ہرنائی : خوست مائنز ایریا میں نامعلوم افراد نے فائرنگ کرکے چار کان کنوں کو قتل کردیا جبکہ آگ لگاکر کوئلے کی گیارہ کانوں کو جلادیا۔
تفصیلات کے مطابق ہرنائی کے علاقے خوست مائنز ایریا میں نامعلوم افراد کی جانب سے فائرنگ کی گئی ، جس کے نتیجے میں کوئلے کی کان میں کام کرنیوالے 4 افراد جاں بحق اور 3 زخمی ہوگئے۔
ضلعی انتظامیہ نے بتایا کہ مسلح افراد نے آگ لگاکر 11کوئلےکی کانوں کو جلادیا۔
لاشوں اور زخمیوں کو خوست منتقل کردیا گیا ہے، جاں بحق دو کان کنوں کا تعلق سوات اوردو کاتعلق قلعہ سیف اللہ مسلم باغ سےہے۔3
وزیراعلیٰ بلوچستان میرعبدالقدوس بزنجو نے خوست میں کان کنوں پرفائرنگ کی مذمت کرتے ہوئے 4 کان کنوں کےجاں بحق اور 3کے زخمی ہونے پر افسوس کا اظہار کیا۔
میرعبدالقدوس بزنجو کا کہنا تھا کہ غریب اوربےقصورمحنت کشوں کومارنےوالےانسان کہلانےکےلائق نہیں، ایسے قابل نفرت عمل میں ملوث عناصر سخت ترین سزا کے حق دار ہیں۔
انھوں نے مزید کہا کہ ملوث عناصر کی گرفتاری کیلئےتمام وسائل بروےکارلائےجائیں اور مائننگ کے علاقوں میں سیکیورٹی کو مزید سخت کیا جائے۔
