Tag: کرائسٹ چرچ

اسلام آباد: نیوزی لینڈ کے شہر کرائسٹ چرچ میں مسجد حملے میں شہید ہونے والے پاکستانی شہری نعیم راشد کی والدہ کو نیوزی لینڈ کا ویزا جاری کر دیا گیا۔

تفصیلات کے مطابق نعیم راشد شہید کی والدہ کا نیوزی لینڈ کا ویزا جاری کر دیا گیا ہے، شہید کی والدہ نماز جنازہ اور تدفین میں شرکت کریں گی۔

نعیم راشد کی والدہ نے نیوزی لینڈ جانے کی خواہش کا اظہار کیا تھا، جس پر وزارتِ خارجہ کی جانب سے انھیں نیوزی لینڈ کا ویزا جاری کیا گیا۔

دریں اثنا، وزارتِ خارجہ میں سانحہ نیوزی لینڈ کے حوالے سے کرائسس مینجمنٹ سیل بھی قائم کر دیا گیا ہے، وزیر خارجہ کا کہنا تھا کہ شہدا کے لواحقین کو تمام ممکنہ سہولیات فراہم کی جائیں گی۔

شاہ محمود نے کہا کہ شہدا کے لواحقین کو درپیش مشکلات کے فوری ازالے کے لیے سیل قائم کیا گیا ہے، سانحے کے باقی شہدا کے لواحقین کے ساتھ بھی رابطے میں ہیں۔

یہ بھی پڑھیں:  سانحہ کرائسٹ چرچ: حکومت پاکستان کا پرچم سرنگوں کرنے کا اعلان

واضح رہے کہ کرائسٹ چرچ میں حملے کے سوگ میں پاکستان نے فیصلہ کیا ہے کہ کل قومی پرچم سرنگوں کیا جائے گا اور ملک بھر میں یومِ سوگ منایا جائے گا۔ پاکستان نے سانحے پر احتجاج بھی ریکارڈ کرایا ہے۔

میتوں کی حوالگی کا عمل کل سے شروع ہوگا، 6 خاندان اپنے افراد کی تدفین وہیں کرائسٹ چرچ میں کرنا چاہتے ہیں جب کہ 3 خاندانوں نے کہا ہے کہ وہ اپنے پیاروں کو پاکستان میں دفن کرنا چاہتے ہیں۔

صوابی: اسپیکر قومی اسمبلی اسد قیصر نے نیوزی لینڈ میں دہشت گردی کے خوف ناک واقعے کی مذمت کرتے ہوئے کہا ہے کہ انھوں نے نیوزی لینڈ کے ہم منصب کو تعزیتی خط لکھا ہے۔

تفصیلات کے مطابق صوابی میں میڈیا سے گفتگو کرتے ہوئے اسپیکر قومی اسمبلی نے کہا ’میں نیوزی لینڈ میں دہشت گردانہ واقعے کی مذمت کرتا ہوں، نیوزی لینڈ کے اسپیکر اسمبلی کو تعزیتی خط بھیجا ہے۔‘

اسد قیصر کا کہنا تھا کہ دنیا پر یہ واضح ہونا چاہیے کہ دہشت گردی کا کوئی مذہب نہیں ہوتا، خطرہ ہے یورپ میں لوگ انتہا پسندی کی طرف بڑھ رہے ہیں، عالمی رہنماؤں کو اس بارے میں سوچنا ہوگا۔

واضح رہے کہ ڈپٹی ہائی کمشنر معظم شاہ کے مطابق نیوزی لینڈ کے شہر کرائسٹ چرچ میں ہونے والی دہشت گردی کے واقعے میں 6 پاکستانی شہید، ایک زخمی، اور 3 لاپتا ہیں۔

یہ بھی پڑھیں:  کرائسٹ چرچ حملہ: بین الاقوامی میڈیا کی متعصبانہ رپورٹنگ

معظم شاہ کا کہنا تھا کہ نیوزی لینڈ کے عوام کی جانب سے بہت مدد کی جا رہی ہے، شاہ محمود قریشی کا کہنا تھا کہ نیوزی لینڈ کے حکام سے پاکستانی ہائی کمشنر کا مسلسل رابطہ ہے، شہدا کے لواحقین کے لیے ویزا سسٹم میں آسانی کریں گے۔

وزیر خارجہ شاہ محمود قریشی نے کہا کہ دیکھنا یہ ہوگا اس دہشت گردی کے واقعے کے پیچھے کیا محرکات ہیں، پاکستان اور ترکی او آئی سی کا ہنگامی اجلاس بلائیں گے۔

کرائسٹ چرچ: نیوزی لینڈ میں مسلمانوں کے خلاف دہشت گردی کی کارروائی میں بین الاقوامی میڈیا کی متعصبانہ رپورٹنگ جاری ہے۔

تفصیلات کے مطابق نیوزی لینڈ کے شہر کرائسٹ چرچ میں مسلمانوں کے خلاف دہشت گردانہ حملے کی رپورٹنگ میں بین الاقوامی میڈیا کا متعصبانہ رویہ سامنے آ رہا ہے۔

نیوزی لینڈ سانحے کو دہشت گردی کی کارروائی کہنا تو درکنار مسلمانوں کا قتل عام کرنے والے دہشت گرد کو لون ولف (Lone Wolf) قرار دے دیا گیا۔

گزشتہ روز کرائسٹ چرچ میں مساجد پر حملہ کر کے سفید فام دہشت گرد حملے میں پچاس مسلمانوں کا بہیمانہ قتل کیا گیا، جس پر عالمی میڈیا کی دوہری پالیسی سامنے آنے لگی ہے۔

دہشت گردی کی اس خوف ناک کارروائی پر عالمی شہرت یافتہ اخبار انڈیپنڈنٹ نے بھی دہشتگرد کی بجائے لون ولف (اکیلا بھیڑیا) اصطلاح استعمال کی۔

روزنامہ ٹیلی گراف نے بھی ایک دن گزرنے کے باوجود سانحے کو دہشت گردی کی کارروائی نہیں کہا، امریکی نیوز اور ریڈیو ادارے سی بی ایس کا کہنا تھا کہ عین ممکن ہے کہ حملہ آور ایک لون ولف ہو۔

یہ بھی پڑھیں:   مسلم کمیونٹی سے محبت اور  ہمدردی کا اظہار کریں: نیوزی لینڈ کی وزیر اعظم کا ٹرمپ کو مشورہ

ادھر نیوزی لینڈ کی نیوز ویب سائٹ نے بھی دہشت گردی کی کارروائی کو احمقانہ کارروائی لکھا، اسکائی نیوز نے دہشت گرد کا تعارف پُر سکون حملہ آور کے طور پر کروایا۔

خیال رہے کہ لون ولف کی اصطلاح دہشت گردی کی ایسی کارروائیوں کے لیے استعمال کی جاتی ہے جو کسی گروپ کی بجائے کسی اکیلے شخص نے کی ہو۔ چھوٹی تنظیموں کے دہشت گردانہ حملوں کو بھی لون ولف حملوں کے زمرے میں شامل نہیں کیا جاتا۔

اسلام آباد: ترجمان دفتر خارجہ ڈاکٹر محمد فیصل نے کہا ہے کہ نیوزی لینڈ دہشت گردی واقعے میں شہید ہونے والے باپ بیٹے کی تدفین کرائسٹ چرچ میں کی جائے گی، دہشت گردی کے متاثرین کے اہل خانہ ویزا کی درخواست دے سکتے ہیں۔

تفصیلات کے مطابق نیوزی لینڈ میں گزشتہ روز ہونے والے افسوسناک سانحے کے نتیجے میں شہید ہونے والوں میں 6 پاکستانی بھی شامل ہیں، ترجمان دفتر خارجہ نے کہا کہ نعیم رشید اور ان کے بیٹے طلحہ کی تدفین کے انتظامات مکمل کرلیے گئے ہیں، ان کی تدفین کرائسٹ چرچ میں کی جائے گی۔

ترجمان دفتر خارجہ کے مطابق نیوزی لینڈ میں پاکستانی کمیونٹی، ہائی کمیشن نے انتظامات کرنے میں تعاون کیا، مزید 4 شہید پاکستانیوں کے جسد خاکی پاکستان لانے کے انتظامات کررہے ہیں۔

مزید پڑھیں: کرائسٹ چرچ حملے کے ہیرو نعیم راشد کی والدہ کی عمران خان سے اپیل

ڈاکٹر محمد فیصل نے کہا کہ نیوزی لینڈ میں شہید افراد کے لواحقین کے لیے ویزا معاونت کی جائے گی، شہدا کے قریبی لواحقین ویزا اینڈ امیگریشن سائٹ پر درخواست جمع کراسکتے ہیں، پاکستان میں نیوزی لینڈ کے اعزازی قونصلر ویزا میں معاونت کریں گے۔

قونصل جنرل کو درخواست ای میل [email protected] کی جاسکتی ہے، نیوزی لینڈ ویزا کے لیے درخواست 03428200200 پر واٹس ایپ بھی کی جاسکتی ہے۔

واضح رہے کہ گزشتہ روز آسٹریلوی شہری برینٹن ٹرنٹ نے نیوزی لینڈ کی دو مساجد میں اندھا دھند فائرنگ کرتے ہوئے 46 نمازیوں کو شہید کردیا تھا، ملزم پر فرد جرم عائد کردی گئی ہے، شہید ہونے والوں میں 6 پاکستانی شہری بھی شامل ہیں۔