کراچی : کراچی میں نجی یونیورسٹی کی ٹیچر کی بہن کو اغوا کرلیا گیا ، پولیس نے واقعے کا مقدمہ درج کرکے شواہد اکٹھے کرنا شروع کردیئے ہیں۔
تفصیلات کے مطابق کراچی میں نجی یونیورسٹی کی ٹیچر کی بہن کو مبینہ طور پر اغواء کرلیا گیا ، ماڑی پور تھانے میں خاتون کے اغوا کا مقدمہ درج کر لیا گیا ہے۔
پولیس نے بتایا کہ مقدمہ نجی یونیورسٹی کی ٹیچر کی مدعیت میں درج کیاگیا، جس میں بتایا گیا کہ میں کسی کام سےگھرسےباہرگئی تھی،واپس آئی توبہن موجودنہ تھی، شبہ ہے 35 سالہ بہن کو کسی نے اغوا کیا ہے۔
پولیس کا کہنا ہے کہ خاتون کسی سے فون پر رابطےمیں تھی، ٹیکنیکل شواہد اکٹھے کیے جارہے ہیں ساتھ ہی خاتون کےموبائل فون کاڈیٹااورلوکیشن بھی حاصل کی جارہی ہے۔
یاد رہے اگست میں اورنگی ٹاؤن کے علاقے پیر آباد میں لڑکی کے اغواء اور پھر بازیابی کا واقعہ پیش آیا تھا، پولیس نے مغویہ کو بازیاب کرکے ایک ملزم کو گرفتار کیا تھا۔
اس حوالے سے پولیس نے بتایا تھا کہ ڈکیت گروہ کے 3 کارندے سی ٹی ڈی اہلکاروں کے بھیس میں ایک گھر میں گھسے اور 18سالہ لڑکی کو اسلحے کے زور پر زبردستی گاڑی میں بٹھالیا اور جب گاڑی لے کر جانے لگے تو لڑکی کا بھائی بھی زبردستی گاڑی میں بیٹھ گیا، مبینہ اغوا کاروں نے لڑکی کے بھائی کو تشدد کا نشانہ بنانے کے بعد علاقے میں ہی اتار دیا جس نے پولیس کو اطلاع دی۔
مغویہ کے بھائی نے پولیس کو ملزمان کی گاڑی کا رنگ اور نمبر بتایا، جس پر فوری کارروائی کرتے ہوئے اورنگی ٹاؤن سے لڑکی کو اس گاڑی سے بازیاب کرالیا گیا تھا۔
