ARYNews.tv | Urdu – Har Lamha Bakhabar

Tag: کراچی بارش

  • بارش کے دوران یونیورسٹی پوائنٹ میں رات گزارنے والے میڈیکل طلبہ کا شدید احتجاج

    بارش کے دوران یونیورسٹی پوائنٹ میں رات گزارنے والے میڈیکل طلبہ کا شدید احتجاج

    کراچی (23 اگست 2025): بارش کے دوران یونیورسٹی پوائنٹ میں رات گزارنے والے میڈیکل طلبہ نے اگلے دن آن لائن کلاس کے میسجز ملنے پر شدید احتجاج کیا۔

    تفصیلات کے مطابق کراچی میں مون سون بارشوں کے دوران کئی گھنٹے سڑکوں پر گزرانے والے طلبہ و طالبات نے احتجاج کیا، اور جناح سندھ میڈیکل کالج کا مرکزی گیٹ بند کر دیا۔

    جناح سندھ میڈیکل کالج کے طلبہ و طالبات کا کہنا تھا کہ موسلا دھار بارش کے دوران انھوں نے رات بھر یونیورسٹی پوائنٹ میں گزاری، صبح گھروں کو پہنچے تو یونیورسٹی سے آن لائن کلاس کا میسج موصول ہوا۔

    طلبہ کا کہنا تھا کہ شہر بھر میں بجلی کی سپلائی بند تھی، اور جہاں لائٹ تھی وہاں انٹرنیٹ سروس متاثر تھی، جب کہ صبح 7 بجے گھروں سے نکلے اگلے دن صبج 6 بجے گھروں کو پہنچے تھے ایسے میں آن لائن کلاس کے لیے طلب کیا جانا نا انصافی تھا۔

    کراچی: جناح اسپتال میں وارڈ کی چھت کا پلستر گرنے سے نرس زخمی

    طلبہ کے مطابق سیشن کا وقت اختتام پذیر ہے، اچانک 80 فی صد لازمی حاضری کے احکامات دیے گئے ہیں، تیز بارش کے باوجود پوائنٹ بھی تاخیر سے چلائے گئے تھے، جس پر احتجاجی طلبہ و طالبات مشتعل ہو گئے ہیں اور انصاف کی فوری فراہمی کا مطالبہ کر رہے ہیں۔

    احتجاج کے دوران طلبہ اور رجسٹرار جناح سندھ میڈیکل کے درمیان مذاکرات بھی ہوئے، رجسٹرار کا کہنا ہے کہ طلبہ و طالبات کے مسائل کو توجہ سے سنا گیا ہے، بارش کی شدت بہت زیادہ تھی اور ٹریفک جام کے باعث تاخیر ہوئی، ہم نے پوری ذمہ داری سے طلبہ و طالبات کو گھروں تک پہنچایا۔

    رجسٹرار کا کہنا تھا کہ طلبہ کے مسائل کا انھیں پورا احساس ہے، بارش کے دوران بھی طلبہ و طالبات اور اساتذہ کے درمیان مستقل رابطہ تھا، آئندہ مون سون بارشوں کے حوالے سے اقدامات کریں گے، جب کہ بعض مسائل کی نشان دہی کی گئی ہے جو فوری حل کریں گے۔

  • کراچی میں گزشتہ روز سب سے زیادہ بارش کہاں ہوئی؟

    کراچی میں گزشتہ روز سب سے زیادہ بارش کہاں ہوئی؟

    کراچی(21 اگست 2025): شہر قائد میں منگل سے جاری مون سون کے طوفانی اسپیل کے تحت 100 ملی میٹر سے زائد بارش ریکارڈ کی گئی۔

    ،محکمہ موسمیات نے گزشتہ 24 گھنٹوں میں ہونے والی بارش کے اعداد و شمار جاری کر دیے جس کے مطابق سب سے زیادہ بارش اورنگی ٹاؤن میں 113 ملی میٹر ریکارڈ کی گئی جبکہ فیصل بیس پر 43 ملی میٹر بارش ریکارڈ ہوئی۔

    محکمہ موسمیات کا بتانا ہے کہ کورنگی میں 36، کیماڑی میں 31، جناح ٹرمینل پر 28 اور یونیورسٹی روڈ پر 24 ملی میٹر بارش ریکارڈ ہوئی، یونیورسٹی روڈ، پی ایف مسرور بیس میں 24 ملی میٹر بارش ریکارڈ کی گئی۔

    محکمہ موسمیات کے مطابق گلشن حدید میں 20، ڈیفنس فیز فائیو میں 20، سعدی ٹاؤن میں 15.9 ملی میٹر بارش ریکارڈ کی گئی، سب سے کم بارش گلشن معمار میں 6.8 ملی میٹر ریکارڈ کی گئی۔

    اس کے علاوہ منگل کے روز کے اعداد و شمار کے مطابق گلشنِ حدید میں سب سے زیادہ 145 ملی میٹر بارش ہوئی جب کہ کیماڑی میں 137 ملی میٹر اور جناح ٹرمینل پر 135 ملی میٹر بارش ہوئی۔

    اولڈ ایئرپورٹ پر 125 ملی میٹر اور سعدی ٹاؤن میں 123 ملی میٹر بارش ہوئی۔ گلستانِ جوہر میں 122.4 ملی میٹر، ڈیفنس اور کلفٹن میں 121 ملی میٹر بارش ریکارڈ ہوئی۔

    شاہراہ فیصل میں 114 ملی میٹر اور سرجانی ٹاؤن میں 111.2 ملی میٹر بارش ہوئی۔ کورنگی میں 96.6 ملی میٹر ناظم آباد میں 82 ملی میٹر بارش ریکارڈ کی گئی۔

  • کراچی میں اگلی بارش کب ہوگی؟

    کراچی میں اگلی بارش کب ہوگی؟

    کراچی (20 اگست 2025): گزشتہ روز شہر قائد میں موسلادھار بارش کے بعد پیدا ہونے والی تکلیف دہ صورت حال کے پیش نظر شہری اگلی درست پیشگوئی کے لیے اداروں کی جانب سے دیکھ رہے ہیں، تاہم ایک بار پھر مختلف اداروں کی جانب سے مختلف اطلاعات موصول ہو رہی ہیں۔

    محکمہ موسمیات کا کہنا ہے کہ کراچی کے شمال مشرق میں بارش کا سسٹم بن رہا ہے، ریڈار کے مطابق ہوا کا کم دباؤ موسلادھار بارش کی شکل اختیار کر سکتا ہے، ہوا کا کم دباؤ شمال مشرقی کی جانب گامزن ہے جو شدید بارش کا باعث بنے گا۔

    اگرچہ نیشنل ایمرجنسی آپریشن سینٹر (این ای او سی) نے بھی کہا ہے کہ اگلے 12 سے 24 گھنٹوں میں کراچی میں موسلادھار بارشیں متوقع ہیں، تاہم محکمہ موسمیات کی جانب سے جاری بیان میں یہ کہا گیا ہے کہ آج دوپہر 2 بجے کے بعد گرج چمک کے ساتھ بارش کا امکان ہے۔

    محکمہ موسمیات کے مطابق شہر کے شمال و شمال مشرق میں بارش برسانے والے بادل موجود ہے، بارش کا سلسلہ وقفے وقفے سے رات تک جاری رہ سکتا ہے، کچھ علاقوں میں موسلا دھار بارش کا امکان ہے۔ موسمیات کا یہ بھی کہنا ہے کہ کراچی میں آج اور کل اربن فلڈنگ کا بھی خدشہ ہے، اور کراچی سمیت سندھ بھر میں 23 اگست تک بارشوں کا موجودہ سلسلہ جاری رہنے کی توقع ہے۔

    کراچی میں ایک دن بارش کے تین اسپیل، مزید دو روز تیز بارش کی پیشگوئی

    دوسری طرف این ای او سی کا کہنا ہے کہ کراچی میں موسلادھار بارش اگلے 12 سے 24 گھنٹوں میں متوقع ہے، اور حیدرآباد، ٹھٹہ، بدین، میرپورخاص، سکھر میں بھی مختصر وقت میں 50 سے 100 ملی میٹر بارش ہو سکتی ہے، جب کہ اربن فلڈنگ کا بھی خدشہ ہے۔

    یہ واضح نہیں ہو سکا ہے کہ اگلی بارش آج دو بجے کے بعد قریبی وقت میں ہو سکتی ہے یا بارہ گھنٹوں کے بعد آغاز ہوگا، نیشنل ایمرجنسی آپریشن سینٹر نے ٹھٹہ، بدین، جامشورو اور دادو کے حوالے سے سیلاب کے خطرے سے بھی خبردار کیا ہے۔

    دریائے سندھ اور قریبی ندیوں میں پانی کی سطح بڑھنے سے نچلے علاقوں میں طغیانی کا خدشہ ہے، اور مرکزی شاہراہوں اور مقامی سڑکوں کے زیر آب آنے سے آمد و رفت متاثر رہنے کا امکان ہے، بجلی اور ٹیلی کمیونیکیشن سروسز میں تعطل کا دورانیہ بھی بڑھ سکتا ہے، ہدایت کی گئی ہے کہ سیلاب کے خطرے سے دوچار علاقوں کے رہائشی قیمتی اشیا اور مویشی محفوظ مقامات پر منتقل کریں۔

  • کراچی: 24 گھنٹوں میں سب سے زیادہ بارش کہاں ہوئی؟

    کراچی: 24 گھنٹوں میں سب سے زیادہ بارش کہاں ہوئی؟

    شہر قائد میں گزشتہ رات مون سون کی پہلی بارش سے موسم خوشگوار ہوگیا، سب سے زیادہ بارش سرجانی ٹاؤن میں ریکارڈ کی گئی۔

    تفصیلات کے مطابق کراچی میں جمعرات کی رات سے کہیں ہلکی تو کہیں تیز بارش کا سلسلہ جاری ہے جس سے گرمی کا زور تو ٹوٹ گیا لیکن شہر کا نظام درہم برہم ہوگیا، محکمہ موسمیات کا کہنا ہے کہ شہر میں آج بھی بادل برسیں گے، آج شام ھی وقفے وقفے سے بوندا باندی اور بارش متوقع ہے۔

    محکمہ موسمیات کی جانب سے کراچی میں گزشتہ روز سے اب تک ہونیوالی بارشوں کے اعدادوشمار جاری کردیے جس کے مطابق شہر میں سب سے زیادہ بارش سرجانی ٹاؤن میں 58.2 ملی میٹر ریکارڈ کی گئی ہے۔

    کراچی میں آج بارش ہوگی یا نہیں، محکمہ موسمیات نے بتادیا

    محکمہ موسمیات کے مطابق سعدی ٹاؤن میں 47.5،گلشن معمار میں 37.4،گلشن حدید 37 ملی میٹر بارش ریکارڈ کی گئی ہے، شارع فیصل 32، نارتھ کراچی 29.8 اور جناح ٹرمینل پر 29.2 ملی میٹر بارش ہوئی۔

    محکمہ موسمیات نے بتایا کہ ڈی ایچ اے فیز 2 میں 25.5، کورنگی میں 25.2 ملی میٹر بارش ہوئی، یونیورسٹی روڈ پر 24، ناظم آباد میں 20.5، کیماڑی میں 19.5، اورنگی ٹاؤن میں 19.4 ملی میٹر بارش ریکارڈ ہوئی۔

    محکمہ موسمیات کا مزید بتانا ہے کہ ایئرپورٹ اولڈ ایریامیں18.2 ملی میٹر جبکہ مسرور بیس پر 10 ملی میٹر بارش ریکارڈ ہوئی۔

  • کراچی میں بارش سے متاثرہ کون کون سے علاقوں میں بجلی بحال؟ کے الیکٹرک نے بتادیا

    کراچی میں بارش سے متاثرہ کون کون سے علاقوں میں بجلی بحال؟ کے الیکٹرک نے بتادیا

    کراچی : شہر میں بارش سے متاثرہ علاقوں میں بجلی کی بحالی کے حوالے سے کے الیکٹرک کا اہم بیان آگیا، جس میں بتایا ہے کہ 2100 میں سے 1960 سے زائد فیڈرز فعال ہے۔

    تفصیلات کے مطابق کے الیکٹرک کا بجلی تقسیمی نظام مستحکم ہے، اس وقت کراچی کو 2100 میں سے 1960 سے زائد فیڈرز سے بلاتعطل بجلی کی فراہمی جاری ہے۔

    ترجمان کا کہنا ہے تھا کے- ای کی فیلڈ ٹیموں سے کلیرنس کے بعد بارش سے متاثرہ علاقوں میں بجلی بحالی کا عمل جاری ہے۔

    موجودہ بحال کیے جانے والے علاقوں میں یوسف گوٹھ، گلشن معمار سیکٹر X, Y or Z, معین آباد، یثرب گوٹھ، گلستان جوہر بلاک 3, 14 اور 15 سمیت مسلم راجپوت کالونی اور شاہ فیصل کالونی نمبر 5, شامل ہیں۔

    اس کے علاوہ سعادات کالونی، رحمان آباد، سائٹ سپر ہائی وے، رحمان آباد، مرغی خانہ لیاقت آباد، قائد آباد اور ایف بی ایریا بلاک 22 سمیت نارتھ کراچی سیکٹر 12 سی میں بھی بجلی بحال کر دی گئی ہے۔

    مزید پڑھیں : کراچی میں بارش سے کے الیکٹرک کے 340 سے زائد فیڈرز ٹرپ کرگئے

    حفاظتی پروٹوکول کے تحت نشیبی اور تجاوزات، و کنڈوں سے بجلی چوری والے علاقوں میں بجلی سپلائی منقطع کی جاتی ہے تاہم کے-ای کا عملہ بقیہ علاقوں میں سپلائی مکمل بحال کرنے کیلئے متحرک ہے۔

    بجلی کی ایمرجنسی شکایت کی اطلاع کے لیے 118 سے رجوع کریں ادارے سے فوری رابطہ سوشل میڈیا چینلز ،کے ای واٹس ایپ، اور کے ای لائیو ایپ کے ذریعے ہوسکتا ہے۔

  • کراچی میں بارش، بجلی اور سیوریج کا نظام درہم برہم ہوگیا

    کراچی میں بارش، بجلی اور سیوریج کا نظام درہم برہم ہوگیا

    کراچی میں ہونے والی مون سون کی پہلی بارش سے کئی علاقے زیر آب آگئے اور کراچی میں بجلی کا نظام بری طرح درہم برہم ہوگیا۔

    گزشتہ روز کراچی کے مختلف علاقوں میں کہیں تیز اور کہیں ہلکی بارش سے گرمی کا زور ٹوٹ گیا اور موسم خوشگوار ہوگیا ہے۔ گزشتہ رات سے شہر میں وقفے وقفے سے ہلکی بارش کا سلسلہ برقرار ہے۔

    شہر قائد کے مختلف علاقوں میں بارش کے باعث سیوریج کا نظام بھی بری طرح متاثر ہوا، جبکہ شہر میں جگہ جگہ پانی جمع ہونے سے شدید ٹریفک جام ہوگیا۔

    نارتھ کراچی، نارتھ ناظم آباد، نیوکراچی، بفرزون میں بارش اور سیوریج کا پانی جمع ہوگیا، ناظم آباد،کھارادر اولڈ سٹی ایریا کی گلیوں اور سڑکوں پر سیوریج کا تعفن زدہ پانی پھیل گیا۔

    یہ بھی پڑھیں: کراچی کی بیشتر شاہراہیں کلیئر ہیں کہیں بارش کا پانی نہیں کھڑا، مرتضیٰ وہاب

    کراچی میں دوپہر سے گرج چمک کیساتھ بارش کا سلسلہ شروع ہونے کا امکان

    کراچی میں کل سے اب تک سب سے زیادہ بارش کہاں ہوئی؟

    اس کےعلاوہ قیوم آباد چورنگی کے قریب بھی پانی بھر گیا، گاڑیوں کی طویل قطاریں لگنے کے باعث ٹریفک جام ہوگیا اور لوگ تاخیر سے دفاتر پہنچے، چند ماہ قبل بننے والی شارع نور جہاں کی سروس روڈ دھنس گئی۔

    ریسکیو 1122 کی ایمبولینس گڑھے میں پھنس گئی، اہلکار نے بتایا کہ ایمبولنس مریض کو اسپتال چھوڑ کر واپس جارہی تھی، ایمبولینس کئی گھنٹے سے خراب سڑک میں پھنسی ہے لیکن خوش قسمتی سے واقعے میں کوئی جانی نقصان نہیں ہوا ہے۔

    دوسری جانب کے الیکٹرک کے 568 سے زائد فیڈرز ٹرپ کر گئے، ڈیفنس، پی ای سی ایچ ایس، گلستان جوہر، گلشن اقبال، انچولی، النور سوسائٹی، نارتھ کراچی، ناظم آباد، سرجانی، اورنگی ٹاؤن اور کورنگی سمیت کئی علاقوں کی بجلی چلی گئی۔

     محکمہ موسمیات نے کراچی میں مزید بارش کی نوید سنادی ہے، شہر میں آج بھی مزید بارش کا امکان ہے، اتوار تک وقفے وقفے سے بارش کا سلسلہ جاری رہنے کی پیشگوئی کی گئی ہے۔

    اس کے علاوہ ریسکیو حکام کا کہنا ہے کہ سائٹ ایریا فیکٹری میں کرنٹ لگنے سے ایک شخص جاں بحق ہوگیا جس کی شناخت 22 سالہ کامران کے نام  سے ہوئی ہے، کامران کی لاش اسپتال منتقل کردی گئی ہے۔

  • کراچی میں جمعہ سے گرج چمک اور آندھی کے ساتھ بارش کا امکان

    کراچی میں جمعہ سے گرج چمک اور آندھی کے ساتھ بارش کا امکان

    کراچی: شہرِ قائد میں جمعہ سے آندھی اور گرج چمک کے ساتھ بارش کا امکان ہے جبکہ شام میں بوندا باندی ہوسکتی ہے۔

    محکمہ موسمیات کے مطابق کراچی میں آج شام سے مغربی ہواؤں کا سسٹم داخل ہوگا اس سسٹم کے زیر اثر شام میں بوندا باندی کا امکان ہے۔

    محکمہ موسمیات کا کہنا ہے کہ جمعہ یعنی کل سے وقفے وقفے سے آندھی اور گرج چمک کیساتھ کراچی میں بارش متوقع ہے اور مون سون کا پہلا اسپیل 2 جولائی تک بادل برسائے گا۔

    محکمہ موسمیات کے مطابق آج زیادہ سے زیادہ درجہ حرارت 37 ڈگری سینٹی گریڈ تک جانے کا امکان ہے، شہرمیں مطلع جزوی ابر آلود ہے جبکہ سمندری ہوائیں جزوی طور پر بند ہیں۔

    محکمہ موسمیات کا یہ بھی کہنا ہے کہ شمال مشرقی سمت سے ہلکی رفتار سے ہوائیں چل رہی ہیں اور ہوا میں نمی کا تناسب 76 فیصد ہے۔

    بارشوں کی پیشگوئی، کراچی ایئرپورٹ پر الرٹ جاری

     پنجاب کے دارالحکومت کے کئی علاقوں میں بارش کا سلسلہ جاری رہنے سے لاہور میں موسم خوشگوار ہو گیا، دریں اثنا، کمشنر لاہور زید بن مقصود نے ضلعی انتظامیہ کو ہائی الرٹ رہنے اور کسی بھی ہنگامی صورتحال سے نمٹنے کے لیے فوری ردعمل کو یقینی بنانے کی ہدایت کی ہے۔

    دوسری جانب نیشنل ڈیزاسٹر مینجمنٹ اتھارٹی نے آئندہ 12 سے 24 گھنٹوں کے دوران ملک کے مختلف حصوں بشمول آزاد جموں و کشمیر، سندھ، خیبرپختونخوا اور پنجاب اور وفاقی دارالحکومت میں کہیں کہیں بارش، گرج چمک اور تیز ہواؤں کی پیش گوئی کی ہے۔

    اسی طرح سندھ کے بیشتر علاقوں بشمول سکھر، لاڑکانہ، جیکب آباد، خیرپور، کراچی، حیدرآباد، تھرپارکر، میرپور خاص، ٹھٹھہ اور بدین میں بھی اس دوران موسم کے ایک جیسے رہنے کا امکان ہے۔

  • کراچی میں بارش برسانے والا سسٹم کمزور پڑگیا

    کراچی میں بارش برسانے والا سسٹم کمزور پڑگیا

    کراچی : محکمہ موسمیات نے آئندہ دنوں میں کراچی کا موسم گرم رہنے کی پیش گوئی کرتے ہوئے کہا کہ بارش کا کوئی امکان نہیں ہے۔

    تفصیلات کے مطابق محکمہ موسمیات نے کراچی کے موسم کی صورتحال کے حوالے سے کہا ہے :بارش برسانےوالاہواکےکم دباؤکاسسٹم کمزورہوگیا، شہر میں آج بارش کا کوئی امکان نہیں.

    شہر مطلع جزوی ابرآلود،موسم مرطوب رہنےکاامکان ہے، شہرکاموجودہ درجہ حرارت 26 ڈگری سینٹی گریڈریکارڈ کیا گیا جبکہ 18 کلومیٹر فی گھنٹہ کی رفتارسےہوائیں چل رہی ہیں اور زیادہ سےزیادہ درجہ حرارت 32 سے 34 ڈگری سینٹی گریڈتک رہنے کا امکان ہے۔

    محکمہ موسمیات نے آئندہ دنوں میں شہر کا موسم گرم رہنے کا امکان ظاہر کردیا۔

    دوسری جانب ملک کے بیشتر علاقوں میں موسم گرم اور خشک رہے گا، بالائی خیبر پختونخوا ،جنوب مشرقی سندھ، کشمیر اور ملحقہ پہاڑی علاقوں میں چند مقا مات پر تیز ہواؤں اور گرج چمک کے ساتھ بارش ہو سکتی ہے۔

    محکمہ موسمیات کے مطابق اسلام آباد اور گر دو نواح میں موسم گرم اور خشک جبکہ مطلع جزوی ابر آلود رہنے کا امکان ہے جبکہ سندھ کے بیشتر اضلاع میں موسم گرم اور خشک رہے گا۔

    میر پورخاص، عمر کوٹ، مٹھی اورتھر پارکر میں چند مقا مات پر تیز ہواؤں اورگرج چمک کے ساتھ بارش ہو سکتی ہے۔

    پنجاب کے بیشتر اضلاع میں موسم گرم اور خشک رہنے کا امکان ہے۔ مری، گلیات اور گردونواح میں تیز ہواؤں اورگرج چمک کے ساتھ بارش ہو سکتی ہے۔

  • کراچی میں طوفانی بارشیں، ایئرپورٹ الرٹ جاری

    کراچی میں طوفانی بارشیں، ایئرپورٹ الرٹ جاری

    کراچی: شہر قائد کے ایئرپورٹ پر طوفانی بارشوں سے نمٹنے کے لیے نئی حکمت عملی کے تحت ٹاسک فورس تشکیل دے دی گئی۔

    تفصیلات کے مطابق کراچی میں جاری طوفانی بارشوں کے پیش نظر ایئرپورٹ انتظامیہ نے نیا الرٹ جاری کیا ہے، جس میں ایئرپورٹ پر کام کرنے والی ایئرلائنز، گراؤنڈ ہینڈلنگ اور جنرل ایوی ایشن ایریا کی جانب سے ایوی ایشن کمپنیوں کو مکمل الرٹ رہنے کی ہدایت کی گئی ہے۔

    ایئرپورٹ انتظامیہ نے طیاروں کو محفوظ مقامات پر پارک رکھنے کی ہدایت کی، ایئرپورٹ الرٹ میں کہا گیا ہے کہ تمام ایوی ایشن کمپنیاں اپنے تمام اثاثہ جات کی حفاظت کریں، طوفانی بارشیں مزید چند روز تک جاری رہنے کی پیش گوئی ہے۔

    الرٹ کے مطابق کراچی ایئرپورٹ پر پارک تمام طیاروں کو کسی بھی حادثے سے محفوظ رکھنے کے لیے ایئرسائیڈ ایریا منیجر ذمہ دار ہوں گے۔

    الرٹ میں ہدایت کی گئی ہے کہ بارشوں کے دوران ایمرجنسی کی صورت میں کراچی ایئرپورٹ کے ڈیوٹی ٹرمینل منیجر اور ایئرسائیڈ ایریا منیجر کے نمبرز پر فوری رابطہ کر کے آگاہی دی جا سکتی ہے۔

  • کراچی میں سب سے زیادہ بارش کہاں ہوئی؟

    کراچی میں سب سے زیادہ بارش کہاں ہوئی؟

    کراچی : محکمہ موسمیات کا کہنا ہے کہ سب سے زیادہ بارش سرجانی ٹاؤن میں 127.6 ملی میٹرریکارڈ کی گئی۔

    تفصیلات کے مطابق کراچی کے مختلف علاقوں میں رات گئے بارش ہوئی ، محکمہ موسمیات نے کراچی میں بارش کے اعداد وشمار جاری کردیے۔

    جس میں بتایا کہ سب سے زیادہ بارش سرجانی ٹاؤن میں ایک سوستائیس اعشاریہ چھ ملی میٹرریکارڈکی گئی۔

    اعداد و شمار میں کہنا تھا کہ گلشن حدید میں 46 ،ناظم آباد 45.2 ، کیماڑی میں 42 ملی میٹر، شارع فیصل 38 ،کورنگی 36.3 ،نارتھ کراچی میں 32.9 ،قائد آباد29.5 ریکارڈ ہوئی۔

    اس کے علاوہ اولڈ ایئرپورٹ میں 29.4 ملی میٹر،گلشن معمار 36 ،ماڑی پور 25.5 ، جناح ٹرمینل پر 25.6 ملی میٹربارش ریکارڈ کی گئی جبکہ سب سے کم بارش ڈیفنس فیزٹومیں10.7 ملی میٹرریکارڈہوئی۔

    خیال رہے کراچی میں کہیں تیز اور کہیں ہلکی بارش کاسلسلہ جاری ہے، محکمہ موسمیات کا کہنا ہے کہ شہر میں آئندہ 24 گھنٹوں کے دوران تیز ہواؤں اور گرج چمک کے ساتھ کہیں کہیں موسلا دھار بارش کا امکان ہے جبکہ بارش کا یہ سلسلہ کل 31 اگست تک جاری رہے گا۔