کراچی : ایم کیو ایم پاکستان کی متنازعہ شخصیت کامران ٹیسوری نے کہا ہے کہ کل ٹنکی گراؤنڈ کے جلسے میں کارکن کی حیثیت سے شرکت کروں گا، اگر یہ سزا ہے تو بخوشی قبول ہے۔
ان خیالات کا اظہار انہوں نے ڈاکٹر فاروق ستار کی رہائش گاہ پی آئی بی کالونی پہنچ کر میڈیا سے گفتگو کرتے ہوئے کیا، اس موقع پر کامران ٹیسوری کا کہنا تھا کہ ایک ادنیٰ کارکن کی حیثیت سے اپنے سربراہ سے ملنے آیا ہوں، دیگر کارکنوں کے ساتھ گھر کے باہر بیٹھ کر سربراہ کا انتظار کروں گا اور فاروق ستار کے ہمراہ ریلی کی شکل میں ٹنکی گراؤنڈ جاؤں گا،۔
کامران ٹیسوری کا مزید کہنا تھا کہ کل ٹنکی گراؤنڈ میں ہونے والے جلسے میں بھی دیگر کارکنوں کے ہمراہ شرکت کروں گا، پتہ چلا ہے کہ بہادرآباد سے یہ شرط رکھی گئی ہے کہ میں جلسے کے دوران اسٹیج پر نہ بیٹھوں۔
مجھے بتایا گیا ہے کہ اب آپ کو کارکن بنا دیا گیا ہے، انہوں نے کہا کہ مجھے ایم کیو ایم پاکستان کا کارکن ہونے پر فخر ہے، اگر یہ سزا ہے تو مجھے اس سزا پر بھی خوشی ہے۔
مزید پڑھیں: افواہوں نے دم توڑ دیا، فاروق ستار اور عامر خان کی مشترکہ پریس کانفرنس
یاد رہے کہ گزشتہ دنوں فاروق ستار کی بہادرآباد آمد پر ان کے ساتھ آنے والے کامران ٹیسوری کو دفتر کے باہر ہی روک دیا گیا تھا، بعد ازاں پریس کانفرنس میں کامران ٹیسوری کے سوال پرعامر خان اور فاروق ستار ایک پیچ پر نظر آئے۔
فاروق ستار نے کہا کہ کامران ٹیسوری بہادر آباد آئیں، چائے اور بسکٹ کھلائیں گے، جس پر عامر خان نے کہا کہ کامران ٹیسوری کارکن ہیں، بہ حیثیت کارکن عزت دیں گے، بہادر آباد جو بھی آئے ہمارے لیے باعث عزت ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
