آکلینڈ: کامن ویلتھ گیمز میں پاکستانی ویٹ لفٹر مصطفی بیگ نے چار میڈل جیت کر نیوزی لینڈ میں سبز ہلالی پرچم بلند کردیا۔
اے آر وائی نیوز کے مطابق پاکستانی پاور لفٹر مصطفی بیگ نے 110 کلوگرام وزن کی کیٹیگری میں حصہ لیا، کامن ویلتھ میں مصطفی بیگ پاکستان کی نمائندگی کرنے والے واحد کھلاڑی ہیں۔
پاکستانی ویٹ لفٹر مصطفی بیگ نے بینچ پریس میں چاندی کا تمغہ، ڈیڈ لفٹ میں چاندی تمغہ، اسکواٹ میں چاندی کا تمغہ اور مجموعی طور پر چاندی کا تمغہ جیتا۔
مصطفی بیگ نے 2019 میں ایشین چیمپیئن شپ میں بھی پاکستان کے لیے دو گولڈ میڈل، ایک سلور اور ایک برانز میڈل جیتا تھا۔
مصطفی فاران بیگ ایشین اور کامن ویلتھ چیمپئن شپ میں بالترتیب سونے اور چاندی کے تمغے جیتنے والے واحد پاکستانی پاور لفٹر بن گئے ہیں۔
آکلینڈ نیوزی لینڈ میں جاری کامن ویلتھ گیمز چار دسمبر کو اختتام پذیر ہوں گی، کامن ویلتھ گیمز میں برطانیہ، کینیڈا، آسٹریلیا، ویلز، نیوزی لینڈ، انڈیا اور آئرلینڈ سمیت 43 ممالک نے حصہ لیا۔
کامن ویلتھ میں صرف بھارت نے مختلف کیٹیگریز میں تیس کھلاڑیوں کو میدان میں اتارا ہے۔
