کراچی کی مقامی عدالت نےسابق گورنربلوچستان کے بیٹے فبیہان مگسی اوراُن کے دوست اورنگزیب کی ضمانت منظورکرلی۔
عدالت نے ملزمان کو ایک ایک لاکھ روپے کےمچلکے جمع کرانے کی ہدایت کی،ڈیفنس کے علاقے میں سیکیورٹی گارڈ کو قتل کرنے کے الزام میں گرفتارفبیہان اور اورنگزیب کے چالان میں پولیس کی جانب سے موقف اختیار کیا گیاتھا کہ بظاہر لگتا ہے گولی جان بوجھ کر نہیں چلائی گئی۔ جس پر عدالت نے دونوں ملزمان کی ضمانت منظور کرلی۔
نوابشاہ ٹریفک حادثے کی ایک اور زخمی بچی کراچی کے نجی اسپتال میں دم توڑ گئی، جس کے بعد حادثے میں جاں بحق ہونیوالوں کی تعداد بائیس ہوگئی ہے۔
نوابشاہ کے ٹریفک حادثے کو تین روز بیت گئے، تین روز بعد بھی شہر میں سوگ کی فضا برقرار ہے، ہولناک سانحہ نے ننھی ہنستی کھیلتی کلیوں کو رونڈ ڈالا، کئی آنگن سونے ہوئے اور کئی ماؤں کی گودیں اجڑ گئیں۔
واقعے میں زخمی بچی نے کراچی کے نجی اسپتال میں دم توڑ دیا، جس کے بعد جاں بحق ہونیوالوٕں کی تعداد بائیس ہوگئی ہے، سات بچے اب بھی زندگی اور موت کی کشمکش میں نجی اسپتال میں زیر علاج ہیں۔
جن کی حالت بدستور تشویشناک ہے، سانحے میں شہید ہونے والے بچوں کیلئے سندھ بھر کی جامعات میں قران خوانی اور تعزیتی اجلاس ہوئے۔
کراچی کےعلاقے لیاری میں بدستور خوف و ہراس نے پنجے گاڑ رکھے ہیں، پولیس نے کورنگی انڈسٹریل ایریا میں کارروائی کرتے ہوئے مغوی بچی بازیاب کرالی۔
لیاری میں رات گئے دو گروپوں کے تصادم سے کشیدگی اور خوف ہراس پھیل گیا، لیاری میں اجارہ داری قائم کرنے کی جنگ نے مقامی لوگوں کو شدید اذیت میں مبتلا کر رکھا ہے، حالات کشیدہ ہونے پر لوگ گھروں میں محصور ہو کر رہ گئے۔
دوسری جانب رات میں بنارس کے قریب نامعلوم افراد نے فائرنگ کرکے دو افراد کو موت کے گھاٹ اتاردیا، گلشن اقبال یونیورسٹی روڈ پر ڈکیتی کے دوران مزاحمت پر فائرنگ سے ایک شخص زخمی ہوا۔
اُدھر کورنگی انڈسٹریل ایریا پولیس نے کاروائی کرکے تیرہ سالہ بچی بازیاب کرالی، کارروائی کے دوران فیاض نامی اغواکار کو گرفتار کرکے اسلحہ برآمد کرلیا گیا۔
پولیس کے مطابق ملزم بچی کو ڈیرہ اسماعیل خان سے اغوا کرکے کراچی لایا تھا، ملزم پنجاب اور خیبر پختون خواہ پولیس کو متعدد مقدمات میں مطلوب تھا، اورنگی ٹاؤن میں بھی پولیس نے کارروائی کرتے ہوئے سترہ مشتبہ افراد حراست میں لے لئے۔
راجن پور میں خوشحال خان خٹک ایکسپریس تخریب کاری کا شکار ہو گئی، راجن پور میں خوشحال خان خٹک ایکسپریس میں دھماکہ ہوا، جس کے نتیجے میں تین افراد جاں بحق اور درجنوں زخمی ہوگئے، ٹرین پشاور سے کراچی جارہی تھی، وفاقی وزیر ریلوے نے واقعے کی رپورٹ طلب کرلی۔
پشاور سے کراچی جانے والی خوشحال خان خٹک ایکسپریس کو راجن پور کے قریب دہشتگردی کا نشانہ بنایا گیا، ٹرین اپنی منزل کی جانب رواں دواں تھی کہ راجن پور کوٹلہ حسن شاہ کے قریب اچانک ہونے والے زور دار دھماکے ہوا، پوری ٹرین پٹری سے اتر گئی۔
دھماکے کے نتیجے میں پچاس سے زائد افراد زخمی ہوگئے، جاں بحق اور زخمی ہونے والوں کا تعلق خیبر پختونخوا کے مختلف شہروں سے ہے، واقعے کے بعد امدادی ٹیموں نے لاشوں اور زخمیوں کو مختلف اسپتالوں میں منتقل کیا، اسپتال میں وجود زخمیوں اور لواحقین کا کہنا ہے کہ جی ایم ریلویز انجم پرویز کے مطابق دھماکہ پٹری پر ہوا، جس سے ٹرین پٹری سے اتر گئی۔
دھماکے کے باعث لاہور سے کراچی ٹرینوں کی آمدورفت تعطل کا شکار ہوگئی، دھماکا ریمورٹ کنٹرول ڈیوائز سے کیا گیا، آر پی او ڈیرہ غازی خان کے مطابق دھماکہ ریموٹ کنٹرول ڈیوائس سے کیا گیا، ٹرین میں سوار مسافروں کو کشمور کے راستے روانہ کر دیا گیا ہے، پولیس کے مطابق جائے حادثہ کے ارد گرد کے علاقوں میں سرچ آپریشن جاری ہے۔
پشاور واقعے کے بعد سندھ میں میں جمعہ کے دن مساجد ، امام بارگاہوں، اور نماز جمعہ کے اجتماعات کے موقع پر سیکیورٹی کے موثر اقدامات کی ہدایت کردی گئی۔
ترجمان سندھ پولیس کے مطابق پشاور بم دھماکے کے بعد کراچی سمیت سندھ بھر میں سیکیورٹی کے انتظامات سخت کردیئے گئے ہیں، علاقوں میں موبائل موٹرسائیکل گشت سمیت پکٹنگ، ریکی، نگرانی، تمام راستوں پر ناکہ بندی اور اسنیپ چیکنگ موثر کرنے کے احکامات جاری کردیئے گئے ہیں۔
ترجمان سندھ پولیس کے کہنا ہے کہ پولیس پر حملوں کے بعد موبائل گاڑیوں پر کیمرے بھی نصب کرنے کا فیصلہ کیا گیا، جنہیں سینٹرل کمانڈ سے منسلک کیا جائے گا۔
پیپلزپارٹی اور تحریک انصاف کے درمیان رابطےہوئےہیں، جن میں کراچی میں بلدیاتی انتخابات کے حوالے سے بات چیت کی گئی۔
کراچی میں نئی سیاسی تبدیلی کا امکان پیدا ہو گیا ہے ، پیپلز پارٹی اور تحریک انصاف آئندہ بلدیاتی انتخابات میں مشترکہ امیدوار لانے یا سیٹ ایڈجسٹمنٹ پر معاہدے کے قریب پہنچ گئیں، پیپلزپارٹی کے تین رکنی وفد نے تحریک انصاف کے رہنما عمران اسمٰعیل سے ان کی رہائش گاہ پرملاقات کی ،اس ملاقات میں بلدیاتی انتخابات میں سیٹ ایڈجسٹمنٹ اورمشترکہ امیدوار لانے پرغور کیاگیا۔
ذرائع کے مطابق دونوں جماعتوں کے درمیان باہمی رابطے فعال اورمزید مضبوط بنانے پراتفاق کیاگیا ،دونوں جماعتوں میں آئندہ چند روز میں ایک اور ملاقات کرنے پر بھی اتفاق ہوا ہے۔ اگر دونوں سیاسی قوتیں ایک پلیٹ فارم پر بلدیاتی انتخابات میں حصہ لیتی ہین تو اس سے کراچی کی سیاست نیا رخ اختیار کر سکتی ہے ۔
کراچی کے مختلف علاقوں میں فائرنگ سے دو پولیس اہلکاروں سمیت چار افراد لقمہ اجل بن گئے، یونیورسٹی روڈ پر فائرنگ سے حساس ادارے کا اہلکار زخمی ہوگیا، کورنگی میں پولیس موبائل پر فائرنگ کرنے والے تین ملزمان کو گرفتار کرلیا گیا۔
کراچی میں قتل و غارت گری کا سلسلہ جاری ہے، شہر میں پولیس اور رینجرز کی ٹارگٹڈ کارروائیوں کے باوجود ٹارگٹ کلنگ کا سلسلہ تھم نہ سکا اور نہ ہی اس میں کمی نظر آرہی ہے، یونیورسٹی روڈ پر نامعلوم افراد کی کار پر فائرنگ سے ایک شخص زخمی ہوگیا جبکہ خاتون محفوظ رہی۔
ایس پی گلشن مقدس حیدر کا کہنا ہے کہ زخمی ہونے والا نوجوان حساس ادارے کا اہلکار ہے، پولیس حکام کے مطابق صبح سویرے تھانہ تیموریہ کی حدود شفیق موڑ کے قریب نامعلوم موٹرسائیکل سواروں افراد معمول کی گشت میں مصروف پولیس موبائل پر فائرنگ کرکے فرار ہوگئے۔
جسکے نتیجے میں دو پولیس اہلکارپینتیس سالہ محمد جاوید اور تیس سالہ آصف جان بحق ہوگئے جبکہ سلیم نامی پولیس اہلکار اور ایک راہگیر زخمی بھی ہوئے، کارساز کے قریب بھی نامعلوم افراد نے گاڑی پر فائرنگ کی، جسکے نتیجے میں سجاد نامی شخص چل بسا، جسکی لاش کو ضابطے کی کاروائی کیلئے اسپتال منتقل کیا گیا۔
رات گئے بلدیہ رشید آباد سے بھی ایک خاتون کی لاش ملی، گلستان جوہر میں بھی فائرنگ سے ایک شخص زخمی ہوگیا، کورنگی میں پولیس موبائل پر فائرنگ کرنے والے تین ملزمان کو گرفتار کرلیا گیا، ایسٹ زون پولیس نے مختلف کارروائیوں کے دوران بائیس ملزمان کو گرفتار کرکے اسلحہ منشیات اور چھینی گئی موٹر سائکلیں برآمد کیں۔
نیو کراچی میں شفیق موڑ پر کھڑی پولیس وین پر فائرنگ سے دو اہلکار جان بحق جبکہ دو زخمی ہوگئے۔
پولیس ذرائع کے مطابق کراچی کے علاقے نیوکراچی شفیق موڑ پر تیموریہ پولیس اسٹیشن کی کھڑی موبائل پر نامعلوم مسلح موٹر سائیکل سوار ملزمان نے فائرنگ کردی۔
جس کے نتیجے میں دو اہلکار موقع پر ہی جاں بحق جبکہ دو زخمی ہوگئے، حملہ آور فائرنگ کے بعد موقع سے فرار ہوگئے جبکہ زخمیوں کو فوری طور پر عباسی شہید اسپتال منتقل کردیا گیا۔
کراچی میں لیاری کے علاقے عثمان آباد میں دوگروپوں کے درمیان مسلح تصادم سے علاقے میں سخت خوف و ہراس پھیل گیا۔
ذرائع کے مطابق لیاری کے علاقے عثمان آباد دھوبی گھاٹ کے قریب مسلح گروپوں کی جانب سے ایک دوسرے پر جدید ہتھیاروں سے مورچہ بند فائرنگ کی گئی جبکہ اس موقع پر پانچ راکٹ بھی فائر کئے گئے، جن کی آواز سے پورا علاقہ گونج اٹھا۔
آخری اطلاعات آنے تک فائرنگ کا سلسلہ جاری ہے تاہم کسی جانی نقصان کی کوئی اطلاع موصول نہیں ہوئی۔
نواب شاہ حادثے میں زخمی چار طلباء کو کراچی کے نجی اسپتال منتقل کر دیا گیا۔
رات گئے نواب شاہ حادثے میں زخمی ہونے والے آٹھ طلباء کو نجی اسپتال لایا گیا، بچوں کے والدین کا کہنا ہے کہ ہسپتال لائے گئے طلباء کی حالت تشویشناک ہے، زخمی طلباء میں تین طالبات اور ایک طالب علم شامل ہے، جنہیں انتہائی نگہداشت کے وارڈ میں منتقل کیا گیا ہے۔
گزشتہ روز نواب شاہ میں اسکول وین کو حادثہ پیش آیا تھا، جس میں بیس سے زائد افراد جاں بحق ہوئے، جن میں بڑی تعداد طلباء کی ہے جبکہ آٹھ زخمی طلباء کو بہتر علاج کے لئے کراچی کے نجی اسپتال منتقل کیا گیا ہے۔