگ کرلو، اپنی بیٹنگ کرلو، ہماری ٹیم ”ٹیم“ نہیں لگ رہی۔

سابق وکٹ کیپر کامران اکمل نے کہا کہ ہم انڈیا سے میچ ہارے ہیں، لیکن پہلے جب ہماری ٹیم آتی تو پہلے لڑتی تھی، لیکن آپ دیکھیں کہ آج بھی آج جس طرح کھیلے ہیں، سوائے شاہین کے علاوہ باقی چار بالرز نے کیا بولنگ کی ہے؟

واضح رہے کہ گزشتہ روز ورلڈ کپ کے 18ویں میچ میں آسٹریلیا نے پاکستان کو باآسانی 62 رنز سے شکست دے دی تھی۔ بنگلورو کے چناسوامی اسٹیڈیم میں کھیلے گئے میچ میں آسٹریلیا کی جانب سے دیے گئے 368 رنز کے تعاقب میں پاکستانی ٹیم 45.3 اوورز میں 305 رنز پر ڈھیر ہوگئی۔