Tag: کراچی

کراچی میں پر تشدد واقعات میں دو افراد جاں بحق اور تین زخمی ہوگئے، رات گئے لیاری پھول چوک پر مبینہ پولیس مقابلے میں دو ملزمان ہلاک کر دیئے گئے۔

کراچی میں پر تشدد واقعات تھمنے کا نام نہیں لے رہے، لسبیلہ پل کے نیچے سے ایک شخص کی گولیوں سے چھلنی لاش برآمد ہوئی، لاش کو پولیس نے اسپتال منتقل کردیا، رات گئے گڈاپ کے علاقے جمالی گوٹھ میں ایک شخص کو ڈنڈوں کے وار کرکے قتل کر دیا گیا، پولیس واقعے کی مزید تحقیقات کر رہی ہے۔

دوسری جانب رینجرز نے کنواری کالونی سے نو ملزمان کو گرفتار کرکے ایک مغوی بازیاب کرالیا، کنور محمود نامی شخص کو کٹی پہاڑی سے اغواء کیا گیا تھا، ترجمان رینجرز کے مطابق گرفتار ہونے والوں میں کالعدم تنطیم کے کارندے بھی شامل ہیں، جن سے مختلف ہتھیار بھی بر آمد ہوئے۔

گرفتار ملزمان سے گذشتہ روز رینجرز موبائل پر حملے کے حوالے سے پوچھ گچھ کی جارہی ہے، رات گئے لی مارکیٹ پھول چوک کے قریب گینگ وار کے دو مسلح ملزمان نے پولیس پارٹی پر فائرنگ کردی، جوابی فائرنگ سے جان محمد عرف جانو اور جاوید عرف کرنٹ ہلاک ہوگئے۔

ادھر حساس اداروں کیجانب سے سینٹرل جیل پر ممکنہ حملوں کے پیش نظر جیل کے اطراف سیکورٹی سخت کر دی گئی ہے، جیل جانے والے راستوں پر ٹینکرز کھڑے کرکے بند کر دیا گیا جبکہ یونیورسٹی روڈ پر پولیس کی اضافی نفری تعینات کر دی گئی ہے۔
   

کراچی میں سندھ ہائیکورٹ سے زیر حراست ملزمان پھر فرار ہوگئے۔

شمس اللہ، نعمت اللہ اور بہاالدین کی عدالت نے درخواست ضمانت مسترد کر دی تو ملزمان بھاگ گئے اور پولیس منہ کھڑی تماشا دیکھتی رہ گئی، عدالت سے بھاگنے والے اغوا برائے تاوان کے ملزم ہیں۔

بتایا جا رہا ہے بھگوڑے ملزمان کراچی کے مضاربہ اسکینڈل میں بھی ملوث ہیں، ایک شہری نے رقم ڈبل ہونے کے لالچ میں ستر کروڑ روپے اسکیم میں جمع کرائے تو اسے ملزمان نے اغوا کرلیا اور بھاری تاوان کا مطالبہ کیا تھا۔

سندھ ہائیکورٹ ریڈ زون میں ہے، ایف آئی اے، پاسپورٹ اور سندھ انفارمیشن ڈپارٹمنٹ بھی سامنے ہی ہے، سخت ترین سیکورٹی کے باوجود ملزمان کا فرار ہونا سیکورٹی معاملات کیلئے خطرے کی گھنٹی بھی ہے۔
       

کراچی کے علاقے بنارس کی مارکیٹ میں آگ نے بائیس سے زائد دوکانوں کو اپنی لپیٹ میں لے لیا، فائربریگیڈ کی سات گاڑٰیوں نے چار گھنٹے کی جدو جہد کے بعد آگ پر قابو پالیا

بنارس کے علاقے میں قائم پرانے کپڑے کی ایک دوکان میں رات گئے اچانک آگ لگ گئی، جس نے دیکھتے ہی دیکھتے شدت اختیار کرلی اور دیگر دوکانوں کو بھی اپنی لپیٹ میں لے لیا، جس کے باعث بیس سے زائد دوکانیں جل کر خاکستر ہوگئیں تاہم فائر بریگیڈ کی سات گاڑیوں نے چار گھنٹے کی جدو جہد کے بعد آگ پر قابو پالیا۔

آ گ لگنے سے لاکھوں روپے مالیت کے کپڑے جل کر خاکستر ہوگئے، فائر بریگیڈ حکام کے مطابق تنگ راستوں کے باعث آگ پر قابو پانے میں دقت پیش آئی، تیز ہوا کے باعث آگ پھیلی تاہم آگ لگنے کی وجوہات معلوم نہیں ہوسکیں، بنارس کے علاقے میں قائم لنڈا بازار میں گرم کپڑے کمبل اور جیکٹ کے گودام واقع ہیں۔