Tag: کراچی ایئر پورٹ

کراچی : کراچی ایئر پورٹ پر عمرے کی آڑ میں بھیک مانگنے جانے والے 10 گداگروں کو گرفتار کرلیا گیا۔

تفصیلات کے مطابق ایف آئی اے امیگریشن نے کراچی ایئر پورٹ پر بڑی کارروائی کرتے ہوئے عمرے کی آڑ میں بھیک مانگنے جانے والے 10 گداگروں کو گرفتار کرلیا۔

حکام نے بتایا گرفتارملزمان میں 7خواتین بھی شامل ہیں ، ٹریول ایجنٹ نے گداگروں کے سفری دستاویزات کا بندوبست کیا۔

ایف آئی اے حکام نے ملزمان سے عمرہ ادائیگی کا بنیادی طریقہ کار پوچھا تو وہ ناواقف نکلے جبکہ مسافروں کے پاس ہوٹل بکنگ کے علاوہ اخراجات کیلئے کوئی رقم بھی موجود نہ تھی۔

دوسری جانب غلط پتہ دے کر سعودی عرب جانیوالی 2 خواتین بھی ایف آئی اے کے نرغے میں آگئیں، ایف آئی اے کے مطابق ملزمہ زرینہ اور شہناز نور نے خود کو سرگودھا کا ظاہر کیا لیکن پاسپورٹ پر جائے پیدائش رحیم یارخان لکھی تھی۔

خواتین نے دوران تفتیش سب سچ بتادیا خواتین پہلے بھی کئی مرتبہ عمرے کے ویزے پر سعودیہ جاچکی ہیں، خواتین کا تعلق بھیک مانگنے والے گروہ سے ہے۔

حکام کا کہنا ہے کہ تمام مسافروں کو گرفتار کرکے قانونی کارروائی کیلئے انسداد انسانی سرکل منتقل کردیا گیا ہے۔

کراچی : عمرے کی آڑ میں بھیک مانگنے کے غرض سے سعودی عرب جانے والی 2 مسافر خواتین کو گرفتار کرلیا گیا، ایک خاتون کا بیٹا بھی گداگری میں ملوث ہے۔

تفصیلات کے مطابق ایف آئی اے امیگریشن نے کراچی ایئر پورٹ پر بڑی کاروائی کرتے ہوئے عمرے کی آڑ میں گداگری میں ملوث 2 مسافر خواتین کوگرفتارکرلیا۔

ایف آئی اے حکام نے بتایا کہ مسافر خواتین کی شناخت پتل خاتون اور سبحانہ کے نام سے ہوئی، گرفتار خواتین کسی قسم کی ہوٹل بکنگ کے حوالے سے دستاویزات دینے میں ناکام رہی۔

حکام کا کہنا تھا کہ خواتین کے پاس کسی قسم کی سفری اخراجات کے حوالے سے رقم موجود نہ تھی ، ابتدائی تفتیش کے مطابق مسافر خاتون سبحانہ کا بیٹا غیر قانونی طور پر سعودی عرب میں مقیم ہے، گرفتار خاتون کا بیٹا عمرہ ویزا پر سال 2022 میں سعودی عرب گیا تھا۔

ایف آئی اے نے بتایا کہ خاتون کا بیٹا بھی گداگری میں ملوث ہے، جس کی معلومات حاصل کی جا رہی ہیں۔

حکام کا کہنا ہے کہ گرفتار مسافر خواتین کو مزید قانونی کاروائی کے لیے انسدادِ انسانی سمگلنگ سرکل کراچی منتقل کر دیا گیا ہے مزید تفتیش جاری ہے۔

یاد رہے ایف آئی اے امیگریشن نے کراچی ایئرپورٹ پر کارروائی کرتے ہوئے عمرے کی آڑ میں بھیک مانگنے کے غرض سے جانیوالے 11 مسافرون کو گرفتار کیا تھا۔

ایف آئی اے نے بتایا تھا کہ 8 خواتین سمیت 11 مسافروں کو آف لوڈ کر دیا گیا، ملزمان عمرے ویزے پر سعودی عرب جا رہے تھے، ملزمان کی جانب سے پیش کیے جانے والے ریٹرن ٹکٹ اور ہوٹل بکنگ بھی جعلی نکلے۔

کراچی : ایئر پورٹ سگنل کے قریب دھماکے کا مقدمہ 2 روز بعد درج کرلیا گیا ، جس میں کہا گیا کہ دھماکے کی ذمہ داری کالعدم بی ایل اے نے قبول کی۔

تفصیلات کے مطابق کراچی ایئر پورٹ کے سگنل کے قریب دھماکے کا مقدمہ سی ٹی ڈی میں درج کرلیا گیا، مقدمہ سرکار کی مدعیت میں درج کیا گیا۔

مقدمے میں دہشت گردی، قتل،اقدام قتل سمیت دیگردفعات شامل کی گئیں ہیں اور کہا گیا کہ حملہ ملک کی ساکھ کو نقصان پہنچانے کے لئے کیا گیا۔

مقدمے کے متن میں کہنا تھا کہ دھماکے کی ذمہ داری کالعدم بی ایل اے نے قبول کی، دھماکے میں چینی شہریوں کو نشانہ بنایا گیا۔

یاد رہے اتوار کو کراچی میں جناح انٹرنیشنل ایئرپورٹ کے قریب سگنل پر خوفناک دھماکے میں تین غیر ملکی افراد جان سے گئے تھے جبکہ چار پولیس اور دو رینجرز اہلکاروں سمیت سترہ افراد زخمی ہوگئے تھے۔

تفتیشی ذرائع کا کہنا تھا کہ ایئر پورٹ کے قریب خودکش دہشتگرد ٹریفک سگنل پر چینی باشندوں کے قافلے کے نکلنے کا انتظار کررہا تھا، جیسے ہی قافلہ قریب پہنچا اس نے گاڑی ٹکرادی۔

ذرائع نے کہا کہ دھماکا اتنا شدید تھا کہ بم پروف گاڑی بھی شدید متاثر ہوئی، دھماکے میں دو چینی انجینئرز ہلاک ہوئے جبکہ ایک زخمی ہوا، زخمی ہونےوالے سولہ افراد میں پولیس اور رینجرز اہلکار بھی شامل ہیں جبکہ دھماکے میں پندر ہ سے زائد گاڑیوں کو نقصان پہنچا۔