ARYNews.tv | Urdu – Har Lamha Bakhabar

Tag: کامیاب سرجری

  • اولمپیئن ارشد ندیم کی لندن میں کامیاب سرجری

    اولمپیئن ارشد ندیم کی لندن میں کامیاب سرجری

    پیرس اولمپکس میں پاکستان کے لیے پہلا انفرادی گولڈ میڈل جیتنے والے اولمپیئن ارشد ندیم کی لندن میں کامیاب سرجری ہو گئی ہے۔

    پیرس اولمپکس 2024 میں جیولن تھرو ایونٹ میں اولمپک کی تاریخ کی ریکارڈ تھرو کر کے گولڈ میڈل جیتا تھا جس نے قوم سے سر کو فخر سے بلند کر دیا تھا۔

    پیرس اولمپکس میں گولڈ میڈل جیتنے کے بعد رواں برس ایشین ایتھلیٹکس میں بھی گولڈ میڈل جیتنے والے ارشد ندیم جنہوں نے سوئٹزرلینڈ میں جیولن تھرو کے انٹرنیشنل ایونٹ میں شرکت کرنا تھی۔ تاہم اچانک پرانی انجری نمودار ہونے کے باعث ان کی تیاریاں متاثر ہوئیں۔

    ارشد ندیم کو پنڈلی میں معمولی کھنچاؤ کے باعث ٹریننگ میں مشکل کا سامنا تھا اور ڈاکٹرز نے انہیں بھرپور ٹریننگ سے روک دیا تھا۔ جس کے بعد اولمپیئن نے ایونٹ سے دستبرداری کا اعلان کرتے ہوئے لندن میں علاج کرانے کا فیصلہ کیا تھا۔

    اولمپیئن ارشد ندیم جنہوں نے سوئٹزرلینڈ میں جیولن تھرو کے انٹرنیشنل ایونٹ میں شرکت کرنا تھی۔ تاہم اپنی فٹنس کے پیش نظر انہوں نے ایونٹ سے دستبرداری کا اعلان کرتے ہوئے لندن میں علاج کرانے کا فیصلہ کیا تھا۔

    بدھ کے روز اولمپیئن ارشد ندیم کی آج لندن کے کیمرج اسپتال میں ٹانگ کے مسلز کا کامیاب آپریشن کیا گیا ہے۔ یہ سرجری پاکستانی نژاد معالج ڈاکٹر علی باجوہ نے کی ہے۔ ان کا کہنا ہے کہ ارشد ندیم کو مقابلوں میں حصہ لینے میں وقت لگے گا۔

    ڈاکٹرز نے ارشد ندیم کو تین روز تک مکمل بیڈ ریسٹ کا مشورہ دیا ہے، جب کہ کل ان کا دوبارہ طبی معائنہ کیا جائے گا۔

    فخر پاکستان ارشد ندیم اگست کے پہلے ہفتہ تک لندن میں ہی قیام کریں گے۔

    واضح رہے کہ ارشد ندیم نے گزشتہ سال پیرس اولمپکس میں جیولن تھرو ایونٹ میں گولڈ میڈل جیت کر نہ صرف وطن عزیز کے لیے میڈلز کے حصول کا 40 سالہ قحط کا خاتمہ کیا تھا، بلکہ پاکستان کی تاریخ میں پہلا انفرادی گولڈ میڈل حاصل کرنے والے ایتھلیٹ کا اعزاز بھی حاصل کیا تھا۔

    رواں برس جنوبی کوریا میں ہونے والی ایشین ایتھلیٹکس چیمپئن شپ میں ارشد ندیم نے گولڈ میڈل اپنے نام کر کے 52 سال بعد پاکستان کو اس ایونٹ میں گولڈ میڈل جتوایا۔

  • جب ’نتھلی کا پیچ‘ پھیپھڑے میں جا پھنسا، آپریشن کی انوکھی کہانی

    جب ’نتھلی کا پیچ‘ پھیپھڑے میں جا پھنسا، آپریشن کی انوکھی کہانی

    کلکتہ : بھارت کے مقامی اسپتال میں ڈاکٹرز  نے کامیاب سرجری کرکے خاتون کے پھیپھڑے میں پیوست ’نتھلی کی کیل‘ نکال دی جو سانس کی نالی سے ہوتی ہوئی پھیپھڑوں میں پھنس چکی تھی۔

    یہ کہانی اس وقت منظر عام پر آئی جب اس واقعے کے ایک ماہ بعد خاتون ڈاکٹر کے پاس گئیں اور بتایا کہ ان کو مسلسل کھانسی اور سانس لینے میں تکلیف کے ساتھ نمونیا کی شکایت بھی ہے۔

    برطانوی نشریاتی ادارے بی بی سی کی رپورٹ کے مطابق کلکتہ کی رہائشی ورشا ساہو نامی خاتون نے بتایا کہ پچھلے ماہ جب مجھے مسلسل کھانسی اور سانس لینے میں دشواری پیش آرہی تھی تو میں نے معالج کے مشورے سے ادویات کا استعمال کیا لیکن کوئی افاقہ نہ ہوا۔

    nose pin

    انہوں نے بتایا کہ پچھلے ماہ میں کسی سے بات کر رہی تھی اس دوران جب گہرا سانس لیا اور سانس اندر کھینچتے ہوئے مجھے پتہ ہی نہیں چلا کہ کب یہ نتھلی کی کیل سانس کی نالی میں چلی گئی۔

     35 سالہ ورشا ساہو کے مطابق حادثاتی طور پر ناک میں پہنی جانے والی نتھلی کا پیچ گلے میں چلا گیا تو شروع میں زیادہ پریشانی نہیں تھی، میرا خیال تھا کہ یہ معدے میں جاچکی ہے اور نظام ہاضمہ کے ذریعے جسم سے باہر نکل جائے گی لیکن ایسا نہیں ہوا۔

    مجھے لگا یہ پیچ میرے پیٹ میں چلا گیا ہوگا لیکن یہ چھوٹی سی کیل پیٹ میں جانے کے بجائے پھیھڑے میں پھنس گئی اور کئی ہفتے تک سانس لینے میں تکلیف کا سامنا رہا۔

    X-ray

    ورشا ساہو کا کامیاب آپریشن کرنے والے ڈاکٹر دیبراج جاش کا کہنا ہے کہ یہ ایک نہایت غیر معمولی کیس تھا کیوں کہ گزشتہ دہائی میں ایسے صرف دو ہی کیسز سامنے آئے ہیں، کبھی کبھار ایسے مریض آتے ہیں کہ ان کے پھیپھڑے یا سانس کی نالی میں خشک میوہ جات کا کوئی دانہ پھنس جاتا ہے۔

    انہوں نے بتایا کہ ایسا زیادہ تر چھوٹی عمر کے بچوں یا 80 سال سے بڑی عمر کے افراد کے ساتھ ہوتا ہے۔ 35 سال کی عمر کی خاتون مریضہ کے ساتھ ایسا ہونا غیر معمولی بات ہے۔

  • شاہد خاقان عباسی کی نجی اسپتال میں کامیاب سرجری

    شاہد خاقان عباسی کی نجی اسپتال میں کامیاب سرجری

    اسلام آباد: مسلم لیگ ن کے رہنما و سابق وزیراعظم شاہد خاقان عباسی کی نجی اسپتال میں کامیاب سرجری ہوئی ہے، شاہد خاقان عباسی کو سرجری کے بعد کمرے میں منتقل کردیا گیا۔

    تفصیلات کے مطابق اسلام آباد کے نجی اسپتال میں مسلم لیگ ن کے رہنما و سابق وزیراعظم شاہد خاقان عباسی کا ہرنیا کا آپریشن کامیاب رہا، شاہد خاقان عباسی کو سرجری کے بعد کمرے میں منتقل کردیا گیا۔ خاندانی ذرائع کے مطابق شاہد خاقان عباسی کو مکمل ہوش میں آنے کے لیے 5 گھنٹے درکار ہیں۔

    ذرائع کے مطابق شاہد خاقان کو سرجری کے لیے 4 نومبرکو نجی اسپتال منتقل کیا گیا تھا، شاہد خاقان عباسی کا ہرنیا کا آپریشن 4 نومبر کو ہونا تھا، بلڈ پریشر بڑھنے پر سرجری مؤخر کی گئی تھی۔

    ذرائع کا کہنا ہے کہ شاہد خاقان کو مزید ایک ہفتے اسپتال میں زیرعلاج رکھا جائے گا، شاہد خاقان عباسی نجی اسپتال سے ذاتی خرچ پر علاج کرا رہے ہیں۔ پمز کے ڈاکٹرز نے گزشتہ ماہ شاہد خاقان کو ہرنیا کی سرجری تجویز کی تھی۔

    محکمہ داخلہ پنجاب نے شاہد خاقان عباسی کو نجی اسپتال منتقل کرنے کی منظوری دے دی

    یاد رہے کہ 4 نومبر کو محکمہ داخلہ پنجاب نے سابق وزیراعظم شاہد خاقان عباسی کو نجی اسپتال منتقل کرنے کی منظوری دی تھی۔وزارت داخلہ پنجاب نے آئی جی جیل خانہ جات کے نام مراسلہ لکھا تھا۔ مراسلے میں کہا گیا تھا کہ شاہد خاقان عباسی کو آپریشن کے لیے اسلام آباد کے نجی اسپتال منتقل کیا جائے، ان کی اسپتال منتقلی کے دوران فول پروف سیکیورٹی فراہم کی جائے گی۔

  • غیر واضح جنس کی تبدیلی : تیرہ سالہ کنزا کامیاب سرجری کے بعد عبداللہ بن گئی

    غیر واضح جنس کی تبدیلی : تیرہ سالہ کنزا کامیاب سرجری کے بعد عبداللہ بن گئی

    لاہور : پاکستان میں غیر واضح جنس کی تبدیلی کے پہلے سینٹر میں پہلی کامیاب سرجری کی گئی ہے، تیرہ سالہ کنزا کامیاب آپریشن کے بعد اب عبداللہ بن گئی، معروف سرجن ڈاکٹر افضل شیخ نے سرجری کی۔

    تفصیلات کے مطابق لاہور کے مقامی ٹرسٹ ہسپتال میں پاکستان میں غیر واضح جنس کی تبدیلی کے سینٹر نے کام شروع کر دیا ہے، اپنی نوعیت کے اس پہلے ادارے میں تیرہ سالہ کنزا کی پہلی کامیاب سرجری کی گئی۔

    یہ سرجری اپنے پیشے کے ماہر ڈاکٹر افضل شیخ نے بلامعاوضہ کی، ڈاکٹر افضل شیخ کے مطابق آٹھ ماہ قبل بیماری کے باعث کنزا کا چیک اپ کروایا گیا تو معلوم ہوا کہ وہ غیر واضح جنس کی حامل ہے۔

    برتھ ڈیفیکٹ فاؤنڈیشن کے سربراہ ڈاکٹر مرزا لیاقت علی کا کہنا ہے کہ کنزا سے عبد اللہ بننے کے بعد اب اسے کچھ عرصے نگہداشت میں رکھا جائے گا اور پھر جوان ہونے تک اس کا فالو اپ جاری رہے گا۔

    واضح رہے کہ جنس کی تبدیلی ایک ایسا فیصلہ ہے جس کے سبب ایک انسان کی زندگی میں انقلاب آجاتا ہے اور اس تبدیلی کے بعد سے وہ جس روپ میں اس دنیا میں آتا ہے اس کا وہ روپ ہی بدل جاتا ہے یہ ایک ایسا عمل ہے جس کے سبب ایک انسان کو جسمانی اور نفسیاتی دونوں طرح سے خود کو تبدیل کرنا ہوتا ہے۔

  • عبدالستار ایدھی کی آنکھیں دو نابینا مریضوں کو لگا دی گئیں

    عبدالستار ایدھی کی آنکھیں دو نابینا مریضوں کو لگا دی گئیں

    کراچی: لوگوں کی آنکھیں اشک بار کرنے والے ایدھی صاحب نے سفر آخرت پر جاتے ہوئے بھی سماجی کام نہیں چھوڑے، دنیا سے جاتے ہوئے دو نابینا افراد کو اپنے آنکھیں عطیہ کرگئے، کامیاب سرجری کے بعد دونوں افراد کی دنیا روشن ہوگئی۔

    عبدالستار ایدھی نے دنیا فانی سے رخصت سے قبل اپنی آنکھیں عطیہ کرنے کی وصیت کی تھی جس پر اہل خانہ نے عمل کرتے ہوئے ان کی آنکھیں عطیہ کردیں جو ایس آئی یو ٹی میں ٹرانسپلانٹ کرتے ہوئے دو مریضوں کو لگادی گئیں۔

    اس حوالے سے سندھ انسٹی ٹیوٹ آف یورولوجی اینڈ ٹرانسپلانٹ (ایس آئی یو ٹی)کے ترجمان کا کہنا ہے کہ دونوں مریضوں کی سرجری کامیاب رہی جو کہ ایس آئی یو ٹی میں کی گئی جس کے بعد اب دونوں مریض دیکھنے کے قابل ہوگئے ہیں.

    ترجمان ایس آئی یو ٹٰی نے مزید کہا کہ ’’ایدھی صاحب کی آنکھیں ان کی وصیت کے مطابق عطیہ کی گئی ہیں، ایدھی صاحب کے اس جذبے سے لوگوں کو اعضاء عطیہ کرنے میں ترغیب ملے گی، پاکستان میں ہرسال ڈیڑھ لاکھ سے زائد افراد اعضاء ناکارہ ہونے سے انتقال کرجاتے ہیں، اگر لوگوں میں اعضاء کرنے کی اہمیت کو اجاگر کیا جائے تو ان اموات پر کافی حد تک قابو پایا جاسکتا ہے۔

    انہوں نے مزید کہا کہ ’’عبدالستار ایدھی ایس آئی یوٹی اسپتال میں 10 سال تک زیر علاج رہے ہیں، ایدھی صاحب نے سب سے پہلے اپنے اعضاء عطیہ کرنے کا اعلان کیا جس کے بعد لوگوں نے متاثر ہوکر اعلانات کیے اور اب تک 2 ہزار افراد اپنے اعضاء عطیہ کرنے کی وصیت کرچکے ہیں‘‘۔

    انہوں نے مزید بتایا کہ ادارے کی پالیسی کےسبب مریضوں کی شناخت ظاہر نہیں کی جارہی تاہم ذرائع کا کہنا ہے کہ ایک مریض کا تعلق کراچی اور دوسرے مریض کا تعلق اندرون سندھ سے ہےدونوں کی عمریں 30 سال سے 60 سال کے درمیان ہیں۔