Tag: کتب خانے

لاہور جو کتب خانوں کا شہر اور لائبریری تحریک کا مرکز تھا، قیامِ پاکستان کے وقت رونما ہونے والے واقعات کے باعث اس کی تمام تر لائبریری سر گرمیاں ماند پڑ چکی تھیں۔ کتب خانوں میں کام کرنے والے عملے کی اکثریت ہندوؤں کی تھی، ان کے ہندوستان چلے جانے کی وجہ سے کتب خانے بند ہو گئے۔

۱۹۱۵ء میں قائم ہونے والا ’لائبریری اسکول‘ بند ہو گیا، لائبریری پروفیشن کا ترجمان رسالہ ’ماڈرن لائبریرین‘ کی اشاعت بند ہو گئی۔ ایسی صورتِ حال میں کتب خانوں کا قیام اور لائبریری تحریک کو بالکل ہی ابتداء سے شروع کرنے کی ضرورت تھی۔ یہ دور مصائب و مشکلات اور جدوجہد کا دور تھا۔ لائبریرین شپ سے تعلق رکھنے والی محترم شخصیات اور وہ لوگ جنہوں نے ہندوستان سے پاکستان ہجرت کی تھی سب ہی نے ان مشکل حالات میں لائبریرین شپ کے فروغ اور ترقی کے لیے خلوصِ دل کے ساتھ دن رات محنت کر کے نہ صرف لائبریری تحریک کی بنیاد رکھی بلکہ اسے پروان چڑھانے کی مسلسل انفرادی اور اجتماعی جدوجہد کرتے رہے ان احباب نے ایسی منصوبہ بندی کی کہ آج پاکستان لائبریرین شپ ترقی کے اعتبار سے دوسرے شعبوں سے کسی بھی طرح کم نہیں۔ ان قابلِ تعریف شخصیات میں خان بہادر اسد اللہ خان، محمد شفیع، نور محمد خان، خواجہ نور الٰہی، فضل الٰہی، عبدالسبحان خان، عبدالصبوح قاسمی، عبدالرحیم، ڈاکٹر محمد علی قاضی، الطاف شوکت، فرحت اللہ بیگ، جمیل نقوی، الحاج محمد زبیر، سید ولایت حسین شاہ، حبیب الدین احمد، ڈاکٹر عبدالمعید اور ابن حسن قیصر شامل ہیں۔ لائبریری تحریک کو منظم کرنے اور فروغ دینے میں یہ احباب انفرادی اور اجتماعی کوششیں کرتے رہے، ان میں ڈاکٹر عبدالمعید اگلی صف میں نظر آتے ہیں اور دیگر احباب ان کے شانہ بہ شانہ تھے، قیصر صاحب اس دور کے ایک سرگرم کارکن کی حیثیت سے ہر جگہ نظر آتے ہیں۔

لاہور ہی میں برطانوی ہندوستان میں قائم ہونے والی پنجاب لائبریری ایسوسی ایشن قیام پاکستان کے بعد ۱۹۴۸ء میں مغربی پاکستان لائبریری ایسو سی ایشن کے نام سے قائم ہوئی لیکن صوبوں کے ادغام کے بعد اسے دوبارہ پنجاب لائبریری ایسوسی ایشن کا نام دے دیا گیا۔ اس ایسوسی ایشن نے دسمبر ۱۹۴۹ء میں ’’ ماڈرن لائبریرین‘‘ ( نیو سیریز) شائع کیا لیکن یہ جولائی ۱۹۵۰ء میں بند ہو گیا۔ ۱۹۴۸ء میں پنجاب لائبریری ایسوسی ایشن نے لائبریری سائنس میں سر ٹیفکیٹ کورس شروع کیا لیکن یہ ایک سال میں بند ہو گیا۔ اِسی دوران ڈاکٹر عبدالمعید سندھ یونیورسٹی کے لائبریرین مقرر ہوئے اور لاہور سے کراچی منتقل ہو گئے۔

اب کراچی میں لائبریری سرگرمیوں کا آغاز ہوا۔ کراچی لائبریری ایسوسی ایشن ۱۹۴۹ء میں قائم ہوئی۔ اس ایسوسی ایشن نے لائبریری سائنس میں سر ٹیفکیٹ کورس بھی شروع کیا جو کراچی میں اپنی نوعیت کا اوّلین کورس تھا۔ اس کورس نے لائبریرین شپ کو بنیاد فراہم کرنے میں بہت مدد دی۔ پاکستان ببلو گرافیکل ورکنگ گروپ ۱۹۵۰ء اور پا کستان لائبریری ایسوسی ایشن کی بنیاد کراچی میں مارچ ۱۹۵۷ء میں رکھی گئی۔ قیصر صاحب ان اداروں کے قیام اور سر گرمیوں میں دیگر احباب کے ہمراہ خاموشی سے جدوجہد کرتے دکھائی دیتے ہیں۔ ۱۹۶۰ء میں پاکستان لائبریرین شپ میں ایک ایسی انجمن معرضِ وجود میں آئی جس نے مختصر وقت میں کتب خانوں اور لائبریری تحریک کے فروغ میں نمایاں کارکردگی کا مظاہرہ کر دکھایا۔ یہ انجمن شہید حکیم محمد سعید کی سر پرستی میں ’انجمن فروغ و ترقی کتب خانہ جات، اسپل (SPIL) کے نام سے قائم ہوئی۔ ایسوسی ایشن نے ملک کے مختلف شہروں میں لائبریرین شپ کے مختلف موضوعات پر یکے بعد دیگرے قومی نوعیت کے سیمینار، ورکشاپس اور کانفرنسیں منعقد کیں، کتب خانوں کے فروغ و ترقی کے منصوبے اور تجاویز حکومت کو پیش کیں۔ شہید حکیم محمد سعید نے نہ صرف اسپل (SPIL) کے پرچم تلے کتب خانوں کی ترقی کے لیے جدوجہد کی بلکہ دیگر لائبریری انجمنوں کی بھی سرپرستی کی اور ان کے تحت ہونے والے کتب خانوں کی ترقی کے پروگراموں کے ذریعہ حکومت کو ملک میں کتب خانوں کے قیام اور ترقی کا احساس دلاتے رہے۔

قیامِ پاکستان کا ابتدائی دور مسائل اور مشکلات کا دور تھا۔ حکومت بعض اہم اور قومی نوعیت کے امور کی انجام دہی میں مصروف رہی جس کے نتیجہ میں تعلیم بشمول کتب خانوں کی جانب فوری توجہ نہ ہو سکی۔ ملک میں کتب خانوں کے قیام اور لائبریری تحریک کے سلسلے میں حکومتِ پا کستان کی جانب سے جو اوّلین اقدام سامنے آیا وہ امپیریل لائبریری کلکتہ کے سابق لائبریرین‘ انڈین لائبریری ایسوسی ایشن کے بانی سیکریٹری، لائبریری ایسوسی ایشن لندن کے فیلو اور اسا ڈان ڈکنسن کے شاگرد خان بہادر خلیفہ محمداسد اللہ خان کا تقرر وزارتِ تعلیم حکومت پاکستان میں بطور ’’آفیسر بکارِ خاص‘‘ (Officer on Special Duty) تھا جنہوں نے ہندوستان کو خیر باد کہتے ہوئے پاکستان ہجرت کی۔ خان بہادر صاحب کو ہندوستان لائبریرین شپ میں بہت ہی بلند مقام حا صل تھا۔ ۱۹۳۵ء میں برطانوی حکومت نے انہیں اُن کی اعلیٰ لائبریری خدمات کے اعتراف میں ’’خان بہادر‘‘ کے خطاب سے نوازا۔ قدرت نے خان بہادر صاحب کو پاکستان میں بہت کم مہلت دی۔ وہ ۲۳ نومبر ۱۹۴۸ء کو رحلت کر گئے۔ مختصر عرصہ میں بھی انہوں نے پاکستان میں لائبریری تحریک اور ملک کی قومی لائبریری کی بنیاد رکھی۔ بقول ڈاکٹر ممتاز انور، اسداللہ نے افسر بکارِ خاص کی حیثیت سے کراچی میں مختصر عرصہ خدمات انجام دیں جہاں انہوں نے بنیادی نوعیت کے کام کیے۔ اس میں شک نہیں کہ ڈائریکٹریٹ آف آرکائیوز و لائبریریز اور نیشنل لائبریری ۱۹۴۹ء میں اسد اللہ کے کام کے نتیجے میں معرضِ وجود میں آئے۔ ‘ ڈاکٹر حیدر کا کہنا ہے کہ ’’ حقیقت خواہ کچھ بھی ہو ایک بات مسلمہ ہے وہ یہ کہ ۱۹۴۹ء میں ڈائریکٹریٹ آف آرکائیوز و لائبریریز کا قیام بہادر صاحب کی کوششوں کا مرہون منت ہے۔‘‘

اس طرح پاکستان میں لائبریری تحریک کا آغاز کراچی سے اور لاہور سے بیک وقت شروع ہوا۔ گویا لاہور سے انجمن سازی کا آغاز ہوا اور کراچی سے کتب خانوں کے قیام اور فروغ کے لیے منصوبہ بندی کی گئی۔ بعد ازاں انجمن سازی کی سرگرمیاں کراچی سے پورے آب و تاب سے شروع ہو گئیں۔

(کتاب یادوں کی مالا از قلم رئیس احمد صمدانی سے اقتباس)

انقلابات و حوادثِ زمانہ کے ہاتھوں علم و فضل اور تہذیب و تمدن کے مراکز بھی ایسے برباد ہوئے کہ زمانہ اس پر روتا ہے۔ سچ بھی یہی ہے کہ صدیاں گریہ کریں تب بھی تلافی کہاں ممکن۔ ہم کتب خانوں کی بات کررہے ہیں جن کا دامن دنیا بھر کے انمول موتیوں سے بھرا ہوا تھا۔ تشنگانِ علم آتے اور سیراب ہوتے۔

تاریخ کی ورق گردانی کریں تو معلوم ہوگا کہ جس طرح دنیا بھر میں اور قرطبہ، بغداد، قاہرہ و دیگر سلطنتوں کے زوال کے ساتھ ہی بادشاہوں اور صاحبانِ علم کی خصوصی سرپرستی اور مالی معاونت سے اذہان و قلوب کو منور کرنے والے کتب خانے ویران ہوگئے، اسی طرح لوٹ مار کے بعد ان میں اکثر برباد کر دیے گئے۔ توڑ پھوڑ کے ساتھ کتب خانوں کو جلا دیا گیا اور سپاہِ مخالف نے زیرِ قبضہ علاقوں کو روشنی سے محروم کرنے میں کوئی کسر نہ چھوڑی۔ کچھ کمی نہ کی۔

مغل اور دیگر مسلم ریاستوں کے والی و امرا کی سرپرستی میں کئی کتب خانے ہندوستان میں بھی موجود تھے جو کسی جنگ کے دوران ہی برباد نہیں ہوئے بلکہ لوٹ مار کی بھی نذر ہوئے۔ یہاں ایسے چند واقعات کا تذکرہ اہلِ علم و فن کو رنجیدہ کر دے گا۔

1739 میں نادر شاہ کے حملے میں دہلی کے کئی کتب خانے برباد ہوئے۔ افواج نے فقط مال و دولت ہی نہیں سمیٹا بلکہ کتب خانوں سے قدیم نسخے اور نوادر بھی لوٹ کر لے گئیں۔

1757 میں ابدالی نے ہندوستان پر لشکر کشی کی تو دہلی کا علمی خزانہ برباد ہوا۔ کہتے ہیں غلام قادر روہیلے نے قرآنی نسخے اور نادر کتابیں تک شاہی کتب خانے سے سمیٹ لی تھیں۔

یہ تو اس زمانے کے بادشاہوں کی لڑائیوں اور جنگوں کے دوران ہونے والی لوٹ مار تھی، مگر 1857 میں یعنی ہندوستان کی جنگ آزادی کے دوران بھی کئی نایاب قلمی نسخے، نوادر اور اہم موضوعات پر کتب برباد ہو گئیں اور عوام نے کتب خانوں میں لوٹ مار کی۔
کتب خانوں کی بربادی اور لوٹ مار کا نقشہ شمس العلما مولوی ذکا اللہ نے یوں کھینچا ہے۔

‘‘کتب خانے لٹنے شروع ہوئے۔ لٹیرے عربی، فارسی اردو وغیرہ کی کتابوں کے گٹھر باندھ کر کتب فروشوں، مولویوں اور طالب علموں کے پاس بیچنے لے گئے۔ بعض طلبا بھی جو کتابوں کے شائق تھے، اچھی اچھی کتابیں لے گئے۔ لوگوں نے کتابوں کے اچھے اچھے پٹے اتار لیے کہ جلد سازوں کے ہاتھ بیچیں گے اور باقی کو پھاڑ کر پھینک دیا۔’’

اس وقت مغلوں کے علاوہ سلطان ٹیپو وغیرہ کے کتب خانوں کی بہت سی کتب انگلینڈ بھیج دی گئیں۔ یہ کتابیں وہاں کے کتب خانوں میں سجائی گئیں۔

علامہ اقبال انہی کتابوں کو جب یورپ میں دیکھا تو کہا۔

مگر وہ علم کے موتی، کتابیں اپنے آبا کی
جو دیکھیں ان کو یورپ میں تو دل ہوتا ہے سی پارہ