کراچی: محکمہ موسمیات کا کہنا ہے کہ کراچی میں سب سے زیادہ ناظم آباد میں 57.5 ملی میٹر بارش ریکارڈ کی گئی ہے۔
تفصیلات کے مطابق کراچی میں تیز ہواؤں کے ساتھ موسلا دھار بارش ہوئی، محکمہ موسمیات کا کہنا ہے کہ سب سے زیادہ بارش ناظم آباد میں 57.5 ملی میٹر ریکارڈ کی گئی ہے۔
محکمہ موسمیات کے مطابق صدر، سرجانی ٹاؤن میں 45 ملی میٹر بارش ریکارڈ کی گئی، کلفٹن میں 42.3 ملی میٹر بارش ہوئی۔
اسی طرح مسرور بیس پر 33 ملی میٹر، نارتھ کراچی میں 27 ملی میٹر بارش ریکارڈ کی گئی، لانڈھی میں 20 ملی میٹر، پی اے ایف فیصل بیس پر 11 ملی میٹر بارش ریکارڈ کی گئی۔
محکمہ موسمیات کے مطابق یونیورسٹی روڈ پر 3 ملی میٹر، ایئرپورٹ پر 2 ملی میٹر بارش ریکارڈ کی گئی۔
مزید پڑھیں: کراچی میں کل سے بارش کا سلسلہ تھم جائے گا ،چیف میٹرولوجسٹ
واضح رہے کہ کراچی میں گرج چمک کے ساتھ تیز بارش ہوئی جس کے سبب نشیبی علاقے زیر آب آگئے کئی علاقوں میں جگہ جگہ پانی کھڑا ہوگیا جبکہ سائٹ ایریا میں کرنٹ لگنے سے 2 افراد جاں بحق ہوگئے۔
ادھر ناظم آباد ایک نمبر پر 2 درخت اور ایک پول گر گئے، پول گرنے کے باعث بجلی اور کیبل کی تاریں بھی ٹوٹ گئیں، ناگن چورنگی یوپی موڑ پاور ہاؤس پر نالہ ابل گیا۔
ناگن چورنگی یوپی موڑ پر نالہ ابلنے سے سڑکیں پانی میں ڈوب گئیں، ناگن چورنگی پر ٹریفک کی آمدورفت معطل ہوگئی۔
خیال رہے کہ چیف میٹرولوجسٹ سردار سرفراز کا کہنا تھا کہ کراچی میں حالیہ سسٹم سے بارش کا آج آخری روز ہے، کل سے بارش کا سلسلہ تھم جائے گا۔
